| Maharashtra Times | Updated: Jun 18, 2022, 1:01 PM

बॉलिवूडचा एव्हरग्रीन अभिनेता म्हणून अनिल कपूर यांचं नाव अग्रक्रमानं घेतलं जातं. सध्या त्यांच्या जुग जुग जियो या सिनेमाची जोरदार चर्चा आहे. अनिल कपूर बॉलिवूडमध्ये गेल्या ४० वर्षांपासून कार्यरत आहेत. मात्र अजूनही त्यांना जेव्हा सिनेमा प्रदर्शित होणार असतो तेव्हा त्याचं टेन्शन येतं. एका मुलाखतीमध्ये अनिल कपूर यांनी या सिनेमात काम करण्याचा त्यांचा अनुभव सांगितला आहे. तसंच धर्मा प्रॉडक्शनबरोबर पहिल्यांदा काम करताना काय वाटतं हेदेखील सांगितलं. याबद्दल बोलताना अनिल म्हणाले की,’आता हे मी कुणाबरोबर काम करतो त्यावर अवलंबून आहे. मात्र मी ‘जुग जुग जियो’ सिनेमाबाबत निश्चिंत आहे. करिअरच्या सुरुवातीला इतके यशस्वी सिनेमा केले आहेत की त्यामुळे टेन्शन आपसूकच येते. खास सिनेमे आणि मोठ्या बजेट सिनेमांबाबत टेन्शन तर येतेच. मी अनेक सिनेमांच्या प्रदर्शनापूर्वी टेन्शनमध्ये असायचो.’

 

‘जुग जुग जियो’ या सिनेमात अनिल कपूर आणि नीतू कपूर एकत्र मोठ्या पडद्यावर दिसणार आहेत. सिनेमाच्या ट्रेलरमध्ये या दोघांची केमेस्ट्री दिसून आली आहे. एका मुलाखतीमध्ये अनिल यांनी नीतू यांच्यासोबत काम करतानाचा अनुभव सांगितला आहे. त्याबरोबरच नव्या पिढीमधील अभिनेत्रींसोबत काम करायला उत्सुक नसल्याचंही सांगितलं, त्यामुळे अनेकांना धक्का बसला.

यश जोहर यांना वाईट वाटलं

अनिल कपूर यांनी पहिल्यांदा धर्मा प्रॉडक्शनबरोबर काम केलं आहे. इतक्या वर्षांपासून या प्रॉडक्शन हाऊसपासून दूर राहण्याचं कारण विचारलं असता त्यांनी सांगितलं की, ‘धर्मा प्रॉडक्शनबरोबर हा माझा पहिला सिनेमा आहे. करण जोहरच्या वडिलांबरोबर माझे चांगले संबंध होते. माझ्या करीअरच्या सुरुवातीला त्यांनी मला एका सिनेमाची ऑफर दिली होती. परंतु सिनेमा मला न आवडल्यानं नकार दिला. त्यामुळे यश जोहर यांना वाईट वाटले.

जुग जुग जियोमुळे योग आला

तो सिनेमा मिस्टर इंडिया सिनेमाबरोबर प्रदर्शित झाला. आम्ही जेव्हा भेटायचो तेव्हा मी त्यांना सांगायचो मी तुमच्या सिनेमात नक्की काम करीन. करण जोहर देखील मला कायम म्हणायचा की तुमच्याबरोबर काम करायचं आहे. परंतु तो योग येत नव्हता आता हा योग जुग जुग जियो सिनेमातून आला आहे.’ अनिल कपूर यांनी नीतू कपूर यांच्याबरोबर पहिल्यांदा काम केलं आहे.

नवीन अभिनेत्रींना तुमच्याबरोबर काम करायचं नसतं

त्या अनुभवाबद्दल अनिल यांनी सांगितलं की, ‘ऋषी कपूर यांच्या काळापासून नीतू यांना ओळखतो आहे. आम्ही जेव्हा सेटवर पहिल्यांदा भेटलो तेव्हा असं वाटलं की कुटुंबातील सदस्यालाच भेटत आहे. नीतू यांची ही कमबॅक फिल्म आहे. त्याचा फायदा आम्हाला नक्कीच होणार आहे. त्यांच्या रुपात मला एक उत्तम सहकलाकार मिळाला. जो दिसायला सुंदर आहे, डान्सही चांगला करतो. आताच्या नवीन अभिनेत्रींना तुमच्याबरोबर काम करायचं नसतं. त्यांना त्यांच्यापेक्षा वयानं लहान असलेल्या हिरोंबरोबर काम करायचं असतं. पाच-सहा अभिनेत्री अशा आहेत त्या सुंदर तर आहेच शिवाय सध्याच्या काळातील नवीन अभिनेत्रींपेक्षा उत्तम आहेत. या लिस्टमध्ये माधुरी दीक्षित हिचं नाव सगळ्यात आधी येतं.’

लोक म्हणतील तुमच्या वयाप्रमाणं वागा

अनिल कपूर हे बॉलिवूडमधील एव्हरग्रीन अभिनेते आहेत. त्याबद्दल ते म्हणाले की, ‘हा लोकांचा पाहण्याचा दृष्टीकोन आहे. त्यांचं प्रेम आहे. परंतु असं खरंच काही नाहीये. मी या गैरसमजुतीमध्ये कधीच नव्हतो. मी करिअरच्या मध्यावर असतानाच स्वतःला समजावले होते की, आपण कायम हिरो बनून राहू शकत नाही. मी कायम माझ्या वयाच्या हिशोबानं सिनेमांची निवड केली. स्वतःच्या क्षमता जाणून घेत काम केलं. लोकांनी माझी टिंगल करण्याआधी मी करिअरमध्ये योग्य ते निर्णय घेतले आणि त्याची दिशा बदलली. वाढत्या वयानुसार मी भूमिका करायला सुरुवात केली.

तुमची चोरी कधी ना कधी पकडली जातेच

एक दोन वेळा ते दुर्लक्ष करतात परंतु प्रत्येकवेळी ते याकडे दुर्लक्ष करू शकत नाही. तुमची चोरी कधी ना कधी पकडली जातेच. आज मला जर कुणी वरुणची भूमिका करायला सांगितली तर ते कसं शक्य होईल. मी तर त्याच्या वडिलांचीच भूमिकेसाठी योग्य आहे. लोक म्हणतात तसं तुम्ही तुमच्या वयानुसारच वागायला हवं.’

जेव्हा तुम्ही आनंदी असता ते चेहऱ्यावर दिसतं

बीबी नंबर वन, ताल, नो-एंट्री, वेलकम, दिल धडकने दो सारखे सिनेमे केले. या प्रत्येक सिनेमातील भूमिका अतिशय साध्या असल्या तरी प्रेक्षकांच्या मनात राहणाऱ्या होत्या. जेव्हा तुम्ही आनंदानं काम करता तेव्हा तुमच्या चेहऱ्यावर आनंद दिसतो. तुमच्या चेहऱ्यावर तणावाचा लवलेशही नसतो. जेव्हा तुम्ही स्पेशल इफेक्टच्या मदतीनं स्वतःला हिरो बनवता तेव्हा प्रेक्षकांना ते कळते.



Source link

Leave a Reply

Your email address will not be published.