नवी दिल्ली- हरियाणा पोलिसांच्या विशेष टास्क फोर्सने सोमवारी गाझियाबाद येथून सुमारे ३० वर्षांपासून हरियाणात फरार असलेल्या आणि २५,००० रुपयांच्या बक्षीस गुन्हेगाराला अटक केली. आरोपी ओमप्रकाश उर्फ पासा हा खऱ्या आयुष्यात अभिनेता आहे. तो २००७ पासून भोजपुरी सिनेमांमध्ये काम करत आहे. तशकार, दबंग छोरा, झटका यासह जवळपास २८ सिनेमांत त्याने आतापर्यंत काम केलं आहे. आरोपी पानिपत जिल्ह्यातील नारायणा गावचा रहिवासी आहे. ओमप्रकाश हा गाझियाबादच्या हरबन्स नगरमध्ये नाव बदलून बऱ्याच दिवसांपासून राहत होता.

विशेष म्हणजे फरारी गुन्हेगार ओमप्रकाश उर्फ पाशा हा माजी सैनिक असल्याचे पोलिसांनी सांगितले. त्याला १९८८ मध्ये सेवेतून बडतर्फ करण्यात आले. त्यानंतर नाव बदलून पासा गाझियाबादच्या हरबन्स नगरमध्ये राहत होता. खून आणि चोरीच्या विविध गुन्ह्यांमध्ये पोलीस त्याचा शोध घेत असल्याचं अधिकाऱ्यांनी सांगितलं. गुप्तचरांच्या माहितीच्या आधारे एसटीएफने त्याला गाझियाबादमधील हरबन्स नगर येथून अटक केली.

१९८६ मध्ये त्यांने पहिल्यांदा गुन्हेगारीच्या जगात पाऊल ठेवले

पोलिसांनी सांगितले की, ओमप्रकाश उर्फ पासा हा लष्करात हवालदार होता. १९८४ मध्ये लष्कराच्या सिग्नल कॉर्प्समधून गैरहजर राहिल्यानंतर त्याने गुन्हेगारीच्या विश्वात प्रवेश केला आणि १९८६ पासून तो गुन्हे करू लागला. त्याची सेवा लष्कराने १९८८ मध्ये संपुष्टात आणली होती. यानंतर १५ जानेवारी १९९२ रोजी पासाने भिवानीच्या मुबारिकपूर येथील रहिवासी धरमसिंग याला लुटण्याच्या उद्देशाने भोसकले आणि पळून गेला. याप्रकरणी त्याच्याविरुद्ध भिवानी सदर पोलीस ठाण्यात गुन्हा दाखल करण्यात आला होता.

नाव बदलून दुसरे लग्न

खून करून आरोपी फरार झाला होता. त्यानंतर तो गाझियाबादला गेला आणि तिथेच राहू लागला. तिथे त्याने आपलं नावही बदललं. पाशाने गाझियाबादमध्ये दुसरं लग्नही केलं. त्याला तीन मुलं आहेत. पोलिसांना याची माहिती मिळताच एसटीएफचे पथक तात्काळ गाझियाबादला पोहोचले आणि पकडून त्याला भिवानी सदर पोलीस ठाण्याच्या ताब्यात देण्यात आले. आरोपीवर हरियाणातील सोनपत, पानिपत जिल्ह्यात कार आणि दुचाकी चोरीसह खुनाचे गुन्हे दाखल आहेत. याशिवाय राजस्थानमध्येही त्याच्यावर दोन गुन्हे दाखल आहेत.



Source link

Leave a Reply

Your email address will not be published.