परराष्ट्र मंत्रालयाचे स्पष्टीकरण

वृत्तसंस्था, नवी दिल्ली: सन १९६०पासून चीनने बळकावलेल्या भागात सध्या पूलउभारणी सुरू आहे, असे परराष्ट्र मंत्रालयाने शुक्रवारी स्पष्ट केले. लडाखमधील पँगाँग सरोवराच्या उत्तर किनाऱ्यावर चीन कायमस्वरूपी पूल बांधत असल्याचे उपग्रहाद्वारे मिळालेल्या फोटोंतून स्पष्ट झाले आहे. या पुलामुळे चीनला लष्करी हालचाली करणे सुलभ होणार असल्यामुळे चिंता व्यक्त करण्यात येत आहे.

त्या पार्श्वभूमीवर परराष्ट्र मंत्रालयाकडून वरील बाब स्पष्ट करण्यात आली. मंत्रालयाचे प्रवक्ते अरिंदम बागची म्हणाले, ‘अशा प्रकारे भूभाग बेकायदा बळकावण्यास भारताने कधीही मान्यता दिलेली नाही. पँगाँग सरोवराच्या परिसरात पूर्वी बांधलेल्या ठिकाणाशेजारीच नवा पूल उभारण्यात येत आहे.’

आपल्या सीमा सुरक्षित करण्यासाठी सीमाभागात पायाभूत सुविधांचे जाळे अधिक मजबूत करण्यावर आपण २०१४पासून भर देत आहोत, असे सांगून बागची म्हणाले, ‘या भागातील पायाभूत सुविधांचा विकास करण्यासाठी सरकार कटिबद्ध आहे. या सुविधांचा विकास झाल्याने केवळ संरक्षणसज्जता वाढणार नसून, भागाचा आर्थिक विकासही होईल. देशाच्या सार्वभौमत्वाला आणि प्रादेशिक एकतेचे रक्षण करण्यासाठी भारत सर्वतोपरी उपाय करील. सरकार या भागातील घडामोडींवर बारकाईने लक्ष ठेवून आहे.’



Source link

Leave a Reply

Your email address will not be published.