म. टा. खास प्रतिनिधी, मुंबईः विधान परिषदेच्या निवडणुकीसाठी महाविकास आघाडीच्या तिन्ही पक्षांचे आमदार निवडून आणण्यासाठी कोट्याचा फॉर्म्युला रविवारी रात्री उशिरा निश्चित करण्यात आला, अशी माहिती सूत्रांनी दिली. मुख्यमंत्री उद्धव ठाकरे यांच्या अध्यक्षतेखाली वर्षा निवासस्थानी पार पडलेल्या बैठकीत शिवसेनेकडील अतिरिक्त मतांबाबत सविस्तर चर्चा करून फॉर्म्युला ठरविण्यात आला, अशी माहिती काँग्रेसच्या एका ज्येष्ठ नेत्याने दिली.

विधान परिषद निवडणुकीच्या पार्श्वभूमीवर मुख्यमंत्री उद्धव ठाकरे यांनी रविवारी रात्री महाविकास आघाडीच्या नेत्यांची बैठक घेतली. या बैठकीला राष्ट्रवादीचे उपमुख्यमंत्री अजित पवार, प्रदेशाध्यक्ष जयंत पाटील, काँग्रेसचे नेते आणि महसूलमंत्री बाळासाहेब थोरात, प्रदेशाध्यक्ष नाना पटोले, सार्वजनिक बांधकाममंत्री अशोक चव्हाण, शिवसेनेचे अॅड. अनिल परब आदी उपस्थित होते, अशी माहिती सूत्रांनी दिली. मुख्यमंत्र्यांच्या उपस्थितीत पार पडलेल्या बैठकीनंतर काँग्रेसच्या नेत्यांची विशेष बैठक पार पडली. रात्री उशिरा या सर्व नेत्यांनी पुन्हा एकदा वरळी येथील पंचतारांकित हॉटेलमध्ये वास्तव्यास असलेल्या आमदारांना मार्गदर्शन केल्याचे समजते. या बैठकीत ठरल्यानंतर सर्व आमदारांना सूचना देण्यात आल्या असून त्यानुसार आमदार सोमवारी मतदान करतील, अशी माहितीही सूत्रांनी दिली.

वाचाः विधान परिषदेसाठी आज मतदान; महाविकास आघाडीची प्रतिष्ठा पणाला

मी आघाडीसोबत नव्हे, तर राष्ट्रवादीसोबत

राज्यसभा निवडणुकीदरम्यान अपक्षांच्या मतदानावरून शिवसेनेचे संजय राऊत यांनी काही अपक्ष आमदारांची उघडपणे नावे घेत नाराजी व्यक्त केली होती. संजय राऊत यांच्या या वक्तव्यानंतर नांदेड येथील लोह्याचे अपक्ष आमदार श्यामसुंदर शिंदे यांनी उघडपणे नाराजी व्यक्त केली. आपण महाविकास आघाडीसोबत नसून राष्ट्रवादी काँग्रेससोबत असल्याचे त्यांनी रविवारी जाहीर केले.



Source link

Leave a Reply

Your email address will not be published.