मुंबई: करोना काळात घरी बसलेल्या प्रेक्षकांना खिळवून ठेवण्यासाठी वेबविश्वानं भरघोस आशयाची निर्मिती केली. कालांतरानं प्रदर्शित करण्यात येणाऱ्या सीरिजही ऐन वेळी प्रदर्शित केल्या गेल्या. कारण प्रेक्षकांना सीरिजकडे आकर्षित करणं, हे त्यावेळी ओटीटीसमोर (ओव्हर द टॉप) आव्हान होतं. पण हळूहळू टाळेबंदी काढण्यात आल्यावर प्रेक्षक पुन्हा मोठ्या आणि छोट्या पडद्याकडे वळू लागले. परिणामी, सीरिजना कमी व्ह्यूज मिळू लागले. गेल्या सात महिन्यांचा आढावा घेतल्यास मोजक्या सीरिजना लाखोंमध्ये व्ह्यूज मिळाले, इतरांच्या पदरी निराशाच पडली. त्यामुळे ओटीटीवाल्यांच्या टेन्शनमध्ये वाढ झाली. त्यामुळे आता पूर्वी गाजलेल्या सीरिजचे पुढचे सीझन आणण्याचा फंडा आजमावून बघितला जातोय. येत्या तीन-चार महिन्यांत अनेक सीरिजचे पुढचे सीझन प्रेक्षकांच्या भेटीला येणार आहेत.

हे वाचा-पुण्यातील झोपडपट्टीत बालपण, अभिनयासाठी मुंबई गाठली; प्रसिद्ध वेबसीरिजमध्ये मिळवलं काम

‘दिल्ली क्राइम’मधील शेफाली शहाच्या अभिनयाचं कौतुक झालं. आता लवकरच या सीरिजचा दुसरा सीझन येणार आहे. या नव्या सीझनमध्ये महिला पोलीस अधिकारी वर्तिका कोणती केस हातात घेणार आहे, हे पाहणं औत्सुक्याचं ठरणार आहे. तर ‘स्कॅम २००३’ हा तेलगी प्रकरणावरील सीझनही येणार आहे. मराठमोळा अभिनेता अमेय वाघ, अर्शद वारसी आणि बरुन सोबती स्टारर ‘असूर’ या सीरिजच्या सीझननं प्रेक्षकांचं लक्ष वेधून घेतलं होतं.


लग्न जुळवण्याच्या पद्धतीवर भाष्य करणारी ‘इंडियन मॅचमेकिंग’ ही सीरिज लोकप्रिय ठरली होती. याचाही दुसरा सीझन लवकरच प्रेक्षकांच्या भेटीला येणार आहे. याप्रमाणे, ‘मिसमॅच २’, ‘जमतारा’, ‘द फॅब्युलस लाइफ ऑफ बॉलिवूड वाइफ्स २’ आणि ‘मेड इन हेवन २’ यासारख्या अनेक सीरिजचे पुढचे सीझन या वर्षाच्या अखेरीसपर्यंत प्रेक्षकांच्या भेटीला येणार आहेत. काही दिवसांपूर्वी ‘शी २’ आणि ‘मसबा मसबा २’ या सीरिज प्रदर्शित झाल्या.

हे वाचा-VIDEO: नगरविकास शिवाय मुख्यमंत्री म्हणजे… सीरीजमधला डायलॉग तूफान व्हायरल

अलीकडे प्रदर्शित झालेल्या सीरिजना मिळालेलं अपयश पाहता ओटीटीविश्वानं आधी लोकप्रिय झालेल्या सीरिजचे पुढचे सीझन काढण्याची शक्कल लढवली आहे. आता प्रेक्षकांना ओटीटीकडे खेचून घेण्याचा वेबविश्वाचा हा प्रयत्न प्रेक्षकांच्या पचनी पडतो का हे सीरिजच्या आशयावर अवलंबून आहे. त्यामुळे आता पहिल्या सीझनला मिळालेलं यश दुसऱ्या सीझनला मिळणार का, हे येणारी वेळच ठरवेल.

वेब सीरिज अभ्यासक अमोल उद्गीरकर म्हणतात की, ‘पहिल्या सीझनचा ठरलेला प्रेक्षकवर्ग असतो, तोच पुढच्या सीझनकडे वळतो. पहिल्या सीझनच्या ‘गुड विल’चा वापर करणं, ही वेबविश्वाची रणिनीती ठरलेली असते. मग पुढे जाऊन पुढचा सीझन पसंतीस उतरो न उतरो, पण प्रेक्षक मिळालेले असतात.’





Source link

Leave a Reply

Your email address will not be published.