मुंबई: राज्यात शिंदे-फडणवीस सरकारची सत्ता आल्यापासून शिंदे गटाचे आमदार आणि मंत्री कोणत्या ना कोणत्या कारणामुळे वादाच्या भोवऱ्यात सापडताना दिसत आहेत. यामध्ये आता मुख्यमंत्री एकनाथ शिंदे यांचे पुत्र श्रीकांत शिंदे यांची भर पडली आहे. राष्ट्रवादी काँग्रेसचे प्रवक्ते रविकांत वरपे यांनी श्रीकांत शिंदे यांचा एक फोटो ट्विट केला आहे. या फोटोमध्ये श्रीकांत शिंदे (Shrikant Shinde) हे वर्षा बंगल्यावर मुख्यमंत्र्यांच्या खुर्चीत बसल्याचा दावा वरपे यांच्याकडून करण्यात आला आहे. यावरुन वरपे यांनी शिंदे पितापुत्रांवर निशाणा साधला आहे. खा.श्रीकांत शिंदे यांना सुपर सीएम झाल्याबद्दल हार्दिक शुभेच्छा. मुख्यमंत्र्यांच्या गैरहजेरीत त्यांचे चिरंजीव मुख्यमंत्री पदाचा कारभार सांभाळतात.लोकशाहीचा गळा घोटण्याचे काम सुरूय.हा कोणता राजधर्म आहे?असा कसा हा धर्मवीर?, असे रविकांत वरपे यांनी ट्विटमध्ये म्हटले. श्रीकांत शिंदे यांचे मुख्यमंत्र्यांचे खुर्चीत बसले असतानाचे छायाचित्र सोशल मीडियावर तुफान व्हायरल झाले आहे. यावरुन अनेकजण राज्य सरकारवर टीका करताना दिसत आहेत. मात्र, हे छायाचित्र वर्षा बंगल्यावरच टिपण्यात आलेले आहे किंवा नाही, याबाबत अद्याप अधिकृत खुलासा होऊ शकलेला नाही.

मुख्यमंत्री एकनाथ शिंदे हे मुंबईत नसताना श्रीकांत शिंदे हे वर्षा बंगल्यावर आलेल्या नेत्यांचे आगतस्वागत करताना दिसतात. काही दिवसांपूर्वीच अजित पवार यांचे पुत्र पार्थ पवार हे गणपतीच्या दर्शनासाठी वर्षा बंगल्यावर आले होते. त्यावेळी एकनाथ शिंदे हे पुणे दौऱ्यावर होते. तेव्हा श्रीकांत शिंदे यांनी पार्थ पवार यांचे स्वागत केले. यावेळी गणपतीचे दर्शन घेतल्यानंतर पार्थ पवार आणि श्रीकांत शिंदे यांनी काही काळ गप्पाही मारल्या होत्या.

‘बाबा २० तास काम करतात हे जयंत पाटलांच्या डोळ्यात खुपतं’

सर्वोच्च न्यायालयाचे सरन्यायाधीश महाराष्ट्रपुत्र उदय लळीत यांच्या सत्कारासाठी मुख्यमंत्री एकनाथ शिंदे यांनी उपस्थिती लावली होती. शिवसेना कुणाची यावरुन शिंदे विरुद्ध ठाकरे असा न्यायालयीन वाद सुरु असताना मुख्यमंत्री आणि सरन्यायाधीशांनी एकत्र मंच शेअर केल्याच्या घटनेवर राष्ट्रवादीने आक्षेप नोंदवत एकनाथ शिंदे यांच्यावर जळजळीत टीका केली होती. त्यांच्या टीकेला खासदार श्रीकांत शिंदे यांनी प्रत्युत्तर दिले होते. शिंदेसाहेब २० तास काम करतात हे विरोधकांना बघवत नाही, त्यांच्या डोळ्यात तेच खुपतं, असं श्रीकांत शिंदे यांनी म्हटले होते.



Source link

Leave a Reply

Your email address will not be published.