मुंबई: काही दिवसांपूर्वी मुंबई-अहमदाबाद महामार्गावर टाटा सन्सचे माजी अध्यक्ष सायरस मिस्त्री यांचा कार अपघातामध्ये मृत्यू झाला होता. पालघरच्या दापचरी परिसरात हा अपघात झाला होता. सायरस मिस्त्री यांची मर्सिडीज कार येथील दुभाजकावर अत्यंत वेगाने आदळली होती. सायरस मिस्त्री हे गाडीच्या मागच्या आसनावर बसले होते. त्यांनी सीटबेल्ट न लावल्यामुळे गाडी आदळल्यानंतर त्यांना गंभीर इजा झाली होती. या दुखापतीमुळे त्यांचा जागीच मृत्यू झाला होता. सायरस मिस्त्री यांच्या या अपघातामुळे राज्यातील रस्ते अपघाताचा मुद्दा पुन्हा एकदा ऐरणीवर आला होता. मात्र, सायरस मिस्त्री यांच्या वाहनाचा ज्याठिकाणी अपघात झाला तो महामार्गाचा परिसर हा सातत्याने मृत्यूचा सापळा ठरत असल्याची बाब समोर आली आहे.

पीटीआय वृत्तसंस्थेच्या माहितीनुसार, यंदाच्या वर्षात घोडबंदर रोड ते दापचारी या महामार्गाच्या पट्ट्यात तब्बल २६२ अपघात झाले आहेत. यामध्ये ६२ जणांचा मृत्यू झाला होता. तर १९२ जण हे जखमी झाले होते. तसेच याठिकाणी झालेले बहुतांश अपघात हे गाडीच्या वेगावर नियंत्रण नसल्याने आणि वाहनचालकाच्या चुकीमुळेच झाले आहेत. परंतु, मुंबई-अहमदाबाद महामार्गाच्या या पट्ट्यातील रस्त्याची अवस्थाही अत्यंत वाईट आहे. या रस्त्यांवर साधे दिशादर्शक फलकही व्यवस्थित नाहीत. याशिवाय, वाहनांच्या वेगावर नियंत्रण राहील, अशी एकही व्यवस्था या पट्ट्यात अस्तित्त्वात नाही. त्यामुळे मुंबई-अहमदाबाद मार्गाचा घोडबंदर रोड ते दापचारी हा पट्टा मृत्यूचा सापळा झाला आहे.

सायरस मिस्त्री यांच्या अपघाती मृत्यूनंतर प्रशासकीय यंत्रणा खडबडून जाग्या झाल्या होत्या. या अपघातानंतर सायरस मिस्त्री यांच्या मर्सिडीज कारसोबत येथील रस्त्याचीही पाहणी करण्यात आली होती. त्यावेळी फॉरेन्सिक पथकाने सायरस मिस्त्री यांचा अपघात झाल्या त्या परिसरातील नदीच्या पूलाची रचना ही सदोष असल्याचे निरीक्षण नोंदवले होते. या भागातीला पायाभूत सुविधांमध्ये अनेक त्रुटी आहेत. याची परिणती अपघातांमध्ये होते. या पूलाची भिंत ही बाहेरच्या बाजूला आहे, त्यामुळे हा भाग रस्त्यात आडवा येतो. ज्या चारोटी परिसरात हा अपघात झाला तो भाग कुख्यात आहे. यंदाच्या वर्षात याचठिकाणी झालेल्या २५ गंभीर अपघातांमध्ये २६ जणांचा मृत्यू झाला आहे. त्यामुळे चारोटी परिसर हा एकप्रकारे ब्लॅकस्पॉटच मानला जातो. सूर्या नदीवरील पूलाच्या आधी जे वळण येते त्याठिकाणी वाहनांना ये-जा करण्यासाठी खूपच अरुंद आहे.

सायरस मिस्त्री यांच्या अपघातानंतर प्रशासनाला जाग

सायरस मिस्त्री यांचा कार अपघातात मृत्यू होणे, हा अनेकांसाठी धक्का ठरला होता. मिस्त्री यांच्या निधनाने रस्त्यांवरील अपघात आणि मुंबई-अहमदाबाद महामार्गाच्या दुरावस्थेचा मुद्दा चर्चेत आला होता. त्यामुळे प्रशासकीय यंत्रणा खडबडून जाग्या झाल्या होत्या. सायरस मिस्त्री यांच्या अपघातानंतर पोलिसांनी केंद्रीय रस्ते संशोधन संस्थेला पत्र लिहले आहे. यामध्ये महामार्गावर सुरक्षा उपाययोजना करण्याची मागणी करण्यात आली आहे.



Source link

Leave a Reply

Your email address will not be published.