[ad_1]

म.टा.वृत्तसेवा,चंद्रपूर: दोन वाघांच्या झुंजीत एका वाघाचा मृत्यू झाल्याची घटना मंगळवारी दुपारी चिमूरपासून १५ किमी अंतरावरील वाहनगाव येथील शेतात घडली. मृत्युमुखी पडलेला वाघ हा ताडोबा-अंधारी व्याघ्र प्रकल्पातील आकर्षण असलेला बजरंग असल्याचे समोर आले आहे. तर दुसरा वाघ जखमी झाला आहे.

चिमूर वनपरिक्षेत्रांतर्गत खडसंगी नियतक्षेत्रातील वाहनगाव येथील सुभाष दोडके यांच्या शेतात वाघांची झुंज सुरू होती. शेतात हा थरार घडत असताना आसपास शेतकरी कामात गुंतलेले होते. पण आवाज झाल्याने ते सतर्क झाले. आवाज शांत झाल्यावर दबक्या पावलांनी गावकरी घटनास्थळी गेले असता त्यांना एक वाघ तेथून जखमी अवस्थेत निघून जाताना दिसला, तर दुसऱ्या वाघाचा मृतदेह तेथे आढळला. याबाबतची माहिती मिळताच घटनास्थळी वनविभागाचे अधिकारी व कर्मचारी तातडीने दाखल झाले. मृतावस्थेत आढळलेला वाघ हा सुमारे सात वर्षांचा असून त्याच्या शरीरभर जखमांच्या खुणा आहेत. चावा घेतल्याचे स्पष्टपणे दिसत असून झुंजीत मृत्यू झाल्याची दाट शक्यता वनविभागाच्या सूत्रांनी व्यक्त केली. मृत वाघाला बघण्यासाठी शेकडो गावकऱ्यांनी गर्दी केली होती. रात्र झाल्याने वाघाचे शवविच्छेदन बुधवारी केले जाणार असल्याची माहिती आहे.

धिप्पाड शरीरयष्टीचा ‘बजरंग’ गेला

कायम रामाची सोबत करणारा बजरंगबली म्हणजेच हनुमान. ताडोबा-अंधारी व्याघ्र प्रकल्पातील ‘बजरंग’ हा वाघही त्यापेक्षा कमी नव्हता. धिप्पाड शरीरयष्टीचा हा वाघ म्हणजे ताडोबाची शान आणि त्याने या व्याघ्र प्रकल्पातील मोठ्या क्षेत्रावर स्वत:चे साम्राज्य स्थापन केले होते. २०११मध्ये वाघडोह येथे झालेल्या संघर्षानंतर मोहर्ली पर्वतरांगेतून ‘येडाअण्णा’चे वर्चस्व संपुष्टात आले. त्यानंतर ‘माधुरी’ आणि ‘वाघडोह’ यांची वंशावळ समोर आली. ताडोब्यातील कोणत्याही वाघांपैकी तो बहुदा सर्वात मोठा वाघ होता. ताडोबा हे ‘बजरंग’चे साम्राज्य होते. आजवरच्या झुंजीत तो यशस्वी झाला, पण या झुंजीत तो पराभूत झाला. याची पुस्ती वनविभागानेदेखील केली.
दिवाळी सुट्टीत ताडोबा गजबजणार! पर्यटकांच्या सफारीसाठी उड्या; ऑनलाइन बुकिंग फुल्ल
साडेदहा महिन्यांत देशभरात १६० वाघांचा मृत्यू

मागील साडेदहा महिन्यांत देशभरात १६०, तर राज्यात सुमारे ४२ वाघांचा मृत्यू झाला असल्याचे समोर आले आहे. ही मागील ११ वर्षांतील सर्वाधिक आकडेवारी आहे. देशभरात २०२२च्या व्याघ्रगणनेनुसार ३ हजार १६७ वाघांची नोंद झाली आहे. वाघांच्या वाढत्या संख्येचे आशादायी चित्र यानिमित्ताने दिसले. हे घडत असतानाच वन्यजीवांच्या झुंजीत, अपघातात, शिकारीत आणि नैसर्गिकरित्या वाघांचे मृत्यूही वाढले आहेत. महाराष्ट्रात सर्वाधिक मृत्यू असल्याचे दिसत असून मध्य प्रदेशात सर्वाधिक ३८ वाघांचा मृत्यू झाला आहे. यापूर्वी २०२१ मध्ये सर्वाधिक १२७ वाघांचा मृत्यू झाला होता. यंदा प्रथमच ही संख्या दीडशे पार गेली आहे.

ताडोब्यात पर्यटकांची गर्दी

दिवाळीच्या सुट्टीमध्ये अनेकांनी ताडोब्यात पर्यटनाचा बेत आखला आहे. त्यामुळे ताडोबा-अंधारी व्याघ्र प्रकल्प पर्यटकांनी गजबजला आहे. सफारीसाठी गर्दी दिसून येत आहे.

पर्यटकांनी दिवाळी सुट्टीत सफारीसाठी ऑनलाइन बुकिंग करून ठेवले होते. कोअर झोनमधील सर्वच सहा गेट हे ५ डिसेंबरपर्यंत फुल्ल झाले असल्याची माहिती सूत्रांनी दिली. सुट्टयांमुळे संपूर्ण परिवाराला सफारीचा आनंद घेता येत आहे. येथे येणाऱ्या पर्यटकांमध्ये मोठा उत्साह दिसत आहे. प्रकल्पात सकाळ व दुपार सफारीत पर्यटकांना व्याघ्रदर्शनही होत आहे. पुढील आठवडाभर पर्यटकांची रेलचेल राहणार असल्याचे स्पष्ट संकेत आहेत. दरम्यान, व्याघ्र मृत्यूची बातमी पर्यटकांना चटका देऊन गेली आहे.

[ad_2]

Source link

Leave a Reply

Your email address will not be published. Required fields are marked *