म. टा. विशेष प्रतिनिधी, नवी दिल्ली

नॅशनल हेराल्डशी संबंधित कथित मनी लाँड्रिंग प्रकरणी सक्तवसुली संचालनालयाने (ईडी) बुधवारी सायंकाळी नवी दिल्लीतील नॅशनल हेराल्डच्या इमारतीतील यंग इंडियाचे कार्यालय सील केले. येत्या शुक्रवारी, ५ ऑगस्ट रोजी काँग्रेस पक्षाने वाढत्या महागाई आणि बेरोजगारीविरोधात पंतप्रधानांच्या निवासस्थानाला काँग्रेसने घेराव घालण्याची तयारी केली असून, त्यावर घाबरलेल्या मोदी सरकारची ही प्रतिक्रिया असल्याचे काँग्रेसने म्हटले आहे.

ईडीच्या अधिकाऱ्यांनी सायंकाळी आयटीओ येथील हेराल्ड हाऊसच्या चौथ्या मजल्यावर असलेल्या यंग इंडियाचे कार्यालय सील केले. पुरावे सुरक्षित ठेवण्यासाठी हे कार्यालय सील करण्यात आल्याचे ईडीच्या सूत्रांचे म्हणणे आहे. मात्र, नॅशनल हेराल्डचे कार्यालय सील करण्यात आलेले नसल्याचे रात्री एका ट्वीटद्वारे नॅशनल हेराल्ड व्यवस्थापनाने स्पष्ट केले. लवकरच २४, अकबर रोड येथील काँग्रेस मुख्यालयावरही ईडी छापा घालणार असल्याचे वृत्त पसरले. अकबर रोडवर मोठ्या प्रमाणावर पोलिस तैनात करून हा रस्ता बंद करण्यात आल्यामुळे या चर्चेला उधाण आले. कर्नाटकहून दिल्लीला परतणारे राहुल गांधी यांनाही नॅशनल हेराल्ड प्रकरणी अटक करण्यात येईल, अशीही चर्चा सुरू होती. यंग इंडियाचे कार्यालय सील केले जात असताना सोनिया गांधी यांच्या १०, जनपथ निवासस्थानासमोर प्रचंड पोलिस बंदोबस्त ठेवण्यात आला होता. यंग इंडियाचे कार्यालय सील केल्याचे वृत्त ऐकून राहुल गांधी आपला दोन दिवसांचा कर्नाटक दौरा अर्धवट सोडून रात्री अकरा वाजता दिल्लीला परतले. त्यांचे निवासस्थान असलेल्या तुघलक लेन भागातही पोलिस बंदोबस्त होता. नॅशनल हेराल्डवर केलेल्या कारवाईच्या निषेधार्थ काँग्रेसजनांनी आक्रमक होऊ नये म्हणून हा पोलिस बंदोबस्त लावण्यात आल्याचे म्हटले जात होते.

00

‘विनाशकाले विपरित बुद्धी’

म. टा. विशेष प्रतिनिधी, नवी दिल्ली

‘यंग इंडिया’चे कार्यालय सील करण्याची मोदी सरकाने केलेली कारवाई म्हणजे म्हणजे विनाशकाले विपरित बुद्धी असल्याची टीका काँग्रेसचे प्रवक्ते अजय माकन यांनी बुधवारी पत्रकार परिषदेत केली.

‘जनतेच्या मुद्द्यांवर आवाज उठवू नये म्हणून भाजप सरकार आम्हाला घाबरवत आहे. शुक्रवारी, ५ ऑगस्ट रोजी पंतप्रधानांचे निवासस्थान तसेच विविध राज्यांतील राज्यपालांच्या निवासस्थानांचा घेराव घालण्याच्या आंदोलनाची काँग्रेसने घोषणा केली आहे. दिल्ली पोलिसांनी आम्हाला आंदोलन करण्याची परवानगी नाकारली आहे. महागाई आणि बेरोजगारीसारख्या ज्वलंत मुद्द्यांवरून लोकांचे लक्ष उडविण्यासाठी भाजप सुडाचे राजकारण करीत आहे. पण काँग्रेस पक्ष घाबरणार नाही,’ असे माकन म्हणाले. काँग्रेस मुख्यालय आणि १० जनपथचे पोलिसांच्या छावणीत रूपांतर करणे ही अघोषित आणीबाणी असल्याची टीका राजस्थानचे मुख्यमंत्री अशोक गहलोत यांनी केली.



Source link

Leave a Reply

Your email address will not be published.