Parbhani News Mata Super Woman : समाजाप्रती आपलं काहीतरी देणं लागतं हे लक्षात घेऊन वडिलांचा मदतीचा वारसा पुढे चालवत भोलारामजी कंकरिया यांच्या नावे चॅरिटेबल ट्रस्ट स्थापन करून आतापर्यंत परभणीच्या गंगाखेड येथील मंजुषाताई दर्डा यांनी २ हजार १५० दिव्यांग व्यक्तींना कृत्रिम अवयवाचं वाटप केलं आहे. तर करोनासारख्या महामारीमध्ये स्वतःचे नातेवाईक ओळखत नसताना तीस हजार व्यक्तींना मोफत टिफिनचा पुरवठा करून भूक भागवण्याचं काम करणाऱ्या मंजुषाताई दर्डा यांनी परभणीच्या आधुनिक सिंधुताई सपकाळ म्हणून आपली ओळख निर्माण केली आहे. मागील १७ वर्षापासून त्या आपलं सामाजिक कार्य अविरतपणे करत आहेत. यासाठी त्यांनी शासनाचं अथवा कुठल्याही चॅरिटेबल संस्थेचं अर्थसहाय्य घेतलं नाही ही बाब महत्त्वाची बाब आहे.

दिव्यांक व्यक्तींना मोठी मदत

अनेकदा दिव्यांग हा समाजाचा घटक सर्व स्तरात दुर्लक्षित असल्याचं दिसतं. या घटकासाठी काम करणारे लोक बोटावर मोजण्या इतकेच असतात. त्यातल्या परभणीच्या गंगाखेड येथील मंजुषाताई दर्डा यांनी आतापर्यंत दिव्यांगांसाठी मोठी मदत केली आहे. त्यांनी वेगवेगळ्या ठिकाणी शिबिरं घेऊन २०० व्हीलचेअर्स, २०० ट्रायसायकल, २०० श्रवणयंत्र, ५०० कॅलिपर, ७०० कुबडी, ३५० कृत्रिम हात आणि कृत्रिम पायांचं वितरण दिव्यांग व्यक्तींना केलं आहे.

लॉकडाउन काळात ३० हजार टिफिनचं वाटप

तसंच शिबिराच्या माध्यमातून १,२५० दिव्यांग रूग्णांची यशस्वी शस्त्रक्रिया आणि त्यांच्याकडे भेटण्यासाठी आलेल्या १,७०० दिव्यांग रुग्णांच्या वैयक्तिक यशस्वी शस्त्रक्रिया करून जगण्याचं बळ दिलं आहे. करोनासारख्या महामारीमध्ये संपूर्ण जगात अर्थव्यवस्था कोलमडली होती. अशात लॉकडाउनच्या काळात मंजुषाताई दर्डा यांनी अनेकांना मोठी आर्थिक, तसंच इतरही मदत केली. गंगाखेड उपजिल्हा रुग्णालय, पोलीस स्टेशन, क्वारंटाईन सेंटर, ज्या घरातील महिलेला करोनाची लागण झाली आहे, अशा घरातील व्यक्तींना तीस हजार टिफिनचं वाटप त्यांनी केलं.

माणुसकीची भिंत उपक्रम चालवत १२१ कुटुंब दत्तक घेतली

केवळ लॉकडाउनचं नाही, तर त्यांनी लॉकडाऊन संपल्यानंतरही १२१ कुटुंब दत्तक घेऊन त्यांना सहा महिने प्रत्येकी दोन हजार रुपये प्रमाणे रेशन भरून दिलं. भोलारामजी कंकरिया चॅरिटेबल ट्रस्टच्या माध्यमातून माणुसकीची भिंत हा उपक्रम चालवून गरजूंना जीवनावश्यक वस्तू, वृद्ध व्यक्तींना वस्तूंचं वाटप करण्याचं काम त्या अविरतपणे करत आहेत. तसंच हिवाळ्यामध्ये १०० गरजूंना ब्लॅंकेटचं वाटप, स्वातंत्र्याचा अमृत महोत्सव अंतर्गत १००० विद्यार्थ्यांना शालेय साहित्याचं वाटपही त्यांनी केलं. हेही वाचा – #MataSuperWoman: शेतमजुरी ते गॅरेजची मालकीण व्हाया पंक्चर रिपेअरिंग, सहावी शिकलेल्या वनितांची गरुडझेप

आधुनिक सिंधुताई सपकाळ अशी ओळख

ट्रस्टच्या माध्यमातून रक्तदान शिबिराचं आयोजन करणं असे सामाजिक उपक्रम त्यांनी राबवले आहेत. गरीब-गरजूंना मदत करत परभणीच्या आधुनिक सिंधुताई सपकाळ अशी आपली ओळख त्यांनी निर्माण केली आहे. त्यांनी केलेल्या सामाजिक कार्याची दखल घेऊन त्यांना विविध पुरस्काराने सन्मानितही करण्यात आलं आहे. वडिलांनी सुरू केलेली सामाजिक सेवा पुढे नेताना आपल्याला आनंद वाटतो असं त्या सांगतात. आपल्यासारख्या शंभर मंजू राज्यामध्ये निर्माण व्हाव्यात आणि गरजूंची मदत करावी अशी अपेक्षाही त्या व्यक्त करतात. हेही वाचा – #MataSuperWoman : गुन्हेगारीचा शिक्का पुसून ३१ मुलांचे भविष्य घडवणारी ‘आई’; पिंकी भोसलेंची प्रेरणादायी कहाणी

अनेक पुरस्कारांनी सन्मानित

मंजुषाताई त्यांनी केलेल्या सामाजिक कार्याची दखल घेऊन त्यांना जिनेंद्र श्रुत सेवा पुरस्कार, जैन रत्न, समाज सेवा नारी रत्न, राष्ट्रीय नारी रत्न, समाज रत्न, तपस्या रत्न, स्वयंसिद्ध मित्र मैत्री पुरस्कार, गौरव स्त्री शक्ती पुरस्कार, नगरी रत्न गौरव, क्रांतिज्योती पुरस्कार, आदर्श नारी पुरस्कार, आदर्श कार्यगौरव समाज रत्न पुरस्कार, ग्लोबल इंडिया अचिव्हर्स गोल्ड मेडल अवॉर्ड, भारत गौरव पुरस्कार, सेवा गौरव पुरस्कार, नारी शक्ति, हिरकणी आदर्श महिला पुरस्कार अशा विविध पुरस्कारांनी सन्मानित करण्यात आले आहे.



Source link

Leave a Reply

Your email address will not be published.