अनधिकृत फेरीवाल्यांचा त्रास सहन करून लोकलमधून तमाम रेल्वे प्रवासी रोजच प्रवास करतात. महिला डब्यातही या फेरीवाल्यांचा सर्रास वावर असतो.

 

mumbai-local-news
म. टा. प्रतिनिधी, मुंबईः अनधिकृत फेरीवाल्यांचा त्रास सहन करून लोकलमधून तमाम रेल्वे प्रवासी रोजच प्रवास करतात. महिला डब्यातही या फेरीवाल्यांचा सर्रास वावर असतो. अशाच एका फेरीवाल्याने २१ वर्षीय विद्यार्थिनीचा विनयभंग केल्याचा धक्कादायक प्रकार उघडकीस आला आहे. सोमवारी रात्री याप्रकरणी गुन्हा दाखल झाल्यानंतर कुर्ला रेल्वे पोलिसांनी एका रात्रीत सीसीटीव्ही फुटेजच्या मदतीने आरोपीच्या मुसक्या आवळल्या आहेत.

नर्सिंगच्या अभ्यासक्रमात दुसऱ्या वर्षाचे शिक्षण घेणाऱ्या या विद्यार्थिनीने सोमवारी सकाळी नेहमीप्रमाणे मुलुंड स्थानकातून लोकलच्या महिला डब्यातून प्रवास सुरू केला. लोकलमध्ये गर्दी असल्याने ती आसनाजवळ उभी राहिली. लोकल कुर्ला स्थानकात पोहोचताच महिलांचे शृंगाराचे साहित्य अर्थात टिकल्या, बांगड्या आणि केसांना लावायचे चाप विकणाऱ्या फेरीवाल्याने डब्यात प्रवेश केला. प्रवेश करताना त्या फेरीवाल्याने विद्यार्थिनीला धक्का दिला. मात्र हा धक्का चुकून लागल्याचे त्याने सांगितले. कुर्ला स्थानकानंतर बऱ्यापैकी गर्दी कमी झाली. त्यानंतर फेरीवाल्याने तिला स्पर्श करत तिचा विनयभंग केला. घाबरलेल्या विद्यार्थिनीने डब्यात याबाबत वाच्यता केली नाही.

कॉलेजमध्ये गेल्यावर तिच्या मैत्रिणींना हा प्रकार तिने सांगितला. त्यानंतर घरी गेल्यावर घरच्यांनादेखील घडला प्रकार सांगितला. सोमवारी रात्री पीडित तरुणी आणि तिच्या कुटुंबीयांनी कुर्ला रेल्वे पोलिस ठाण्यात जाऊन तक्रार दाखल केली. सोमवारी सकाळी ६.४५ ते ७.१० वाजण्याच्या दरम्यान हा प्रकार घडला असावा. तरुणीने दिलेल्या माहितीनुसार, रेल्वे स्थानकांतील सीसीटीव्ही फुटेजची तातडीने तपासणी करण्यात आली. आरोपीची ओळख पटवून मंगळवारी सकाळी त्याला अटक करण्यात आली. आरोपी हा फेरीवाला असून रेल्वे स्थानकांवर तसेच लोकलमध्ये महिलांसाठीच्या वस्तू विकतो. विनयभंगासह भारतीय रेल्वे कायद्यानुसार महिला डब्यात प्रवेश करणे या कलमांखाली त्याच्यावर गुन्हा नोंदवण्यात आला आहे, असे कुर्ला रेल्वे पोलिस ठाण्याचे वरिष्ठ पोलिस निरीक्षक शार्दुल वाल्मिक यांनी सांगितले.

जवळच्या शहरातील बातम्या

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.



Source link

Leave a Reply

Your email address will not be published.