वृत्तसंस्था, ढाका: प्रेषित मोहम्मद यांच्या विरोधात भाजपच्या दोन निलंबित नेत्यांनी केलेल्या वादग्रस्त वक्तव्यामुळे निर्माण झालेला वाद हा भारताचा अंतर्गत मुद्दा आहे. तसेच इतर मुस्लीम राष्ट्रांप्रमाणे बांगलादेशसाठी ही लक्ष वेधून घेणारी बाब नाही, असे बांगलादेशच्या एका वरिष्ठ मंत्र्याने म्हटले आहे. त्याचवेळी देशाचे सरकार या मुद्द्यावर तडजोड करत असल्याची टीकाही त्यांनी फेटाळून लावली.

भाजपच्या प्रवक्त्या नूपूर शर्मा यांच्या वक्तव्याचा अनेक अरब आणि मुस्लीम देशांनी निषेध केला आहे. यामध्ये सौदी अरेबिया, कतार आणि इराणसारख्या देशांचा समावेश आहे. अफगाणिस्तान आणि पाकिस्ताननेही भारताविरोधात बोलण्याची संधी सोडली नाहीत. पण, भारताचा शेजारी बांगलादेशने मात्र यापासून अंतर राखले आहे. बांगलादेशचे माहिती आणि प्रसारणमंत्री डॉ. हसन महमूद यांनी भारतीय पत्रकारांशी अनौपचारिक संवाद साधताना या प्रकरणातील कारवाई, भाजप नेत्यांचे निलंबन यासाठी भारतीय अधिकाऱ्यांचे अभिनंदन केले आणि आपण या प्रकरणाचा पाठपुरावा करणार नसल्याचे सांगितले. ५७ राष्ट्रांच्या इस्लामिक कोऑपरेशन संघटनेच्या विरोधानंतरही बांगलादेशने या संपूर्ण प्रकरणावर मौन बाळगल्याच्या प्रश्नावर महमूद म्हणाले की, आम्ही तडजोड करत नाही. प्रेषित मोहम्मद यांच्या अवमानाचा आम्ही कुठेही आणि कधीही निषेध करतो. पण, भारत सरकारने त्यावर कारवाई केली आहे. आम्ही त्यांचे आभार मानतो आणि आता कायदा त्याचे काम करेल, असे ते म्हणाले.

नूपूर शर्मांविरोधात समन्स

कोलकाता : प्रेषित मोहम्मद पैगंबर यांच्याबाबतच्या वादग्रस्त वक्तव्याप्रकरणी चौकशी करण्यासाठी भाजपच्या निलंबित प्रवक्त्या नूपूर शर्मा यांना कोलकाता पोलिसांनी सोमवारी समन्स बजावले. जबानी नोंदवण्यासाठी नारकेलडांगा पोलिस ठाण्यात २० जून रोजी हजर राहण्याचे आदेश त्यांना देण्यात आले आहेत.

प. बंगालमधील स्थिती पूर्वपदावर

कोलकाता : प्रेषित मोहम्मद पैगंबर यांच्याविषयीच्या आक्षेपार्ह वक्त्यावरून धुमसणाऱ्या पश्चिम बंगालमधील परिस्थिती आता नियंत्रणात असल्याची माहिती राज्याचे पोलिस महासंचालक मनोज मालवीय यांनी सोमवारी दिली. राज्याच्या विविध भागांतून पोलिसांनी २००हून अधिक जणांना अटक केली आणि ४२ गुन्हे दाखल करण्यात आले, असेही त्यांनी सांगितले.

एनआयए चौकशीची मागणी

कोलकाता : पश्चिम बंगालमधील हिंसाचारप्रकरणी राष्ट्रीय तपास संस्थेकडून (एनआयए) तपास करण्याची, तसेच परिस्थिती नियंत्रणात आणण्यासाठी लष्कर तैनात करण्याची मागणी करणाऱ्या याचिका कोलकाता उच्च न्यायालयात सोमवारी दाखल करण्यात आल्या. मुख्य न्यायमूर्ती प्रकाश श्रीवास्तव यांच्या अध्यक्षतेखालील खंडपीठासमोर एका याचिकाकर्त्याने हिंसाचार राष्ट्रीय एकात्मतेवर परिणाम करत आहे, असा दावा करत प्रकरणाचा एनआयएकडून तपास करण्याची विनंती केली.

मुस्लीम संघटनेचे आवाहन

कोलकाता : प्रेषित मोहम्मद पैगंबर यांच्याबद्दलच्या वादग्रस्त वक्तव्याचा निषेध करण्यासाठी आणखी कोणत्याही रॅलींना परवानगी देऊ नये, अशी विनंती मुस्लीम धर्मगुरूंच्या संघटनेने पश्चिम बंगालच्या मुख्यमंत्री ममता बॅनर्जी यांच्याकडे केली. हिंसाचाराद्वारे नागरिकांना ओलिस धरता येऊ शकत नाही, असेही संघटनेने म्हटले आहे. स्वार्थी हेतूने लावलेल्या सापळ्यात अडकू नका आणि हिंसाचारात भाग घेऊ नका, असे आवाहन बेंगाल इमाम्स असोसिएशनने समुदायाला केले आहे.

उत्तर प्रदेशमध्ये ३२५ जणांना अटक

लखनऊ : १० जून रोजी नमाजानंतर उसळलेल्या दंगलप्रकरणी उत्तर प्रदेश पोलिसांनी आठ जिल्ह्यांतून आत्तापर्यंत ३२५ जणांना अटक केली. तसेच नऊ जिल्ह्यांत १३ गुन्हे दाखल करण्यात आले. प्रयागराज येऊन ९२, सहारनपूर येथून ८०, हाथरस ५१, आंबेडकर नगर ४१, मोरादाबाद ३५, फिरोझाबाद १६, अलिगड सहा आणि जालौनमधून चार जणांना अटक करण्यात आली.



Source link

Leave a Reply

Your email address will not be published.