नवी दिल्लीः उद्धव ठाकरे (Uddhav Thackeray) आणि एकनाथ शिंदे (Eknath Shinde) यांच्या गटांत सध्या सुरू असलेल्या न्यायालयीन लढ्याचा पेच अधिकच वाढत चालला आहे. केंद्रीय निवडणूक आयोगाने सुरू केलेल्या कार्यवाहीविरोधात ठाकरे यांच्यामार्फत दाखल करण्यात आलेल्या याचिकेवर १ ऑगस्ट रोजी सुनावणी होणार होती. मात्र, ही सुनावणी पुढे ढकलण्यात आली आहे. ही महत्त्वाची सुनावणी ३ ऑगस्ट रोजी आता होणार आहे. (Eknath Shinde vs uddhav thackeray)

शिवसेनेचे पक्षचिन्ह असणारा धनुष्यबाण नेमका कोणत्या गटाचा आहे, हे निश्चित करण्यासाठी केंद्रीय निवडणूक आयोगाने सुरू केलेल्या कार्यवाहीविरोधात ठाकरे यांच्यामार्फत सर्वोच्च न्यायालयात याचिका दाखल करण्यात आली होती. सरन्यायाधीश एन. व्ही. रमणा यांच्या नेतृत्वाखालील खंडपीठासमोर १ ऑगस्ट रोजी सुनावणी होणार होती. मात्र ही सुनावणी आता ३ ऑगस्ट रोजी होणार आहे.

वाचाः संजय राऊतांवरील कारवाईने शिंदे गटात आनंद; बंडखोर आमदाराच्या वक्तव्याने भुवया उंचावल्या

केंद्रीय निवडणूक आयोगाच्या नोटिशीला स्थगिती देण्याच्या मागणीसाठी शिवसेनेने सुप्रीम कोर्टात धाव घेतली होती. सर्वोच्च न्यायालयात सध्या यासंबंधी काही याचिका प्रलंबित असल्याने निवडणूक आयोगाने सुरू केलेल्या कार्यवाहीस स्थगिती देणे गरजेचे आहे. न्यायालयापुढे असणाऱ्या याचिका निष्फळ ठरू नयेत,’ अशी विनंती ठाकरे गटातर्फे सिब्बल यांनी केली होती. दुसरीकडे शिवसेनेचे प्रतिनिधित्व करण्याचा अधिकार कोणत्या गटास आहे, पक्षचिन्ह कोणत्या गटास मिळायला हवे हे निश्चित करण्यासाठी निवडणूक आयोग कार्यवाही करत आहे’, असा युक्तिवाद शिंदे गटातर्फे एन. के. कौल यांनी केला. दोन्ही बाजूच्या वकिलांचे युक्तिवाद ऐकल्यानंतर ठाकरे गटाच्या निवडणूक आयोगाविरोधातील याचिकेवर १ ऑगस्ट रोजी सुनावणी घेण्यास खंडपीठाने संमती दर्शवली होती. मात्र, आता सर्वोच्च न्यायालयाने तीन ऑगस्ट ही नवी तारीख दिली आहे.

वाचाः पत्राचाळ प्रकरण नेमकं आहे तरी काय, ईडीने राऊतांची आत्तापर्यंत किती संपत्ती जप्त केली?

दरम्यान, आमच्या गटास ४० आमदार व १२ खासदारांचा पाठिंबा असून महाराष्ट्र विधानसभेचे अध्यक्ष तसेच, लोकसभेच्या अध्यक्षांनी आमच्या गटास अधिकृत गट म्हणून मान्यता दिली आहे. त्यामुळे धनुष्यबाण हे पक्षचिन्ह आमच्या गटास द्यावे, अशी विनंती महाराष्ट्राचे मुख्यमंत्री एकनाथ शिंदे यांनी निवडणूक आयोगास पत्राद्वारे केली होती. ठाकरे व शिंदे गटांकडून पक्षचिन्हावर दावा करण्यात आल्याने निवडणूक आयोगाने या दोन्ही गटांना ८ ऑगस्टपर्यंत आवश्यक कागदपत्रे जमा करण्याचे निर्देश दिले होते. यासाठी विधिमंडळ व पक्ष संघटनेच्या कार्यकारिणीची पत्रे आणि आपापले लेखी निवेदन सादर करावे असे आयोगाने दोन्ही गटांना सांगितले असल्याची माहिती आयोगातील सूत्रांनी दिली.

वाचाः शिंदे गटाच्या नेत्याला राऊतांवार विश्वास, म्हणाला, ‘संजय राऊत स्ट्राँग आहेत, ईडीला घाबरणार नाहीत’



Source link

Leave a Reply

Your email address will not be published.