[ad_1]

म. टा. विशेष प्रतिनिधी, नाशिक: नाशिक लोकसभा मतदारसंघात ‘डॅमेज कंट्रोल’साठी बुधवारी शहरात आलेल्या मुख्यमंत्री एकनाथ शिंदे यांच्या दौऱ्यात शिवसेना शिंदे गटातील पदाधिकाऱ्यांनी एकीचे दर्शन घडविले खरे. मात्र, नाशिकची जागा आपल्यासाठी महत्त्वाची असल्याचे सांगत शिंदेंनी यावेळी हेमंत गोडसेंचेही कान टोचले. आमदार, नगसेवकांच्या कामात हस्तक्षेप करू नका, असे सांगत नाहीतर माझ्याशी गाठ असल्याचा अप्रत्यक्ष दमच शिंदेंनी गोडसेंना भरला. महायुतीच्या बैठकीत मुख्यमंत्र्यांनी नाशिकचा उमेदवार निवडून आणण्याचे आवाहन करीत एकीची सादही घातली.

मुख्यमंत्र्यांच्या प्रमुख उपस्थितीत झालेल्या महायुतीच्या बैठकीकडे राष्ट्रवादी अजित पवार गटाचे नेते छगन भुजबळ आणि सिन्नरचे आमदार अॅड. माणिकराव कोकाटेंनी पाठ फिरवली. त्यामुळे महायुतीतील बेबनाव अद्यापही कायम असल्याचे चित्र आहे. नाशिक लोकसभा मतदारसंघात महायुतीने हेमंत गोडसेंना उमेदवारी दिल्यानंतर महायुतीत असमन्वय दिसून येत आहे. महायुतीतील तीनही पक्षांत बेबनाव आहे. त्यामुळे शिंदेंनी बुधवारी तातडीने नाशिकमध्ये धाव घेत मेळावा घेण्यासह महायुतीच्या नेत्यांचीही बैठक घेऊन नाशिकसाठी ‘डॅमेज कंट्रोल’चा प्रयत्न केला. शिवसेना शिंदे गटाच्या मेळाव्यात हेमंत गोडसेंना निवडून आणण्याचे आवाहन केल्यानंतर त्यांनी पंचतारांकित हॉटेलमध्ये महायुतीच्या पदाधिकाऱ्यांची बैठक घेतली.

भुजबळ, कोकाटे अनुपस्थित

मुख्यमंत्री एकनाथ शिंदे यांच्या दौऱ्यात तरी महायुतीत एकोपा दिसून येईल, अशी अपेक्षा होती. परंतु, महायुतीच्या प्रमुख पदाधिकाऱ्यांच्या बैठकीस नाशिकमध्ये असूनही मंत्री छगन भुजबळ यांनी दांडी मारली. महायुतीच्या पहिल्या समन्वय समितीच्या बैठकीस दांडी मारणारे सिन्नरचे राष्ट्रवादीचे आमदार माणिकराव कोकाटे यावेळीदेखील अनुपस्थित होते. बारामतीच्या मतदानानंतर नाशिकमध्ये सक्रिय होईन, असे कोकाटे यांनी सांगितले होते. परंतु, मुख्यमंत्र्यांच्या दौऱ्यातही ते गायब असल्याने चर्चेला उधाण आले आहे.

गोडसेंचेच छायाचित्र गायब

महायुतीत असमन्वय असतानाच शिवसेना शिंदे गटाचे उपनेते विजय करंजकर यांनी आयोजित केलेल्या मेळाव्यात मात्र शिंदे गटातील असमन्वय दिसून आला. या मेळाव्यामध्ये विद्यमान खासदार तथा उमेदवार हेमंत गोडसे यांचेच छायाचित्र मुख्य बॅनरवरून गायब झाल्याने आश्चर्य व्यक्त केले जात होते. या बॅनरवर महायुतीच्या नेत्यांचे फोटो असताना छगन भुजबळांचाही फोटो नव्हता. हे बॅनर व्हायरल झाल्यानंतर राष्ट्रवादीच्या नेत्यांनही नाराजी व्यक्त केली.

‘गोडसे, फोन घेत चला!’

मुख्यमंत्री शिंदेंनी यावेळी गोडसेंच्या उमेदवारीला पक्षासह महायुतीच्या नेत्यांचा कसा विरोध होता याचे विश्लेषणच मेळाव्यात करीत गोडसेंच्या चुकांवरही बोट ठेवले. गोडसेंना उमेदवारी देऊ नका असे मला सर्वच जण सांगत होते. पण, शिवसैनिकावर अन्याय होऊ देणार नाही असे मी ठरवले, असे शिंदे म्हणाले. कार्यकर्ता हाच खासदार, आमदार बनवत असतो. त्यामुळे त्यांच्या अडीअडचणींत धावून जा, त्यांना आवश्यक मदत करा. त्यांचे फोन उचला, कॉल डायव्हर्ट करू नका, पोलिस ठाणे, हॉस्पिटलसारखी लहान-मोठी कामे करा. अन्यथा निवडणुका आल्या, की मला विनंती करावी लागते, अशा शब्दात शिंदेंनी गोडसेंची कानउघडणी मेळाव्यात केली.

[ad_2]

Source link

Leave a Reply

Your email address will not be published. Required fields are marked *