वृत्तसंस्था, ढाकाः तुम्ही गाता का? आणि बरे गाता का? पण, जर बरे गात नसाल आणि काही कारणांनी बांगलादेशला जाणार असाल तर चुकूनही तिकडे तुमच्या गाण्यातला साऽऽऽ लावू नका. कारण तुमचा सूर चुकला तर कदाचित तेथील पोलिस तुमची गठडी वळतील आणि मग तुम्हाला तेथील तुरुंगात बे-सुरांच्या नावाने बोटे मोडत बसावे लागेल. विश्वास बसत नसेल तर हीरो अलोमला विचारा…

हीरो अलोम… बांगलादेशातील प्रसिद्ध गायक. फेसबुकवर त्याचे जवळपास २० लाख पाठीराखे, नि यू ट्यूबवर १५ लाख चाहते. त्याचे गाण्यांचे अल्बम कमालीचे लोकप्रिय आहेत. मध्यंतरी त्याचे अरेबियन सॉँग या गाण्यात तो अरबाच्या वेशात अवतरला होता आणि त्याच्या आजूबाजूला तांत्रिक करामतींनी उंट बागडत होते. त्याचे हे गाणे किती जणांना पाहिले असेल? काही कल्पना? तब्बल एक कोटी ७० लाख लोकांनी! या अशा गायकावर गजांआड होण्याची वेळ का यावी?

त्याचे झाले असे की, हा हीरो लोकप्रिय वगैरे असला तरी त्याचा आवाज सुरांच्या व्याकरणातून पाहू गेल्यास तसा बेसूरच. गाण्याची वेगळीच पद्धत, हा त्याच्या लोकप्रियतेचा आधार. जोवर तो साधीसुधी गाणी गात होता तोवर ठीक होते. पण त्याने गेल्या आठवड्यात गाणी निवडली ती रविंद्रनाथ टागोर व काझी नझरूल इस्लाम यांची. या दोघांच्या कवितांना, गाण्यांना, साहित्याला बांगलादेशात मोठा मान. तर, गेल्या आठवड्यात एके दिवशी भल्या सकाळी हे हीरो महाशय आपल्या घरी टागोर व इस्लाम यांची शास्त्रीय गाणी आळवीत होते. तर त्यांच्या दारावर थाप पडली. दार उघडून पाहतात तो समोर पोलिस. ‘अहो साहेब, किती बेक्कार गाताय तुम्ही. बेक्कार गायक आहात तुम्ही. बंद करा ते तुमचे गाणे…’ असे म्हणत पोलिस हिरोला थेट पोलिस ठाण्यात घेऊन गेले नि तिथे त्याला गजांआडच केले. तब्बल आठ तासांनी पोलिसांनी त्याला सोडले तेही टागोर व इस्लाम यांची गाणी गायल्याबद्दलचा माफीनामा सादर केल्यावर.

पण अशाने ऐकेल तो हीरो कसला. त्याने सोशल मीडियावर त्याची कैफियत मांडली. त्यावर चाहत्यांनीही त्याला भरघोस पाठिंबा दिला. त्याही पुढे जात हीरोने आणखी एका गाण्याचा व्हीडोओ सोशल मीडियावर टाकला. या गाण्यात हीरो कैद्याच्या कपड्यांत दिसतो. त्या गाण्यातील भावना अशी की… ‘मी आता फासावर जाणार आहे’.

या गाण्यावर पोलिसांनी अद्याप तरी काही कारवाई केलेली नाही…

यांना बांगलादेशात धाडा!

हीरो याच्यावर झालेल्या कारवाईवर सोशल मीडियावर वेगवेगळे सूर उमटले. काही निषेधाचे… काही टवाळीचे. काही जणांनी तर, ‘अमका अमका बेक्कार गातो… अमकी बेक्कार गाते… त्यांना बांगलादेशात धाडा पाहू’, असा सल्ला देऊन टाकला





Source link

Leave a Reply

Your email address will not be published.