मुंबई : ऐन महागाईच्या काळात रिझर्व्ह बँकेने रेपो दरात वाढ करून कर्जदारांना पुन्हा एकदा मोठा झटका दिला आहे. यावेळी मध्यवर्ती बँकेकडून रेपो दरात अर्ध्या टक्क्यांनी वाढ करण्यात आली आहे, ज्यामुळे तुमचे गृह कर्ज, वाहन कर्ज किंवा इतर कोणत्याही प्रकारचे कर्ज देखील लवकरच महाग होणार आहे. बँकांच्या बाह्य बेंचमार्कशी जोडलेली कर्जे थेट ०.५० टक्क्यांनी महाग होतील आणि तुमच्यावर ईएमआयचा बोजा वाढेल. रेपो दरातील या वाढीमुळे जुने कर्जदार आणि नवीन कर्जदार या दोघांवरही परिणाम होणार आहे.

तुमचा ईएमआय वाढण्याची भीती तुम्हालाही भेडसावत असेल आणि ते भरण्याची आर्थिक स्थिती नसेल तर तुम्ही काही फेरबदल करून तुमच्या ईएमआयचे ओझे कमी करण्याचा प्रयत्न करू शकता. सर्वात मोठा परिणाम गृहकर्जावर पडतो, कारण ते दीर्घ मुदतीचे असते आणि व्याजदरात थोडीशी फेरफार केल्यासही मोठा परिणाम होऊ शकतो.

वाचा – सर्वसामान्यांच्या खिशावर आणखी भार पडणार; 5G खर्चाची तुमच्याकडून वसुली होईल, 4G सेवाही महागणार!

जुने कर्जदार असाल तर…प्रीपेमेंट करा
तुम्ही आधीच गृहकर्ज किंवा कार कर्ज घेतले असल्यास तुमच्या कर्जावरील प्रीपेमेंटमुळे ईएमआयचा भार कमी होऊ शकतो. सर्व सरकारी आणि खाजगी बँका गृहकर्जावर प्री-पेमेंट सुविधा देतात. त्याचा फंडा असा आहे की जेव्हा तुम्ही तुमच्या कर्जावर प्रीपेमेंट करता तेव्हा ती रक्कम थेट तुमच्या मूळ रकमेवर जोडली जाते आणि मुद्दल कमी केल्यामुळे व्याज म्हणून आकारली जाणारी रक्कमही कमी होते. यामुळे तुमच्यावरील ईएमआयचा भारही कमी होईल आणि कर्जावरील दीर्घकालीन बचत देखील होईल.

नवीन कर्ज हवंय… अधिक डाउन पेमेंट करा
जर तुम्ही गृहकर्ज किंवा वाहन कर्ज घेण्याची योजना आखत असाल आणि व्याजदरात वाढ झाल्यामुळे ईएमआयचा बोजा वाढण्याचा धोका दिसत असेल, तर कर्जाच्या तुलनेत डाउन पेमेंट जास्त ठेवण्याचा प्रयत्न करा. जर तुम्ही गृहकर्जावर एक किंवा दोन लाख रुपये जास्त दिले तर तुमचा मासिक ईएमआय खूप कमी होऊ शकतो. यामुळे व्याजाच्या स्वरूपात मोठी बचतही होईल.

वाचा – ग्राहकांना झटका; RBI ने रेपो रेट वाढवताच ‘या’ खाजगी बँकांनी कर्जदर वाढवला

जर तुम्ही ३० लाख रुपयांचे कर्ज ७.५०% व्याजाने २० वर्षांसाठी घेतले असेल, तर प्रत्येक महिन्याचा ईएमआय २४,१६८ रुपये होईल. पण जर दोन लाख अधिक डाउन पेमेंट केले आणि कर्ज २८ लाख झाले, तर ईएमआय २२,५५७ रुपये होईल. यामुळे दरमहा तुमची १,६११ रुपयांची थेट बचत होईल. यामुळे तुमच्या कर्जाच्या संपूर्ण कालावधीत ३.८६ लाख रुपयांची बचत होईल.

कर्जाचा कालावधी वाढवा
ईएमआयचे ओझे कमी करण्याचा हा सर्वात सोपा मार्ग आहे. तुमच्या कर्जाचा कालावधी वाढवून तुम्ही दरमहा भरावा लागणारा ईएमआय ओझे कमी करू शकता. मात्र, कर्जाचा कालावधी जसजसा वाढेल, व्याज म्हणून आकारली जाणारी एकूण रक्कम देखील वाढेल. म्हणजेच जर तुम्ही ३० लाख रुपयांचे कर्ज ७.५० टक्के व्याजाने २० वर्षांसाठी घेतले असेल, तर प्रत्येक महिन्याचा ईएमआय २४,१६८ रुपये असेल आणि त्यासाठी संपूर्ण कार्यकाळ २८,२७१ रुपये व्याज द्यावे लागेल. पण जर कर्जाची मुदत पाच वर्षांनी वाढवून 25 वर्षे केली तर ईएमआय २२,१७० रुपयांपर्यंत खाली येईल. म्हणजेच, दरमहा दोन हजार रुपये कमी होतील, परंतु संपूर्ण कार्यकाळातील व्याज म्हणून एकूण पेमेंट ३६,५०,९२१ रुपये होईल. म्हणजेच तुम्हाला ८.५० लाख रुपये जास्त द्यावे लागतील.

वाचा – महागाईचा झटका; रिझर्व्ह बँकेकडून रेपो दरात वाढ; जाणून घ्या तुमच्या कर्जाचा EMI किती वाढणार

व्याजदर कमी करण्यासाठी बँकेशी चर्चा करा
जर तुमचा कर्ज परतफेडीचा इतिहास बरोबर असेल आणि तुमचा सिबिल म्हणजेच क्रेडिट स्कोअर देखील चांगला असेल, तर तुम्ही तुमच्या बँकेशी बोलून व्याजदर कमी करू शकता. बर्‍याच वेळा असे घडते की तुमची बँक चांगला ट्रॅक रेकॉर्ड लक्षात घेऊन व्याजदर कमी करू शकते. समजा बँकेने व्याजदरात ०.२५ टक्के कपात केली तर तुमच्या कर्जाचा नवा दर ७.२५ टक्के होईल. यामुळे २० वर्षांसाठी घेतलेल्या ३० लाख रुपयांच्या कर्जाचा २४,१६८ रुपयांचा ईएमआय कमी होऊन २३,७११ रुपयांवर येईल.

कर्ज इतर बँकेत हस्तांतरित करा
जर तुमची बँक व्याजदर कमी करण्यास तयार नसेल किंवा तुम्ही जास्त व्याज आकारणार्‍या बँकेकडून गृहकर्ज घेतले असेल तर तुम्ही तुमचे कर्ज दुसऱ्या बँकेत हस्तांतरित (ट्रान्सफर) करू शकता. यामुळे व्याजदर कमी होईल आणि तुमच्यावरील ईएमआयचा भारही कमी होईल. समजा एखादी नवीन बँक तुम्हाला ०.५० टक्के कमी व्याजावर कर्ज देत असेल तर…

७.५०% व्याजाने २० वर्षांसाठी घेतलेले ३० लाख रुपयांचे गृहकर्ज, ज्यासाठी आतापर्यंत तुम्ही २४,१६८ रुपये ईएमआय भरत होता, त्याचा ७ टक्के व्याजदराने ईएमआय २३,२५९ रुपये होईल. म्हणजेच, तुमची दरमहा ९०९ रुपये आणि वार्षिक १०,९०८ रुपयांची बचत होईल.



Source link

Leave a Reply

Your email address will not be published.