उदयनराजे भोसलेंनी घेतली फडणवीस-अजित पवारांची भेट:शिवेंद्रराजेंच्या मंत्रिपदासाठी लॉबिंग? राजकीय वर्तुळात चर्चांना उधाण

खासदार छत्रपती उदयनराजे भोसले यांनी राष्ट्रवादी काँग्रेस पक्षाचे राष्ट्रीय अध्यक्ष आणि उपमुख्यमंत्री अजित पवार यांची देवगिरी बंगल्यावर तर सागर बंगल्यावर जाऊन उपमुख्यमंत्री देवेंद्र फडणवीस यांची देखील भेट घेतली आहे. यावेळी उदयनराजे भोसले यांनी सत्कार देखील केला आहे. विधानसभा निवडणुकीत मिळालेल्या यशाबद्दल उदयनराजे भोसले यांनी अजित पवार यांचा छत्रपती शिवाजी महाराजांची मूर्ती भेट देऊन सत्कार केला. यावेळी आमदार अतुल भोसले हे देखील उपस्थित होते. यानंतर देवेंद्र फडणवीस यांची सागर बंगल्यावर जाऊन भेट घेत त्यांचा देखील सत्कार केला आहे. उदयनराजे भोसले यांनी घेतलेल्या या भेटीनंतर शिवेंद्रराजेंच्या मंत्री पदासाठी लॉबींग केली जात असल्याचे बोलले जात आहे. उदयनराजेंनी 5 आमदारांसह खा. उदयनराजे भोसले यांनी देवेंद्र फडणवीस यांची भेट घेतल्याने राजकीय वर्तुळात चर्चा रंगण्यास सुरुवात झाली आहे. कोरेगावचे आमदार महेश शिंदे, कराड उत्तरचे आमदार मनोज घोरपडे, कराड दक्षिणचे आमदार अतुल भोसले आणि शिवेंद्रराजे भोसले यांच्यासह खासदार उदयनराजे भोसले यांनी भेट घेतली आहे. दरम्यान, महाराष्ट्रात महायुतीला प्रचंड बहुमत मिळाले असून सत्ता स्थापन केली आहे. मात्र अजूनही मुख्यमंत्री पदासाठी महायुतीमध्ये चर्चा सुरू असल्याचे दिसत आहे. देवेंद्र फडणवीस यांना मुख्यमंत्री करण्यासाठी भाजपच्या नेत्यांकडून आग्रह धरला जात आहे. तसेच एकनाथ शिंदे यांनाच पुन्हा एकदा मुख्यमंत्री करण्याची मागणी शिवसेनेकडून केली जात आहे. अशात अजित पवारांनी देखील मागे मुख्यमंत्री होण्यास इच्छुक असल्याचे बोलून दाखवले होते. त्यामुळे आता मुख्यमंत्री कोण होणार याकडे महाराष्ट्राचे लक्ष लागले आहे.