मुंबई: विधानपरिषद निवडणुकीत आपला दुसरा उमेदवार निवडून आणण्यासाठी सध्या राष्ट्रवादी काँग्रेसचे प्रमुख नेते चांगलेच सक्रिय झाले आहेत. यामुळे भाजपच्या गोटातील चिंता वाढली आहे. राज्यसभा निवडणुकीत हितेंद्र ठाकूर (Hitendra Thakur) यांच्या बहुजन विकास आघाडीच्या तीन आमदारांनी भाजपच्या (BJP) पारड्यात दान टाकले होते. मात्र, आता विधानपरिषद निवडणुकीत आपला उमेदवार निवडून आणण्यासाठी राष्ट्रवादी काँग्रेसकडून सातत्याने हितेंद्र ठाकूर यांची मनधरणी सुरू आहे. राष्ट्रवादी काँग्रेसचे उमेदवार रामराजे निंबाळकर (Ramraje Nimbalkar) यांनी काही दिवसांपूर्वीच हितेंद्र ठाकूर यांच्या विरारच्या घरी जाऊन त्यांची भेट घेतली होती. आम्ही दोघे अपक्ष आमदार असल्यापासून एकमेकांना ओळखतो, असेही निंबाळकर यांनी या भेटीनंतर म्हटले होते. त्यानंतरही राष्ट्रवादी काँग्रेसकडून हितेंद्र ठाकूर यांच्याशी सातत्याने बोलणी सुरु आहेत. आज एकनाथ खडसेही हितेंद्र ठाकूर यांच्या भेटीला गेले आहेत. खडसे आणि रामराजे निंबाळकर यांचा दीर्घ राजकीय अनुभव आणि राष्ट्रवादी काँग्रेसचे राजकीय वाटाघाटीतील कौशल्य पाहता विधानपरिषद निवडणुकीत बविआ भाजपची साथ सोडून महाविकास आघाडीच्या बाजूने जाईल, अशी चर्चा सुरु आहे. (Vidhanparisahd Election 2022)
चुकीला माफी नाही! मतदान करताना घोळ घातलात तर कारवाई होणार, शिवसेनेची आमदारांना तंबी

त्यामुळे भाजपच्या गोटातील चिंता वाढली आहे. भाजपला आपला पाचवा उमेदवार निवडून आणायचा असल्यास बविआची मतं अत्यंत महत्त्वाची आहेत. मात्र, ही मतं राष्ट्रवादी काँग्रेसला मिळू शकतात, अशी कुणकुण लागताच भाजप नेत्यांची धावाधाव सुरु झाली आहे. भाजपचे नेते प्रविण दरेकर आणि गिरीश महाजन यांनी शनिवारी विरारला जाऊन हितेंद्र ठाकूर यांची भेट घेतली. तत्पूर्वी प्रसाद लाड आणि निरंजन डावखरे यांनी ठाकूर यांची भेट घेतली होती. या सगळ्यांची मनधरणी कमी पडते की काय म्हणून देवेंद्र फडणवीस यांनीही हितेंद्र ठाकूर यांना फोन करुन त्यांच्याशी चर्चा केली. त्यामुळे सध्या बविआच्या मतांसाठी भाजप आणि राष्ट्रवादी काँग्रेस दोघांकडूनही प्रचंड जोर लावला जात असल्याचे दिसत आहे. मात्र, हितेंद्र ठाकूर कोणाच्या बाजूने कौल देणार हे सोमवारी निकालावेली स्पष्टच होईल.
विधानपरिषदेच्या मतदानाला उरले अवघे काही तास, फडणवीस भाजप आमदारांना स्ट्रॅटेजी सांगणार

फडणवीसांचा मास्टरप्लॅन ठरला

विधानपरिषद निवडणुकीत पाचव्या जागेवरील उमेदवार कसा निवडून आणायचा, यासाठी भाजपकडून रणनीती आखण्यात आली आहे. या रणनीतीबद्दल देवेंद्र फडणवीस (Devendra Fadnavis) संध्याकाळी सहा वाजता भाजप आमदारांना मार्गदर्शन करतील. राज्यसभा निवडणुकीत फडणवीस यांच्या अचूक व्यवस्थापनामुळे भाजपचे धनंजय महाडिक विजयी झाले होते. त्यामुळे आता विधानपरिषद निवडणुकीतही देवेंद्र फडणवीस तशीच कमाल करून दाखवणार का, हे पाहावे लागेल.



Source link

Leave a Reply

Your email address will not be published.