अहमदनगर: मांत्रिकाच्या सांगण्यावरून आजारी बहिणीवर उपचार करण्यासाठी मागासवर्गीय समाजातील महिलेला डोक्याचे केस मागणे दोघांना चांगलेच महागात पडले आहे. महिलेने तक्रार केल्याने दोघांविरुद्ध महाराष्ट्र नरबळी, इतर अमानुष, अनिष्ट व अघोरी प्रथा व जादुटोणा प्रतिबंध कायद्यासह अनुसूचित जाती जमाती अत्याचार प्रतिबंधक (अट्रोसिटी) कायद्यान्वयेही त्यांच्याविरूद्ध गुन्हा दाखल करून त्यांना अटक करण्यात आली आहे. संगमनेर तालुक्यातील मालुंजे या गावात अंधश्रद्धेतून हा प्रकार घडला आहे.

संतोष विठोबा निठवे (रा. डिग्रस, ता. संगमनेर) व भाऊसाहेब रामा कुदनर (रा. शिंदोडी, ता. संगमनेर) अशी आरोपींची नावे आहेत. यासंबंधी मिळालेली माहिती अशी की आरोपी निठवे बहीण आजारी असल्याने तिला रुग्णालयात नेण्याऐवजी ते मांत्रिकाकडे उपचार करीत होते. तिच्यावर उपचार करण्यासाठी मागासवर्गीय महिलेच्या डोक्याचे केस हवे असल्याचे मांत्रिकाने सांगितले. त्यामुळे आरोपी गावातील एका मागासवर्गीय महिलेच्या घरी गेले. तेव्हा तिची सून घरी होती. सासू शेतात काम करीत होती. सुनेकडून केस न मिळाल्याने सायंकाळी ते दोघे पुन्हा तेथे गेले. त्यांनी त्या महिलेला कारण सांगून डोक्यावरील केस देण्याची मागणी केली. त्यावर महिलेने नकार दिला. नाइलाजाने ते दोघे तेथून निघून गेले.

वाचाः मोठी बातमी! नाशिकमध्ये शिवसेनेच्या गडाला हादरे; डझनभर माजी नगरसेवक शिंदे गटाच्या संपर्कात

मात्र, त्यांनी पाठपुरावा सोडला नाही. आरोपींनी त्या महिलेच्या मुलाला फोन केला. त्याला संतोष निठवे याने आपली बहीण आजारी असून तुमच्या घरातील महिलेच्या डोक्याचे केस हवे आहेत, असे सांगितले. त्या महिलेच्या मुलाने त्यांना घरी बोलावून घेतले. तोपर्यंत गावातील प्रतिष्ठीत लोकांनाही बोलावून घेतले. ठरल्याप्रमाणे हे दोघे सायंकाळी त्या महिलेच्या घरी गेले. त्यांना वाटले की केस मिळतील. मात्र, तेथे आलेल्या प्रतिष्ठीत नागरिकांनी त्यांचीच उलट तपासणी घेतली. अशा पद्धतीने उपचार करणे चुकीचे असून संबंधित महिलेकडे केस मागणे हे अपमानजनक आहे. त्यामुळे त्या महिलेचा व तिच्या कुटुंबियांचा अवमान होवून त्यांच्या भावना दुखावल्या गेल्या आहे, असे त्यांना सांगण्यात आले.

वाचाः करोना काळात ‘चार्टर्ड’ विमानांनी प्रवास केलाचा आरोप; नितीन राऊतांनी दिलं उत्तर

त्यानंतर संबंधित महिलेने दुसऱ्या दिवशी संगमनेर तालुका पोलीस ठाण्यात फिर्याद दिली. पोलिसांनी संतोष विठोबा निठवे (रा. डिग्रस, ता. संगमनेर) व भाऊसाहेब रामा कुदनर (रा. शिंदोडी, ता. संगमनेर) या दोघांविरुद्ध महाराष्ट्र नरबळी आणि इतर अमानुष, अनिष्ट व अघोरी प्रथा व जादुटोणा प्रतिबंधक अधिनियम तसेच अनुसूचित जाती जमाती अत्याचार प्रतिबंधक अधिनियमानुसार गुन्हा दाखल केला. उपविभागीय पोलीस अधिकारी राहुल मदने यांच्याकडे तपास सोपविण्यात आला असून दोन्ही आरोपींना अटक करण्यात आली आहे. त्यांना न्यायालयाने १४ दिवसांची न्यायालयीन कोठडी दिली आहे.

वाचाः मुख्यमंत्र्यांची ४० आमदारांसह आज दिल्लीवारी; केंद्रीय मंत्र्यांच्या गाठीभेटी घेणार



Source link

Leave a Reply

Your email address will not be published.