[ad_1]

म. टा. विशेष प्रतिनिधी, मधुबन पिंगळे, मुंबई: भाजपची प्रत्येक मतदारसंघात शेवटच्या क्षणापर्यंत सुरू असलेली सर्वेक्षणे; स्थानिक आमदार व नेत्यांकडून तेथील राजकीय परिस्थितीचा केंद्रीय नेतृत्वाकडे पाठवला जाणारा अभिप्राय यामुळे महायुतीने जाहीर केलेल्या अनेक उमेदवारांची अदलाबदल सुरू आहे. या सावध पावलांमुळे महाराष्ट्रातील महायुतीची संपूर्ण यादी अद्यापही खोळंबलेलीच आहे.

सर्वेक्षणांच्या आधारावरच शिवसेनेकडून हिंगोलीतून हेमंत पाटील यांच्याऐवजी बाबूराव कदम कोहळीकर यांचे नाव निश्चित झाले आहे. तर, हेमंत पाटील यांच्या पत्नी राजश्री पाटील यांना यवतमाळ-वाशिम येथून लोकसभेची उमेदवारी निश्चित झाली आहे. हे सगळे बदल स्वतः एकनाथ शिंदेदेखील सकारात्मक पद्धतीनेच घेत आहेत. मात्र, दुसरीकडे या सगळ्या खेळात अजित पवार यांच्या राष्ट्रवादी काँग्रेसला सुटणाऱ्या जागांचा आकडा चार-पाचच्या पलीकडे जात नसल्याने त्यांचे नेते व कार्यकर्त्यांमध्ये प्रचंड चलबिचल आहे.

भाजपच्या केंद्रीय नेतृत्वाकडून महाराष्ट्रातील प्रत्येक लोकसभा मतदारसंघाचा व्यावसायिक तज्ज्ञांकडून सर्वेक्षण व सखोल अभ्यास सुरू असून, तो अद्याप संपलेला नाही. त्या आधारावर यापूर्वी जाहीर केलेल्या काही उमेदवारांच्या नावात बदल केला जात आहे. मुख्य म्हणजे केवळ भाजपचेच उमेदवार या सर्वेक्षणातून येणाऱ्या माहितीच्या आधारावर बदलले जात नसून भाजपचे मित्रपक्ष असलेल्या शिंदे यांच्या नेतृत्वाखालील शिवसेनेचेही उमेदवार बदलले जात असल्याचे स्पष्ट झाले आहे. मुख्य म्हणजे या बदलाबाबत एकनाथ शिंदे व शिवसेनेत कोणतीही नाराजी नसून भाजपच्या केंद्रीय नेतृत्वाबरोबर बोलणी करूनच सगळी आखणी केली जात असल्याचे त्यांच्या अत्यंत ज्येष्ठ नेत्याने ‘मटा’ला सांगितले.

दावेदारी सोडलेली नाही, यवतमाळ-वाशिममधून उमेदवारी अर्ज दाखल करणार, भावना गवळींनी ठणकावलं

नाशिकमधील तिढा कायम?

महायुतीत अडकून पडलेल्या जागांपैकी नाशिक या मतदारसंघाचा तिढा अद्यापही सुटला नसून शिंदे यांची शिवसेना या जागेवर हेमंत गोडसे यांनाच लढवण्यास उत्सुक असली, तरी भाजपच्या शीर्षस्थ नेतृत्वाने सर्वेक्षणांती या जागेवर राष्ट्रवादी काँग्रेसचे छगन भुजबळ यांना लढवावे, असे सुचवले आहे. त्यामुळे ही जागा राष्ट्रवादी काँग्रेसच्या पदरात पडण्याची शक्यता आहे.

वायव्य मुंबईत कोण?

वायव्य मुंबई मतदारसंघातही अद्याप शिंदे यांच्या शिवसेनेने उमेदवार जाहीर केलेला नाही. या ठिकाणी शिवसेनेकडे तगडा उमेदवार नसल्याने ही जागा भाजपला सोडावी, असे भाजपच्या राज्यातील नेत्यांचे म्हणणे आहे. मात्र, या जागेवर भाजपनेही म्हणाव्या तितक्या तगड्या उमेदवाराचा पर्याय दिलेला नसल्याने या जागी शिवसेनेकडून चांगल्या उमेदवाराची चाचपणी सुरू आहे. दुसरीकडे ठाणे व दक्षिण मुंबई मतदारसंघातीलही महायुतीचे उमेदवार अद्याप जाहीर झालेले नाहीत. या दोन्ही मतदारसंघांतील विद्यमान खासदार शिंदे यांच्याकडे नसल्याने त्यांची बाजू भाजपबरोबर सुरू असलेल्या वाटाघाटीत थोडी लंगडी आहे. ठाणे या मतदारसंघातच शिंदे यांचे निवासस्थान असल्याने ही जागा शिवसेनेने प्रतिष्ठेची केली आहे. मात्र, दक्षिण मुंबईबाबत असे काही समर्थनही करता येणे शक्य नसल्याने या जागांबाबत भाजप खूपच आग्रही आहे.

‘राष्ट्रवादी’कडे दुर्लक्ष

या सगळ्यात अजित पवार यांच्या नेतृत्वाखालील राष्ट्रवादी काँग्रेस पक्षाकडे काहीसे दुर्लक्ष झाल्यासारखीच परिस्थिती आहे. छगन भुजबळ यांनी जरांगे यांच्या विरोधात घेतलेल्या थेट भूमिकेमुळे राज्यातील ओबीसी मतांचा ओघ महायुतीकडे येऊ शकतो, या शक्यतेमुळे भाजपच्या नेतृत्वाकडून भुजबळ यांच्या नावाचा आग्रह सुरू असला तरी बारामती, शिरूर, रायगड, उस्मानाबाद या चार जागा व मिळाली तर नाशिक अशा पाच जागांव्यतिरिक्त राष्ट्रवादी काँग्रेसच्या पारड्यात फारसे काही पडण्याची शक्यता नाही. अजित पवार यांच्यासमोर शरद पवार यांच्यापासून वेगळे झाल्यानंतर मिळालेल्या जागांपैकी अधिकाधिक जागा निवडून आणण्याचे मोठे आव्हान आहे. त्यातच त्यांचा भार हलका करण्यासाठी पक्षात त्यांच्याइतके वजन असलेले फारसे कुणीही नाही. त्यांचे अनेक आमदार व कार्यकर्ते राष्ट्रवादी काँग्रेसच्या पदरात पडणाऱ्या जागांबाबत येणाऱ्या बातम्यांमुळे प्रचंड अस्वस्थ असून विधानसभेत महायुतीच्या वाटपाची ही दाहकता अधिक जाणवेल की काय या चिंतेने अस्वस्थ आहेत.

भावना गवळी बंडखोरीच्या पवित्र्यात

भाजपकडून भावना गवळी यांच्या उमेदवारीला विरोध असल्याने त्यांना उमेदवारी नाकारण्यात आली आहे. मात्र, ‘सर्वेक्षणाचा निकाल काहीही असो, मी अनेक वर्षांपासून यवतमाळ-वाशिममधून निवडून येत आहे. त्यामुळे या मतदारसंघावरील दावेदारी मी अद्याप सोडलेली नाही,’ असे भावना गवळी यांनी ठणकावून सांगितले. त्यामुळे आता भावना गवळी या महायुतीच्या अधिकृत उमदेवार राजश्री पाटील यांच्याविरोधात बंडखोरी करून अर्ज भरणार का, याकडे सर्वांचे लक्ष लागले आहे.

महायुतीमध्ये समन्वयाचा अभाव, तालुक्यापासून जिल्ह्यापर्यंत समन्वय समिती गठित केली पाहिजे : अनिल पाटील

किरण सामंत यांचा ‘यू टर्न’

कोकणातील रत्नागिरी-सिंधुदुर्ग लोकसभा मतदारसंघातून महायुतीचा उमेदवार कोण असणार, याकडे गेले कित्येक महिने अनेकांचे लक्ष लागून राहिले आहे. शिवसेना नेते उद्योगमंत्री उदय सामंत यांचे ज्येष्ठ बंधू किरण सामंत व भाजपचे ज्येष्ठ नेते केंद्रीय मंत्री नारायण राणे अशी दोन नावे चर्चेत आहेत. किरण सामंत यांनी रत्नागिरी-सिंधुदुर्ग लोकसभा मतदारसंघातून आपण माघार घेत असल्याचे फेसबुकवर मंगळवारी रात्री उशिरा जाहीर केले, मात्र काही वेळातच त्यांनी ही पोस्ट डिलीट केल्याने पुन्हा एकदा या मतदारसंघातील संभ्रम वाढला आहे.

[ad_2]

Source link

Leave a Reply

Your email address will not be published. Required fields are marked *