आमदार महेंद्र थोरवेच गद्दारांचे बादशाह:त्यांनी महायुतीला छेद देण्याचे काम केले, अनिकेत तटकरेंचा पलटवार

रायगड जिल्ह्याच्या पालकमंत्रिपदावरून चांगलेच शाब्दिक वार रंगताना दिसत आहेत. शिवसेनेचे आमदार व आमदार भरत गोगावले यांचे समर्थक महेंद्र थोरवे यांनी राष्ट्रवादी कॉंग्रेस अजित पवार गटाचे नेते सुनील तटकरे यांचा बेईमानांचा बादशाह असा उल्लेख केला होता. त्याला आता सुनील तटकरे यांचे सुपुत्र अनिकेत तटकरे यांनी प्रत्युत्तर दिले आहे. अनिकेत तटकरे म्हणाले, खरेतर आमदार थोरवे यांचे अशा प्रकारचे बोलणे खूपच हास्यास्पद आहे. कारण तेच गद्दारांचे बादशाह आहेत, असे मी छतीठोकपणे सांगू शकतो. थोरवे यांचे स्वीय सहाय्यक निवडणुकीच्या वेळी श्रीवर्धनमध्ये काय करत होते, त्यांना काय सांगत होते ते सगळे आम्ही बाहेर काढू. थोरवे यांनी निवडणुकीच्या काळात महायुतीला छेद देण्याचे काम केले. झाकली मूठ सव्वालाखांची. मी देखील सर्व गोष्टी बाहेर काढू शकतो. निश्चितच सर्वांसमोर मांडू शकतो, असा थेट अप्रत्यक्ष इशाराच अनिकेत तटकरे यांनी थोरवे यांना दिला आहे. विधानसभा निवडणुकीत खासदार सुनील तटकरे यांनी शिवसेनेच्या उमेदवारांसाठी काम केले नाही, रायगडमध्ये शिवसेना शिंदे गटाच्या तिन्ही विद्यमान आमदारांना पाडण्याचा प्रयत्न केला, असा आरोप मंत्री भरत गोगावले यांनी केला आहे. तसेच मी पालीच्या बल्लाळेश्वराच्या मंदिरात जाऊन शपथ घेण्यासही मी तयार आहे, असेही भरत गोगावले म्हणाले. यावर अनिकेत तटकरे यांनी प्रत्युत्तर दिले आहे. भरत गोगावले यांच्या विधानावर प्रत्युत्तर देताना अनिकेत तटकरे म्हणाले, माझी देखील कोणत्याही मंदिरात जायची तयारी आहे. पालीचा बल्लाळेश्वर, हरिहरेश्वर, अलिबागच्या कनकेश्वर मंदिरात जायची माझी तयारी आहे. कारण आम्ही विधानसभा निवडणुकीत प्रामाणिकपणे महायुतीचे काम केले आहे. अलिबागमध्ये महेंद्र दळवींसाठी, महाडमध्ये भरत गोगावले यांच्यासाठी काम केले आहे. कारण लोकसभा निवडणुकीत या मंडळींनी प्रामाणिक काम केले होते. तसेच आम्ही विधानसभेला काम केले. आम्ही आमची पूर्ण ताकद लावली होती, असे अनिकेत तटकरे म्हणाले आहेत.