नवी दिल्ली : अंमलबजावणी संचनालय म्हणजेच ईडीनं सोशल मीडिया प्लॅटफॉर्म एक्स म्हणजेच वरुन मोठी घोषणा केली आहे. नॅशनल हेराल्ड प्रकरणी ईडीनं काँग्रेसशी संबंधित असोसिएटेड जर्नल्स आण यंग इंडियन यांची ७५१.९ कोटी रुपयांची संपत्ती जप्त केली आहे. जप्त करण्यात आलेल्या संपत्तीत एजेएलची मुंबई, दिल्ली, लखनऊ आणि इतर ठिकाणाच्या संपत्तीचा हिस्सा आहे. एजेएलची एकूण ६६१.९ कोटी रुपयांची संपत्ती जप्त करण्यात आली आहे. ईडीनं ट्विट करुन ही माहिती दिली आहे. यंग इंडियन ची संपत्ती ९०.२१ कोटी रुपयांची आहे. एजेएल आणि यंग इंडियन मिळून ७५० कोटींची संपत्ती जप्त करण्यात आली आहे. काँग्रेसनं या प्रकरणावरुन केंद्र सरकारवर हल्लाबोल केला आहे. निवडणुका जवळ येत असल्यानं असं केलं जात असल्याचं काँग्रेसनं म्हटलं आहे. या कंपन्यांमध्ये सोनिया गांधी आणि राहुल गांधी यांचे देखील शेअर्स आहेत. ईडीच्या कारवाईवर काँग्रेस नेते आणि ज्येष्ठ वकील अभिषेक मनू सिंघवी यांनी म्हटलं की, ईडीनं एजेएलच्या संपत्तीला जप्त केल्याच्या बातम्या करुन ज्या ठिकाणी भाजपचा पराभव निश्चित आहे त्यावरुन लक्ष विचलित करण्याचा प्रयत्न आहे. सिंघवी पुढे म्हणाले की भाजपचे साथीदार सीबीआय, ईडी, आयटी भाजपला पराभवापासून रोखू शकणार नाही.
ईडी कारवाईच्या टायमिंगची चर्चा
देशात सध्या तेलंगाणा, मध्य प्रदेश, राजस्थान, छत्तीसगड आणि मिझोरम या पाच राज्यांच्या निवडणुकांची प्रक्रिया सुरु आहे. या पाच राज्यांच्या विधानसभा निवडणुकीपैकी मध्य प्रदेश, छत्तीसगड आणि मिझोरम या राज्यांमधील मतदान पार पडलं आहे. काँग्रेससाठी राजस्थान आणि तेलंगाणाची निवडणूक महत्त्वाची आहे. राजस्थानात काँग्रेसला गेल्या टर्ममध्ये मिळालेली सत्ता कायम ठेवायची आहे. तर, तेलंगाणामध्ये सत्ता परत मिळवण्यासाठी काँग्रेसनं संपूर्ण ताकद लावली आहे. या पार्श्वभूमीवर ईडीकडून एजेएल आणि यंग इंडियनची संपत्ती जप्त करण्यात आल्यानं विरोधकांकडून याचा प्रचार सभांमध्ये वापर केला जाऊ शकतो. नॅशनल हेराल्ड प्रकरणी ईडीनं राहुल गांधी आणि सोनिया गांधी यांची देखील चौकशी केली होती. Read Latest And