ऋषिकेश: उत्तराखंडच्या ऋषिकेश जिल्ह्यातील वनंतरा रिसॉर्टमधून बेपत्ता झालेल्या रिसेप्शनिस्टची हत्या झाल्याची माहिती समोर आली आहे. या प्रकरणी पोलिसांनी माजी राज्यमंत्री आणि भाजपचे नेते विनोद आर्या यांचा मुलगा पुल्कित आर्यासह तिघांना अटक केली आहे. आरोपींनी गुन्ह्याची कबुली दिली आहे.

वनंतरा रिसॉर्टमध्ये अंकिता भंडारी (१९) रिसेप्शनिस्ट म्हणून काम करत होती. रिसॉर्टमध्ये येणाऱ्या ग्राहकांकडे जाण्यास तिनं नकार दिला. वेश्या व्यवसाय करण्यास तयार नसल्यानं अंकिताची हत्या केल्याची माहिती आरोपींनी पोलिसांना दिली आहे. अंकिताची हत्या करून तिचा मृतदेह चीला शक्ती कालव्यात फेकल्याचं आरोपींनी पोलिसांना सांगितलं. पोलीस अंकिताच्या मृतदेहाचा शोध घेत आहेत.
रिसॉर्ट रिसेप्शनिस्टचा मृत्यू; पोलिसांना वेगळाच संशय, भाजप नेत्याच्या मुलाला अटक
अंकिता काम करत असलेल्या रिसॉर्टमध्ये पुल्कित संचालक म्हणून काम करत होता. अंकिता बेपत्ता झाल्यापासून रिसॉर्टचे संचालक आणि मॅनेजर फरार झाले होते. गढवालच्या श्रीकोट गावाची रहिवासी असलेली अंकिता भंडारी गंगा भोगपूरमधील रिसॉर्टमध्ये गेल्या काही महिन्यांपासून रिसेप्शनिस्ट काम करत होती. अंकिता रिसॉर्टवर एका वेगळ्या खोलीत राहायची, अशी माहिती पुल्कित आर्यानं पोलिसांना दिली. गेल्या काही दिवसांपासून अंकिता मानसिक तणावाखाली होती. त्यामुळेच तिला १८ सप्टेंबरला फिरायला ऋषिकेशला घेऊन गेलो होतो, असं आर्यानं सांगितलं.

आम्ही रात्री उशिरा ऋषिकेशहून परतलो. त्यानंतर रिसॉर्टमध्ये वेगवेगळ्या खोलीत झोपायला गेलो. त्यानंतर १९ सप्टेंबरला सकाळपासून अंकिता तिच्या खोलीतून बेपत्ता झाली, अशी माहिती आर्यानं पोलिसांना दिली. अंकिता बेपत्ता झाल्यानंतर तिचे वडील गंगा भोगपूरला पोहोचले. अंकिताच्या कुटुंबियांनी रिसॉर्टच्या कर्मचाऱ्यांकडे विचारपूस केली. त्यावेळी सगळ्यांनी वेगवेगळ्या गोष्टी सांगितल्या. रिसॉर्ट संचालक आणि कर्मचाऱ्यांची भूमिका संशयास्पद वाटल्यानं कुटुंबियांनी पोलिसात तक्रार दाखल केली.
मी चूक केली, पण दुसरी संधी मिळायला हवी होती! शेवटचे शब्द लिहून विद्यार्थ्यानं आयुष्य संपवलं
अंकिता भंडारी बेपत्ता झाल्यानंतर आमदार उमेश कुमार यांच्यासह काही पत्रकार आणि संघटनांनी सोशल मीडियावर कॅम्पेन सुरू केलं. त्यामुळे पोलिसांनी चक्रं फिरवली. तीन आरोपींना अटक करण्यात आली. रिसॉर्टचा मालक पुल्कित आर्या, मॅनेजर सौरभ भास्कर आणि असिस्टंट मॅनेजर अंकित गुप्ता अशी आरोपींची नावं आहेत.



Source link

Leave a Reply

Your email address will not be published.