म. टा. विशेष प्रतिनिधी, नवी दिल्लीः लोकसभा आणि विधानसभा निवडणुकांमध्ये लागोपाठच्या पराभवांमुळे नैराश्याच्या गर्तेत लोटल्या गेलेल्या काँग्रेस पक्षाच्या भविष्याच्या दृष्टीने निर्णायक ठरणाऱ्या तीन दिवसांच्या चिंतन शिबिराला आज, शुक्रवारपासून उदयपूर येथे प्रारंभ होत आहे. राहुल गांधी यांना पुन्हा पक्षाचे अध्यक्षपद सोपविण्यासाठीही या शिबिराच्या माध्यमातून वातावरण निर्मिती अपेक्षित आहे.

या चिंतन शिबिरात भाग घेण्यासाठी राहुल गुरुवारी संध्याकाळी दिल्लीहून चेतक एक्स्प्रेसने उदयपूरला रवाना झाले. यावेळी दिल्लीच्या सराय रोहिल्ला रेल्वे स्थानकावर काँग्रेस कार्यकर्त्यांची एकच झुंबड उडाली होती. येत्या सप्टेंबरमध्ये काँग्रेसच्या अध्यक्षपदाची निवडणूक होऊ घातली असून, राहुल यांच्याकडे पुन्हा पक्षाचे नेतृत्व सोपविण्यात यावे, अशी या चिंतन शिबिरात गांधी समर्थकांकडून मागणी होण्याची शक्यता आहे.

देशाच्या अपेक्षांनुसार काँग्रेस पक्ष तीन दिवस येथे आत्मचिंतन, आत्ममंथन आणि आत्मावलोकन करणार आहे. देश आर्थिक आणि सामाजिक ‘संक्रमणकाळा’तून मार्गक्रमण करीत असताना भारताच्या स्वातंत्र्य संकल्पाच्या उदरात जन्मलेला काँग्रेस देशाला पुन्हा प्रगती, समृद्धी आणि उन्नतीच्या मार्गावर आणण्यासाठी नवसंकल्प करीत आहे, असे या शिबिराच्या पूर्वसंध्येला पत्रकार परिषदेला संबोधित करताना काँग्रेसचे मुख्य प्रवक्ते रणदीपसिंह सुरजेवाला म्हणाले. २०१४च्या लोकसभा निवडणुकीपासून सततच्या पराभवांनी हताश झालेल्या काँग्रेसमध्ये जान फुंकण्याचा उदयपूरच्या तीन दिवसांच्या चिंतन शिबिराचा शेवटचा मोठा प्रयोग ठरणार आहे. काँग्रेस अध्यक्ष सोनिया गांधी यांच्या अध्यक्षतेखाली होणाऱ्या या शिबिरात राहुल आणि प्रियांका वाड्रा यांच्यासह देशभरातील काँग्रेसचे ४३० प्रमुख नेते भाग घेणार असून ते राजकारण, अर्थव्यवस्था, सामाजिक न्याय आणि सक्षमीकरण, पक्ष संघटना, शेतकरी आणि कृषीक्षेत्र तसेच तरुणांशी संबंधित विषयांवर सहा वेगवेगळ्या गटांमध्ये चर्चा करणार आहेत.

या व्यापक चिंतन-मंथनातून निघणारे निष्कर्ष सोनिया आणि काँग्रेस कार्यसमितीपुढे मांडून त्यांना अंतिम स्वरूप देण्यात येईल. या शिबिरातून निघणारे निष्कर्ष केवळ काँग्रेसला आव्हानात्मक परिस्थितीतून बाहेर काढून नवी दिशा देणार नाहीत, तर भारताच्या गौरवशाली भविष्याचा मार्गही प्रशस्त करतील, असा विश्वास सुरजेवाला यांनी व्यक्त केला.

सध्या राजस्थान आणि छत्तीसगढ या दोनच राज्यांत स्वबळावर सत्तेत असलेल्या काँग्रेसला लोकसभा निवडणुकीपूर्वी हिमाचल प्रदेश, गुजरात, कर्नाटक, त्रिपुरा, मध्य प्रदेश, राजस्थान, छत्तीसगढ या राज्यांमध्ये होणाऱ्या विधानसभा निवडणुकांच्या अग्निपरीक्षेला सामोरे जावे लागणार आहे. ज्या राजस्थानमध्ये काँग्रेसच्या चिंतन शिबिराचे आयोजन होत आहे, तिथेच काँग्रेसला पुढच्या वर्षी सत्ता शाबूत राखता येईल काय, असा प्रश्न काँग्रेसच्या वर्तुळात उपस्थित केला जात आहे. अंतर्गत कलहाने ग्रासलेल्या काँग्रेसपुढे पक्ष मजबूत करण्यासाठी व्यापक संघटनात्मक फेरबदल करण्याचे तसेच निवडणूक रणनीतीत कल्पकता आणण्याचे आव्हान आहे. पक्षातील असंतुष्ट नेत्यांनी गेल्या दोन वर्षांपासून पक्षाची सूत्रे असलेल्या गांधी कुटुंबाला चांगलेच त्रस्त केले आहे. अशा स्थितीत काँग्रेसला आपले अस्तित्व शाबूत राखून आगामी लोकसभा निवडणुकीत पंतप्रधान नरेंद्र मोदी यांच्या नेतृत्वाखालील भाजपप्रणीत रालोआला पराभूत करण्याच्या अशक्यप्राय आव्हानाला सामोरे जावे लागणार आहे. त्यासाठी विविध प्रादेशिक पक्षांसोबत आघाडी स्थापन करताना काँग्रेसवर अनेक राजकीय तडजोडी करण्याची वेळ येणार आहे.



Source link

Leave a Reply

Your email address will not be published.