मुंबई : “पत्रा चाळ घोटाळ्यात प्रविण राऊत हा मोहरा केवळ नावाला होता. या घोटाळ्याचे खरेखुरे सूत्रधार संजय राऊत हेच आहेत. आमच्याकडे याप्रकरणाचे सबळ पुरावे आहेत, याबद्दलची आणखी काही माहिती आम्हाला राऊतांना विचारायची आहे. त्यासाठी आम्हाला राऊतांची ८ दिवसांची ईडी कस्टडी द्या”, असा युक्तिवाद सुरुवातीलाच ईडीच्या अधिकाऱ्यांनी केला. त्यावर “मुळात ही केसच खोटे पुरावे बनवून तयार केली गेली आहे”, असं ठामपणे सांगत याआधीही मुंबई आर्थिक गुन्हे शाखेने या प्रकरणाची चौकशी केली होती, त्यात कोणताही गैरव्यवहार झालं नसल्याचं निष्पन्न झालं होतं. मग तरीही राज्यातल्या सत्तांतरानंतर अगदी एक महिन्यात राऊतांवर कारवाई का, या कारवाईचं टायमिंग काय सांगतं? असा खडा सवाल संजय राऊतांच्या वकिलांनी कोर्टासमोर उपस्थित केला. तसेच राऊतांचे विविध व्यवसाय आहेत. त्यामाध्यमातून त्यांनी प्रॉपर्टी कमवली आहे. याचे सगळे कागदपत्र आम्ही द्यायला आहोत. राऊतांनी ईडीला सहकार्य केलंय, त्यांची सहकार्याचीच भावना आहे, असंही राऊतांच्या वकिलांनी न्यायालयाला सांगितलं. राऊतांचे वकिल अॅड. मुंदरगी आणि ईडीच्या वकिलांनी जोरदार युक्तिवाद केले. अखेर कोर्टाने दोन्ही बाजूंचे युक्तिवाद ऐकल्यानंतर संजय राऊतांना ४ ऑगस्टपर्यंतची कोठडी सुनावली. त्यामुळे राऊतांची अधिकाधिक चौकशी करुन पुन्हा ४ तारखेला राऊतांची कस्टडी वाढवून मागण्याचा ईडी प्रयत्न करेल.

संजय राऊतांचे विविध व्यवसाय असल्याने वैध मार्गातून त्यांनी प्रॉपर्टी जमा केली आहे. संजय राऊतांवर राजकीय आकसातून ही कारवाई होतीये, असा आरोप राऊतांचे वकील अॅड मुंदरगी यांनी केला. त्यावर ईडी वकिलांनी राऊतांच्या संपत्तीच्या अनुषंगाने २ सवाल करत राऊतांच्या वकिलांची कोंडी केली. “संजय राऊतांचे परदेश दौरे विविध बिझनेसमन कसे स्पॉन्सर करतात? आणि प्रवीण राऊत हे संजय राऊतांना दर महिन्याला दोन लाख कोणत्या कारणामुळे देत होते?” असे सवाल ईडीच्या वकिलांनी विचारले.

*** कोर्टात काय काय घडलं?

ईडी वकिलांचा युक्तिवाद

पहिल्यांदा ईडीच्या वकिलांनी युक्तिवाद केला. यामध्ये संजय राऊतच पत्रा चाळ घोटाळ्याचे मुख्य सूत्रधार असल्याचं ईडी वकिलांनी ठामपणे सांगितलं. तसेच संजय राऊतांचे परदेश दौरे आणि प्रवीण राऊतांचं फंडिंग याचा आवर्जून उल्लेख ईडी वकिलांनी केला. राऊतांनी दोन साक्षीदारांना धमकावल्याचं ईडीच्या वकिलांनी न्यायालयाला सांगितलं. संजय राऊत यांना जर बेल मिळाली तर ते पुन्हा धमकाविण्याचं किंवा त्यापुढे जाऊन कृत्य करु शकतात, त्यामुळे त्यांना आठ दिवसांची कोठडी मिळावी, अशी मागणी ईडीच्या वकिलांनी केली. तसेच राऊत यांचे परदेश दौरे बिझनेसमन आणि विविध लोकांकडून पुरस्कृत केले जातात, याचं नेमकं कारण काय? असा सवाल करत प्रवीण राऊत हे संजय राऊतांना दर महिन्याला २ लाख देत होते, ते कशासाठी? असा प्रश्नांची सरबत्ती करत ईडीच्या वकिलांनी राऊतांच्या कोठडीसाठी ठाम युक्तिवाद केला.

राऊतांच्या वकिलांचा युक्तिवाद

ईडी सध्या राजकीय दबावाखाली काम करत असून संजय राऊत यांच्यावरील कारवाई हा त्याचाच भाग आहे. संजय राऊत यांच्या काही कंपन्या आहेत. त्यातून त्यांच्याकडे वैध मार्गातून पैसा आला आहे. त्यातूनच सर्व संपत्ती मिळवली आहे, असं सांगत ईडीचे सर्व आरोप राऊतांच्या वकिलांनी फेटाळून लावले.

याचप्रकरणाचा मुंबईच्या आर्थिक गुन्हे शाखेने २०२२ मध्ये केला. तेव्हा त्यांना यामध्ये कोणतंही गैरकृत्य आढळले नाही. पण राज्यात एक महिन्यानंतर सत्तांतर झालं की लगेच कारवाई कशी झाली असा सवाल करत राजकीय आकसापोटी कारवाई केली जात असल्याचं राऊतांच्या वकिलांनी नि:क्षून सांगितलं. संजय राऊतांनी ईडीला सगळ्या गोष्टीत सहकार्य केलंय. ८ दिवसांच्या ईडी कोठडीची गरज काय?, ते हर्ट पेशंट आहेत. त्यामुळे त्यांना कमीत कमी दिवसांची रिमांड द्यावी, असा युक्तिवाद संजय राऊत यांचे वकील अॅड. मुंदरगी यांनी केला.

कोर्टाचं निरीक्षण

संजय राऊत आम्हाला चौकशीत सहकार्य करत नाही म्हणून आम्ही त्यांच्या घरी छापा टाकला, असं ईडी वकिलांनी कोर्टाला सांगितलं. त्यावर कोर्टाने आक्षेप नोंदवत “राऊतांनी चौकशीला गैरहजर राहण्याचं कारण अगोदरच ईडीला सांगितलं होतं. त्यामुळे ते चौकशीला सहकार्य करत नाहीत, असं म्हणणं चुकीचं आहे”, अशा शब्दात न्यायमूर्ती एम जी देशपांडे यांनी ईडीच्या वकिलांना फटकारलं.

तसेच ईडीच्या वकिलांनी ८ दिवसांची कस्टडी मागितलेली असताना न्यायालयाने ती अमान्य करत राऊतांना ४ ऑगस्टपर्यंतच कोठडी सुनावली. यादरम्यान राऊतांना जेलमध्ये काही मुभाही देण्यात आल्या आहेत. राऊतांना घरचं जेवण आणि औषध देण्याची मुभा असेल तसेच सकाळी साडे आठ ते साडे नऊ वाजेदरम्यान राऊत वकिलांना भेटू शकतात. सगळ्यात महत्त्वाचं म्हणजे राऊत हर्ट पेशंट असल्याने रात्री साडे दहा नंतर राऊतांची चौकशी करण्याला ईडी अधिकाऱ्यांना कोर्टाने मज्जाव केला आहे.



Source link

Leave a Reply

Your email address will not be published.