म. टा. विशेष प्रतिनिधी, नाशिकः राज्यातील सत्तांतरानंतर शिंदे गटाला पुढे करत शिवसेना फोडणाऱ्या भाजपलाच नाशिकमध्ये शिवसेनेने धक्का दिला आहे. भाजपच्या माजी नगरसेविकेस शिवबंधन बांधत अन् डझनभरांना गळाला लावणाऱ्या शिवसेनेच्या पवित्र्यामुळे आता भाजपवरच ‘डॅमेज कंट्रोल’ची वेळ आली आहे.

माजी नगरसेवक प्रवीण तिदमे यांनी शिवसेनेला ‘जय महाराष्ट’ करीत शिंदे गटात प्रवेश केल्यानंतर शिवसेनेच्या पदाधिकाऱ्यांनी भाजपच्या माजी नगरसेविका पूनम धनगर यांचा शिवसेनेत प्रवेश घडवून आणत शिंदे गटासह भाजपला जशास तसे उत्तर दिले आहे. गत महापौर निवडणुकीत बंडाचा झेंडा हाती घेणारे भाजपचे आणखी दहा नगरसेवक शिवसेनेच्या वाटेवर असल्याची चर्चा असून, महापालिका निवडणुकीच्या पार्श्वभूमीवर आता भाजपवर ‘डॅमेज कंट्रोल’ची वेळ आली आहे.

राज्यात महाविकास आघाडीचे सरकार असताना महापालिका निवडणुकांच्या तोंडावर भाजपकडून शिवसेनेत नगरसेवकांचे ‘इनकमिंग’ सुरू झाले होते. परंतु, मुख्यमंत्री एकनाथ शिंदे यांच्या बंडखोरीनंतर महाराष्ट्रात फोडाफोडीच्या राजकारणाला वेग आला आहे. शिवसेनेचे ४० आमदार, १२ खासदार आणि मुंबई, पुणे, ठाण्यातील काही नगरसेवक शिंदे गटात दाखल झाले आहे. त्यामुळे महापालिका निवडणुकांच्या तोंडावर शिवसेना कमकुवत होईल, असे चित्र निर्माण झाले आहे. त्यातच नाशिकमध्ये शिवसेना बंडानंतरही अभेद्य होती. परंतु. आता तिदमे यांच्या रुपाने नाशिकमध्येदेखील शिवसेनेला गळती लागली आहे. ही गळती रोखण्यासाठी शिवसेनेच्या स्थानिक पदाधिकाऱ्यांनी शिवसेनेच्या सर्व माजी नगरसेवकांच्या घरी जाऊ भेटी घेतल्यानंतर नाशिकमधील शिवसेनेचे जिल्हा संपर्कप्रमुख भाऊसाहेब चौधरी, उपनेते सुनील बागूल, जिल्हाप्रमुख विजय करंजकर, महानगरप्रमुख सुधाकर बडगुजर, माजी जिल्हाप्रमुख दत्ता गायकवाड, मनपातील माजी विरोधी पक्षनेते अजय बोरस्ते, माजी गटनेते विलास शिंदे आदींसह सर्व प्रमुख पदाधिकारी, माजी नगरसेवकांनी शुक्रवारी थेट ‘मातोश्री’वर पक्षप्रमुख उद्धव ठाकरे यांची भेट घेऊन ठाकरेंची भेट घेत भाजपच्या एका माजी नगरसेविकाचा पक्षप्रवेश घडवून आणला. तिदमे यांनी शिंदे गटात प्रवेश केला असला, तरी शिवसेनेचे अन्य नगरसेवक व पदाधिकारी मात्र शिवसेनेबरोबर एकनिष्ठ असल्याचे पक्षप्रमुखांना आश्वस्त करताना भाजपच्या माजी नगरसेविका धनगर यांचा पक्षप्रवेश घडवून आणत धक्कातंत्राचा अवलंब शिवसेनेच्या पदाधिकाऱ्यांना केला.

भाजपला नाराजी भोवणार

भाजपच्या सत्ताकाळातील दुसऱ्या महापौरपदाच्या निवडणुकीत भाजपचे १२ नगरसेवक फुटले होते. परंतु, ऐनवेळी झालेल्या राजकीय घडामोडींनंतर या नगरसेवकांच्या बंडखोरीवर पडदा पडला. परंतु, निवडणूक संपल्यानंतर भाजपने या १२ नगरसेवकांना वाळीत टाकले होते. त्यामुळे हे सर्व बंडखोर माजी नगरसेवक आता शिवसेनेच्या वाटेवर असल्याचे बोलले जात आहे. सीमा ताजणे यांच्यानंतर पूनम धनगर यांच्या शिवसेनाप्रवेशाने या वृत्ताला दुजोरा मिळू लागला आहे. त्यामुळे एकीकडे शिंदे गटाच्या माध्यमातून शिवसेनेला सुरुंग लावणाऱ्या भाजपसमोरच आता पेच निर्माण झाला आहे.

भाजपमध्ये आम्हाला वाळीत टाकल्यागत वागणूक दिली जात होती. नेत्यांकडून विश्वासात घेतले जात नव्हते. कनिष्ठ नगरसेवक म्हणून डावलण्यात येत होते. त्यामुळे आपण शिवसेनेत प्रवेश केला असून, आता शिवसेनेशी एकनिष्ठ राहून पक्षवाढीसाठी प्रयत्न करणार आहे.

-पूनम धनगर, माजी नगरसेविका



Source link

Leave a Reply

Your email address will not be published.