महाराष्ट्रात महायुतीचे सरकार:CM, दोन उपमुख्यमंत्र्यांचा फॉर्म्युला; फडणवीस-अजित पवार आणि शिंदे संध्याकाळी दिल्लीला जाणार, उद्या शपथविधी शक्य

महाराष्ट्र विधानसभा निवडणुकीच्या निकालानंतर आता राज्यात युतीचे सरकार स्थापन होणार असल्याचे स्पष्ट झाले आहे. महायुतीकडून मुख्यमंत्री पदाचा उमेदवार अद्याप जाहीर झालेला नाही. एकनाथ शिंदे, अजित पवार आणि देवेंद्र फडणवीस रविवारी संध्याकाळी दिल्लीला रवाना होतील. दिल्लीत भाजप हायकमांडसोबत झालेल्या बैठकीनंतर मुख्यमंत्र्यांच्या नावाची घोषणा होऊ शकते. दिव्य मराठीच्या सूत्रांनी दिलेल्या माहितीनुसार, सध्या एक मुख्यमंत्री आणि दोन उपमुख्यमंत्र्यांचा फॉर्म्युला ठरला आहे. त्याचवेळी महायुतीच्या पक्षांमध्ये प्रत्येक 6-7 आमदारांमागे एक मंत्रीपदाचा फॉर्म्युला निश्चित झाला आहे. त्यानुसार भाजपचे 22-24, शिंदे गटाचे 10-12 आणि अजित गटाचे 8-10 आमदार मंत्री होऊ शकतात. मुख्यमंत्र्यांच्या नावाची घोषणा झाल्यानंतर उद्या मुंबईतील राजभवनात शपथविधी सोहळा होऊ शकतो. सीएम शिंदे यांनी विजयानंतर सांगितले होते की, ज्याच्या जास्त जागा असतील त्या पक्षाचा मुख्यमंत्री होणार हे निवडणुकीपूर्वी ठरले नव्हते. या निवडणुकीत सहा मोठ्या पक्षांच्या दोन आघाड्यांमध्ये लढत होती. महायुतीमध्ये भाजप, शिवसेना (एकनाथ शिंदे) आणि राष्ट्रवादी (अजित पवार) यांचा समावेश आहे, तर महाविकास आघाडीमध्ये काँग्रेस, शिवसेना (उद्धव ठाकरे) आणि राष्ट्रवादी (शरद पवार) यांचा समावेश आहे. 149 जागांवर निवडणूक लढवणाऱ्या भाजपने सर्वाधिक 132 जागा जिंकल्या आहेत. युतीने 288 पैकी विक्रमी 230 जागा जिंकल्या. भाजपचा स्ट्राइक रेट 88% होता. काँग्रेसच्या नेतृत्वाखालील महाविकास आघाडीला (MVA) 46 जागा मिळाल्या.