ललित पाटील प्रकरणाची चौकशी करण्यासाठी राज्य सरकारने चौकशी समिती स्थापन केली होती. त्या समितीच्या अहवालामध्ये डॉ. ठाकूर आणि अस्थिव्यंगोपचार विभागातील सहयोगी प्राध्यापक डॉ. प्रवीण देवकाते दोषी आढळले होते. त्यानंतर डॉ. ठाकूर यांना पदमुक्त, तर डॉ. देवकाते यांना निलंबित करण्याचा निर्णय राज्य सरकारने १० नोव्हेंबरला घेतला. या निर्णयानंतर दुसऱ्याच दिवशी डॉ. देवकाते यांना निलंबित केल्याचे आदेश बी. जे. प्रशासनाला प्राप्त झाले. मात्र, ठाकूर यांच्या पदमुक्तीचा आदेश अद्यापही मुंबई-पुणे महामार्गावरच अडकला असल्याची तिरकस चर्चा महाविद्यालयात रंगली आहे.
जुन्या पेन्शन योजनेचा मुद्दा तापणार, सरकारी कर्मचारी पुन्हा संपावर जाणार, तारीख ठरली आता निर्धार सभांचं नियोजनअधिष्ठाता पदावरून संभ्रम
डॉ. ठाकूर यांची ‘बी. जे.’च्या अधिष्ठातापदी नियुक्ती होण्यापूर्वी डॉ. विनायक काळे हे त्या ठिकाणी नियुक्त होते. ठाकूर यांच्या नियुक्तीनंतर डॉ. काळे यांनी महाराष्ट्र प्रशासकीय न्यायाधिकरणाकडे (मॅट) आणि त्यानंतर उच्च न्यायालयात धाव घेतली होती. डॉ. ठाकूर यांच्यावर ललीत पाटील प्रकरणात कारवाई झाली, त्याच दिवशी डॉ. काळे यांच्याबाजूने उच्च न्यायालयात निकाल लागला होता. त्यानुसार त्यांनी ‘बी. जे.’च्या अधिष्ठातापदाचा पदभार स्वीकारणे अपेक्षित होते. त्यासाठी राज्य सरकारने ठाकूर यांच्यावरील कारवाई आणि काळे यांची नव्याने नियुक्ती, असे आदेश देणे अपेक्षित होते. सरकारकडून ठाकूर यांच्यावरील कारवाईचे आदेश मंत्रालयातून प्रसिद्ध केले असले तरी ते अद्यापपर्यंत ‘बी. जे.’ला मिळालेले नाहीत. तर, डॉ. काळे यांच्या नियुक्तीचे आदेशच काढले नसल्याने त्यांचीही नियुक्ती करण्यात आली नाही.
नावापुरता पदभार
बी. जे. महाविद्यालयातील वरिष्ठ अधिकारी म्हणून डॉ. श्रीनिवास शिंत्रे यांच्याकडे अधिष्ठातापदाचा अतिरिक्त पदभार देण्यात आला आहे; परंतु शिंत्रे रजेवर असल्याने उपअधिष्ठाता डॉ. शेखर प्रधान यांना अधिष्ठातापदाचा प्रभारी पदभार देण्यात आला आहे. सद्यस्थितीत ‘बी. जे.’ प्रशासनामध्ये अधिष्ठाता पदावरून संभ्रम असल्याचे दिसून येत आहे. या गोंधळाचा ससूनसह बी. जे. रुग्णालय प्रशासनावर परिणाम होत असून रुग्णसेवेलाही त्याचा फटका बसतो आहे.
बी. जे. वैद्यकीय महाविद्यालयाचे अधिष्ठाता डॉ. संजीव ठाकूर यांना पदमुक्त करण्यात आले आहे. या निर्णयाचा आदेश महाविद्यालय प्रशासन आणि डॉ. ठाकूर यांना पाठविण्यात आला आहे. त्यामुळे त्यांना दिलेल्या आदेशाची प्रत प्रशासनाला मिळाली असेल. महाविद्यालयातील वरिष्ठ प्राध्यापकाला अधिष्ठातापदाचा पदभार द्याव्या, अशा सूचनादेखील डॉ. ठाकूर यांना पदमुक्त करताना दिल्या होत्या, असे वैद्यकीय शिक्षण विभाग सचिव दिनेश वाघमारे यांनी सांगितले.