मुंबई: विधानपरिषदेच्या निवडणुकीसाठी महाविकास आघाडी आणि भाजपने जोरदार तयारी सुरू केली आहे. या निवडणूकतही भाजपने राज्यसभेप्रमाणे एक उमेदवार जास्त दिला आहे. त्यामुळे मविआची डोकेदुखी वाढली आहे. भाजपकडून (Vidhan Parishad Election 2022) पाच उमेदवारांची अधिकृत यादी जाहीर करण्यात आली आहे. प्रवीण दरेकर, प्रसाद लाड (Prasad Lad) यांना पुन्हा संधी देण्यात आली आहे. तर राम शिंदे, श्रीकांत भारतीय आणि उमा खापरे यांनाही विधानपरिषदेचं तिकीट मिळालं आहे.

विरोधीपक्ष नेते देवेंद्र फडणवीस यांच्या मर्जीतले मानले जाणारे प्रसाद लाड यांना भाजपने पुन्हा संधी दिली आहे. प्रसाद लाड यांचे सर्वपक्षीयांशी मधूर संबंध आहेत. त्यांचे मनसे अध्यक्ष राज ठाकरे यांच्याशीही जवळचे मैत्रीपूर्ण संबंध आहेत. हे या निवडणुकीत त्यांच्यासाठी जमेची बाजू ठरु शकतात. प्रसाद लाड यांच्यापुढे काँग्रेसच्या भाई जगताप यांचं कडवं आव्हान आहे.

हेही वाचा –शिवसेनेनं आणखी एका जिल्हाप्रमुखाला दिलं निष्ठेचं बक्षीस; आमशा पाडवी कोण आहेत?

प्रसाद लाड कोण आहेत?

प्रसाद लाड हे भाजप महाराष्ट्र राज्याचे उपाध्यक्षही आहेत. नेहमी पक्षातील बड्या नेत्यांच्या मर्जीत राहण्याचं कसब त्यांच्यात असल्याचं पाहायला मिळालं आहे. राष्ट्रवादीत असताना ते प्रफुल्ल पटेल, अजित पवार, जयंत पाटील, छगन भुजबळ यांच्या मर्जीतले मानले जायचे. तर, भाजपात आल्यानंतरही त्यांनी त्यांच्यातला हा गुण मावळू दिला नाही. त्यांनी विरोधीपक्ष नेते देवेंद्र फडणवीस यांचा विश्वास संपादन केला, पक्षात अनेक जबाबदाऱ्या सांभाळल्या आणि त्याचच फळ म्हणून पक्षाने इतर जुन्या नेत्यांना डावलून २०१७ मध्ये प्रसाद लाड यांना विधानपरिषदेची उमेदवारी दिली. त्यानंतर आता सलग दुसऱ्यांदा त्यांना ही संधी देण्यात आली आहे.

प्रसाद लाड यांना पूर्वीपासूनच राजकारणाची आवड होती. त्यामुळे त्यांनी तरुण वयात राष्ट्रवादीत काम करण्यास सुरुवात केली. पक्षातील नेत्यांचा विश्वास संपादन करण्याचा गुण अंगी असल्याने त्यांना ३१ व्या वर्षीच सिद्धीविनायक न्यासाच्या विश्वस्तपदी काम करण्याची संधी मिळाली. त्यानंतर त्यांच्यावर म्हाडाच्या इमारत व दुरुस्ती मंडळाच्या अध्यक्षपदाची जबाबदारी सोपवण्यात आली. त्यानंतर त्यांनी शीव-कोळीवाडा मतदारसंघातून २०१४ मध्ये राष्ट्रवादीकडून निवडणूक लढवली. पण, त्यात त्यांना पराभव पत्करावा लागला. त्यानंतर त्यांनी राष्ट्रवादीचं घड्याळ हातावरुन उतरवलं आणि भाजपचं कमळ हाती घेतलं.

हेही वाचा –राष्ट्रवादीच्या स्थापनेपासून रामराजे पवारांसोबत, जावई भाजपवासी, इंटरेस्टिंग स्टोरी

नारायण राणे यांनी काँग्रेस सोडून भाजपमध्ये प्रवेश घेतला. त्यांनी एमएलसी पदाचा राजीनामा दिल्याने त्या जागी पोट निवडणूक लढवण्यात आली. यावेळीही भाजपने प्रसाद लाड यांना संधी दिली आणि प्रसाद लाड यांनी काँग्रेसच्या दिलीप माने यांचा २०९ मते मिळवून पराभव केला. त्यावेळी काँग्रेस आणि राष्ट्रवादी काँग्रेस पक्षाच्या नऊ आमदारांनी भाजपच्या उमेदवाराला मतदान केले होते. त्यानंतर प्रसाद लाड यांनी आमदार आणि पक्षातील नेते म्हणून अनेक जबाबदाऱ्या पार पाडल्या. विरोधीपक्षात राहून त्यांनी शिवसेना आणि मविआतील इतर पक्षांना शिंगांवर घेण्याचं काम केलं. आता पक्षाने त्यांना पुन्हा एकदा विधानपरिषदेची उमेदवारी देत त्यांच्यावरील विश्वास दाखवला आहे.

विधानपरिषद निवडणूक कधी?

महाराष्ट्रात विधानपरिषदेच्या १० जागांसाठी २० जून रोजी मतदान होणार आहे. भाजपकडे दहापैकी चार जागांवर निवडून येण्यासाठी आवश्यक असणारी मते आहेत, तर शिवसेना आणि राष्ट्रवादीकडे प्रत्येकी दोन आणि काँग्रेसकडे एका जागेवर निवडून येण्यासाठी लागणारी मते आहेत. त्यामुळे दहाव्या जागेवरील लढत चुरशीची होणार आहे.

हेही वाचा –सालगड्याचा मुलगा, राजकीय संघर्ष आणि नगरचं नेतृत्व; भाजपने पुन्हा दाखवला राम शिंदेंवर विश्वास

विधानपरिषदेसाठी किती मतांची आवश्यकता?

विधानपरिषदेवर निवडून येण्यासाठी एका उमेदवाराला २७ मतांची आवश्यकता आहे. भाजप आणि मित्रपक्ष यांचं संख्याबळ ११३ इतकं होत असल्यामुळे भाजपच्या चार जागा सहज निवडून येऊ शकतात. दुसरीकडे, महाविकास आघाडीतून शिवसेना आणि राष्ट्रवादीचेही प्रत्येकी दोन आमदार विधान परिषदेत जातील. तर काँग्रेसच्या वाट्याला एक जागा येईल. त्यानंतरही ज्यांच्याकडे पहिल्या पसंतीची मतं शिल्लक राहतील त्यांना दुसऱ्या उमेदवारासाठी १२ मतांची तजवीज करावी लागणार आहे.

प्रसाद लाड हे भाजपचे पाचवे उमेदवार आहेत. त्यांना निवडून येण्यासाठी महाविकास आघाडीच्या आमदारांची आणि अपक्षांची मतं मिळवावी लागणार आहेत. त्यामुळे दहाव्या जागेसाठी मोठी रस्सीखेच पाहायला मिळणार आहे.

विधानपरिषद निवडणुकीपूर्वी प्रसाद लाड यांनी घेतली राज ठाकरेंची भेट



Source link

Leave a Reply

Your email address will not be published.