सिंबायोसिस शाळेच्या विद्यार्थ्यांचा जपान दौरा:शिक्षण प्रणाली, तांत्रिक प्रगती आणि शाश्वत पद्धतींचा केला अभ्यास

सिंबायोसिसच्या पुणे आणि नाशिक येथील शाळेतील इयत्ता ८ वी व ९ वी च्या २६ विद्यार्थ्यांच्या गटाने जपान येथे शैक्षणिक दौरा केला. डॉ. गार्गी मित्रा, प्रमुख, सिंबायोसिस स्कूल्स सेंट्रल डायरेक्टोरेट व क्षिप्रा पोतदार यांच्यासमवेत विद्यार्थ्यांना जपानची शिक्षण प्रणाली, तांत्रिक प्रगती आणि शाश्वत पद्धतींचा अभ्यास केला तसेच विद्यार्थ्यांना जपान चा समृद्ध सांस्कृतिक वारसा अनुभवण्याची संधी देखील मिळाली. विद्यार्थ्यांनी टोकियो आणि टाकासाकी येथील शाळांना भेट दिली. तेथील शिस्तबद्ध शैक्षणिक दिनचर्या आणि सहयोगी पद्धतींचे निरीक्षण केले. या भेटींमध्ये आदर, जबाबदारी आणि टीमवर्क या मूल्यांवर भर देण्यात आला. विभिन्न सांस्कृतिक देवाणघेवाण सत्रांमुळे विद्यार्थ्यांना त्यांच्या जपानी समवयस्कांशी थेट संवाद साधण्याची, अनुभवांची देवाणघेवाण करण्याची संधी मिळाली. तेथे विद्यार्थ्यांसाठी सोसायटी ५.० याविषयावर व्याख्यानाचे आयोजन करण्यात आले होते याअंतर्गत विद्यार्थ्यांना शाश्वतता, नवकल्पनासह तंत्रज्ञान एकत्रित करण्याच्या जपानच्या अग्रेषित-विचार करण्याच्या दृष्टिकोनाची माहिती देण्यात आली. भारत आणि जपान या दोन्ही देशांसमोरील असलेल्या पर्यावरणीय आव्हानांवर देखील विद्यार्थ्यांनी चर्चा केली. याव्यतिरिक्त विद्यार्थ्यांनी विविध सांस्कृतिक उपक्रमांमध्ये भाग घेतला, ज्यामध्ये त्यांना जपानच्या पारंपारिक कलांची ओळख करून देण्यात आली. प्रेक्षणीय स्थळांसोबतच विद्यार्थ्यांनी युनेस्कोच्या जागतिक वारसा स्थळ असलेल्या जगप्रसिद्ध टोमियोका सिल्क मिलला भेट दिली, जिथे विद्यार्थ्यांनी जपानच्या रेशीम उद्योगाबद्दल आणि १९ व्या शतकाच्या उत्तरार्धात देशाच्या औद्योगिकीकरणासाठी कारणीभूत ठरलेले ऐतिहासिक महत्त्व जाणून घेतले. जपानचा शैक्षणिक दौरा हा सिंबायोसिस च्या एक ज्ञानवर्धक आणि परिवर्तनकारी अनुभव होता, ज्यामध्ये सांस्कृतिक देवाणघेवाण, शैक्षणिक शोध इत्यादींचा समावेश होता. जपानच्या प्राचीन परंपरा आणि आधुनिक नवकल्पनांचा अभ्यास करून, विद्यार्थी विस्तृत दृष्टीकोन आणि जागतिक नागरिकत्वाच्या नव्या जाणिवेसह परतले.