मुंबई : राज्य मंत्रिमंडळाने आज आगामी महापालिका निवडणुकीसाठी महत्त्वाचा निर्णय घेतला आहे. राज्यातील आगामी स्थानिक स्वराज्य संस्था आणि महापालिका निवडणुका या २०१७ च्या प्रभाग रचनेप्रमाणेच होणार आहेत. मुख्यमंत्री एकनाथ शिंदे यांच्या अध्यक्षतेखाली झालेल्या आजच्या मंत्रिमंडळाच्या बैठकीत झालेल्या या निर्णयाने महाविकास आघाडीला खास करून शिवसेना आणि राष्ट्रवादीला मोठा दणका बसणार आहे.

शिवसेना, राष्ट्रवादी आणि काँग्रेस या महाविकास आघाडीच्या मुख्यमंत्री उद्धव ठाकरे सरकारने मुंबई महापालिकेतील नगरसेवकांची संख्या २२७ वरून नऊने वाढ २३६ केली होती. ठाकरे सरकारने २३६ वॉर्डवर शिक्कमोर्तब करून निवडणूक आयोगाला माहिती दिली. निवडणूक आयोगानेही २३६ नगरसेवकांची संख्या आणि प्रभाग रचना निश्चितीची अधिसूचना जारी केली होती.

निवडणूक आयोगाने यापूर्वी मुंबई महापालिकेला प्रभागनिश्चिती आणि वाढीव सदस्य संख्येसाठी समिती स्थापन करण्याचे आदेश दिले होते. त्यानुसार पालिकेने समिती नेमून नवीन प्रभाग रचनेवर हरकती व सूचना मागवल्या होत्या. आलेल्या सूचना व हरकतींचा अहवाल समितीने राज्य निवडणूक आयोगाकडे दाखल केला होता. त्यानंतर आयोगाने जुन्या २२७ सदस्य संख्येत नऊने वाढ झालेली २३६ सदस्य संख्या आणि प्रभाग सीमारेषांची अंतिम अधिसूचना जाहीर केली होती.

मुंबई महापालिकेत शिवसेनेची सत्ता आहे. वाढवलेले नऊ प्रभाग हे शिवसेनेने आपल्या पथ्यावर पडले होते, असा आरोप काँग्रेसने केला होता. नऊ प्रभागापैकी तीन प्रभाग हे शहर भागात, तीन पश्चिम उपनगरात आणि तीन पूर्व उपनगरात वाढवले होते. शहरातील तीन प्रभाग हे वरळी, परळ आणि भायखळामध्ये, पश्चिम उपनगरात वांद्रे, अंधेरी, दहिसरमध्ये आणि पूर्व उपनगरात कुर्ला, चेंबर, गोवंडीत वाढवले होते. या वाढीव ९ पैकी ६ वॉर्ड हे शिवसेनेचे बालेकिल्ले समजले जातात. आता मुख्यमंत्री शिंदे यांनी वाढीव सर्व नऊ वॉर्ड रद्द करून एकूण २२७ हीच आधीची संख्या ठेवली आहे. यामुळे शिवसेनेला मोठा दणका बसला आहे. कारण वाढीव वॉर्डमुळे शिवसेनेच्या नगरसेवकांची संख्या वाढून महापालिकेत बळ वाढले असते. पण आता ही शक्यता नाही.

महापालिका निडणुकांबाबत शिंदे सरकारचा मोठा निर्णय; ठाकरे सरकारचा प्रभाग रचनेचा निर्णय फिरवला

पुण्यात राष्ट्रवादीलाही बसला दणका

मुंबईत शिवसेनेने आणि पुण्यात राष्ट्रवादीने आपल्या सोयीनुसार प्रभाग रचना केल्याचा आरोप करत काँग्रेसने कोर्टात धाव घेतली होती. काँग्रेस प्रदेशाध्यक्ष नाना पटोले यांनी त्यावरून शिवसेना आणि राष्ट्रवादीवर जोरदार आरोप केला होता. दोनच्या प्रभागाची मागणी असताना तीनचे प्रभाग करण्यात आले. शिवसेनेने मुंबईत आणि पुण्यात राष्ट्रवादीने आपल्या सोयीनुसार प्रभाग रचना केली, असा घणाघात केला नाना पटोले यांनी केला होता. मुंबईसोबतच आता पुण्यातील प्रभाग रचानाही बदलली आहे. यामुळे शिंदेच्या निर्णयाने राष्ट्रवादीलाही पुण्यात मोठा धक्का बसणार आहे.

आतापर्यंत शिवसेना फोडली, आता संपविण्याचा डाव, पण आव्हानं पायदळी तुडवून भगवा फडकवू: उद्धव ठाकरे



Source link

Leave a Reply

Your email address will not be published.