वाढदिवसाची तारीख, लग्नाची तारीख, भाग्यांक, जन्मांक असे अंक दैनंदिन वापरात आणण्यासाठी सर्वसामान्यांचा आग्रह असतो. लाखो रुपयांचे वाहन खरेदी केल्यानंतर त्याचा क्रमांक मनासारखा मिळवण्यासाठी वाहनचालक आरटीओमध्ये चकरा मारतात. आरटीओबाहेरील दलाल वाहनचालकांना हेरून त्यांच्याकडून हजारो रुपये उकळतात. या दलालीवर नियंत्रण ठेवण्यासाठी आवडीचा वाहनक्रमांक ऑनलाइन उपलब्ध करून देण्यात येत आहे. त्यासाठी लागणारे शुल्कही वाहनधारकांना संकेतस्थळावर भरता येणार आहे.
गुड न्यूज: मध्य-पश्चिम रेल्वेच्या ९१९ विशेष फेऱ्या, रेल्वे प्रशासनाचा मोठा निर्णय; जाणून घ्या
‘वाहन क्रमांकाची मालिका आणि परिवहन संकेतस्थळाचे सॉफ्टवेअर यांच्या जोडणीचे काम पूर्ण झाले आहे. परिवहनच्या संकेतस्थळाला पेमेंट गेटवे जोडण्यात येईल. यामुळे सर्व ऑनलाइन पर्यायांमधून वाहनचालकांना शुल्क भरून क्रमांक घेता येईल. यामुळे प्रवाशांना आरटीओमध्ये न येता वाहन विक्रेत्यांसह डिलरकडून वाहनाला नंबर प्लेट बसवूनच नव्या वाहनाचा ताबा मिळवता येईल. हा प्रस्ताव तयार असून परिवहन आयुक्तांच्या मंजुरीनंतर याची अंमलबजावणी सुरू होणार आहे’, असे परिवहन आयुक्तालयातील वरिष्ठ अधिकाऱ्यांनी सांगितले.
वाहनधारकांच्या सुविधेसाठी आरटीओतील लर्निंग लायसन्स, लायसन्सवरील पत्ता बदलणे, जन्मतारीख बदलणे, लायसन्स हरवल्यास दुय्यम प्रत काढणे, वाहन हस्तांतरीत करणे, गहाळ झालेल्या ‘आरसी’ची दुय्यम प्रत काढणे यांसह आरटीओतील पन्नासहून अधिक सेवा वाहनचालकांना ऑनलाइन उपलब्ध आहेत.
सध्या काय ?
नवे वाहन घेतल्यावर त्याला तात्पुरता वाहन क्रमांक देण्यात येतो. कायमस्वरूपी क्रमांक घेण्यासाठीची प्रक्रिया आरटीओमध्ये पूर्ण होते. सध्या पसंतीचा वाहनक्रमांक ऑनलाइन उपलब्ध आहे. मात्र तो आरक्षित करून वाहनाला देण्यापर्यंत संपूर्ण प्रक्रिया पूर्ण करण्यासाठी आरटीओमध्ये यावे लागते.
ही प्रक्रिया वेळखाऊ असल्याने वाहनचालक दलालांकडे जातात.
गाडीसह क्रमांकही शोरूममध्ये
वाहन विक्रेते आणि डिलरला वाहन नोंदणी करण्याची मुभा परिवहन विभागाने दिली आहे. आवडीचा वाहन क्रमांक ऑनलाइन आरक्षण केल्यानंतर तात्पुरत्या वाहन क्रमांकाची गरज भासणार नाही. यामुळे प्रवाशांना एकाचवेळी वाहन खरेदीची क्रमांकासह प्रक्रिया पूर्ण करता येणार आहे.
‘एसटी’चीही दिवाळी, १० दिवसांत तब्बल २०० कोटींचा महसूल; धनत्रयोदशीचा मुहूर्त फळला