मुंबई: राज्यातील १६ जिल्ह्यांमध्ये झालेल्या ग्रामपंचायत निवडणुकीत भाजप नव्हे तर राष्ट्रवादी काँग्रेस पक्षाच्या सर्वाधिक जागा निवडून आल्याचा दावा शरद पवार यांच्याकडून करण्यात आला आहे. एकूण ६०८ ग्रामपंचायतींसाठी निवडणूक झाली होती. या निवडणुकीच्या निकालाची माहिती आम्ही वेगवेगळ्या जिल्ह्यांमधून गोळा केली. त्यामध्ये राष्ट्रवादी काँग्रेस पक्षाला सर्वाधिक १७३ जागांवर विजय मिळाला आहे. तर काँग्रेस पक्ष ८४, भाजप १६८ आणि शिंदे गटाला ४२ जागांवर विजय मिळाला आहे. उद्धव ठाकरे यांच्या शिवसेनेला नेमक्या किती जागा मिळाल्यात, याची अधिकृत माहिती आमच्याकडे नाही. मात्र, महाविकास आघाडीने एकूण २७७ ग्रामपंचायतींमध्ये सत्ता मिळवली आहे. तर भाजप आणि शिंदे गटाला २१० ग्रामपंचायतींमध्ये यश मिळाले आहे, अशी माहिती शरद पवार यांनी दिली. ते मुंबईच्या यशवंतराव प्रतिष्ठान सेंटरमध्ये आयोजित करण्यात आलेल्या पत्रकारपरिषदेत बोलत होते.

यावेळी शरद पवार यांना भाजपदेखील ग्रामपंचायत निवडणुकीत आम्हाला सर्वाधिक जागा मिळाल्याचा दावा करत असल्याबद्दल विचारण्यात आले. यावर पवार यांनी म्हटले की, आमच्याकडे असलेली अधिकृत माहिती मी तुम्हाला सांगितली. आता दुसऱ्यांना ते सर्वाधिक जागा जिंकलेत या आनंदात राहायचे असेल तर राहू द्या, अशी खोचक टिप्पणी शरद पवार यांनी केली. त्यामुळे आता भाजप यावर काय प्रत्युत्तर देणार, याकडे सर्वांच्या नजरा लागल्या आहेत. ग्रामपंचायत निवडणुकीच्या निकालानंतर भाजपच्या नेत्यांनी आपल्या पक्षाला मोठे यश मिळाल्याचा दावा केला होता. परंतु, आता शरद पवार यांनी हा दावा खोडून काढला आहे. त्यामुळे आता यावरुन राष्ट्रवादी काँग्रेस आणि भाजपमध्ये वाकयुद्ध पेटण्याची शक्यता आहे.

यासंदर्भात अजित पवार यांनीही भाष्य केले होते. राज्यातील ६०८ ग्रामपंचायतींचे निकाल नुकतेच जाहीर झाले. ग्रामपंचायतीच्या निवडणुका या पक्षीय चिन्हावर होत नाहीत. उद्या एखाद्या सरपंचाने लिहून दिले की, मी अमक्या-तमक्या पक्षाचा आहे, तर ठीक आहे. पण एकंदरित परिस्थिती पाहता महाविकास आघाडीला जास्त जागा मिळाल्या आहेत. या सगळ्यातून राजकी पक्षांनी बोध घेतला पाहिजे, लोकांच्या अपेक्षा समजून घेतल्या पाहिजेत. आगामी स्थानिक स्वराज्य संस्थांच्या निवडणुकांची ही रंगीत तालीम आहे. ग्रामपंचायत निवडणुकांमध्ये राष्ट्रवादी काँग्रेसच्या विचारांचे जे लोक निवडून आले आहेत, त्यांचे अभिनंदन असे अजित पवार यांनी म्हटले होते.

कोरोना काळात घेतलेल्या निर्णयांची शिंदे-फडणवीस सरकारकडून पूर्तता नाही: शरद पवार

शरद पवार यांनी आजच्या पत्रकार परिषदेत शिंदे-फडणवीस सरकार कोरोना काळात घेतलेल्या निर्णयांची अंमलबजावणी करत नसल्याचा आरोप केला. त्यामुळे जनतेमध्ये नाराजी असल्याचे त्यांनी म्हटले. कोरोना काळात काही मुलांचे पालक मृत्युमुखी पडले होते. अशा मुलांना मदत करण्यासंदर्भात तत्कालीन अर्थमंत्री अजित पवार यांनी धोरण जाहीर केले होते. परंतु, शिंदे-फडणवीस सरकारने हे अनुदान स्थगित केले आहे. कोरोना काळात राज्यात आई आणि वडील यांच्यापैकी एक पालक गमावलेल्या मुलांची संख्या २० हजार आहे. तर आई-वडील दोघांना गमावलेल्या मुलांची संख्या ८०० इतकी आहे. या सगळयांचे अनुदान राज्य सरकारने स्थगित केल्याची माहिती आहे. तसे नसेल तर राज्य सरकारने त्याबाबत स्पष्टीकरण द्यावे, अशी मागणी शरद पवार यांनी केली.



Source link

Leave a Reply

Your email address will not be published.