गरीब कुटुंबात जन्म
प्रेम गणपती यांचा जन्म तामिळनाडूतील तुतीकोरीन जिल्ह्यातील नागलापुरम येथे एका गरीब कुटुंबात झाला. कुटुंब अत्यंत गरीब असल्यामुळे ते दहावीपर्यंतच शिकू शकले. कुटुंबात आई-वडिलांशिवाय प्रेमसह सात भाऊ-बहीण होते. आपल्या कुटुंबाला उदरनिर्वाहासाठी मदत करण्यासाठी, प्रेम यांनी लहानपणापासूनच चेन्नईमध्ये छोट्या-मोठ्या नोकऱ्या करायला सुरुवात केली, ज्यामुळे त्यांना महिन्याला सुमारे २५० रुपये मिळायचे. हे पैसे ते त्यांच्या घरी पाठवत असत.
कामाच्या शोधात मुंबईत आले
प्रेम गणपती मित्रासोबत मुंबईला आले होते. मित्राने प्रेम यांना १२०० रुपयांची नोकरी देण्याचे आश्वासन दिले होते, मात्र त्याच मित्राने त्यांची फसवणूक करून त्यांचे पैसे वांद्रे रेल्वे स्थानकावरून घेऊन गेला. प्रेम यांची अडचण अशी होती की ते इथे कोणालाच ओळखत नव्हते आणि मुंबईची भाषाही त्यांच्यासाठी परिचयाची नव्हती. बळजबरीने त्यांना ढाब्यावर काम करावे लागले, कारण घरी जाण्याचा प्रश्नच नव्हता.
१५० रुपयांना भांडी धुतली
प्रेम यांनी माहीममधील एका छोट्या बेकरीमध्ये १५० रुपये प्रति महिना पगारावर भांडी साफ करण्याचे काम केले. पैसे वाचवण्यासाठी ते रात्री एका छोट्या रेस्टॉरंटमध्ये स्वयंपाकी म्हणून काम करू लागले. प्रेम यांना डोसा बनवण्याचा शौक होता आणि या छंदामुळे ढाबा मालक प्रेमावर खुश असायचे.
असा सुरु केला स्वतःचा बिझनेस
१९९२ पर्यंत, प्रेम गणपती यांनी स्वतःचा खाद्य व्यवसाय सुरू करण्यासाठी पुरेशी बचत केली होती. इडली आणि डोसा विकण्याचा व्यवसाय त्यांनी सुरू केला. प्रेम यांनी १५० रुपयांना एक गाडी भाड्याने घेतली आणि आणखी १००० रुपयांना भांडी, एक स्टोव्ह आणि इतर वस्तू खरेदी केल्या. प्रेम यांनी त्यांचे दोन भाऊ मुरुगन आणि परमशिवन यांनाही या व्यवसायात सामील करून घेतले होते.
अशा प्रकारे यश मिळाले
लोकांना प्रेम गणपती यांचा डोसा आवडू लागला. यानंतर त्यांचा व्यवसाय वाढत गेला. लवकरच प्रेम यांनी त्यांच्या रेस्टॉरंटमध्ये २० प्रकारचे डोसे बनवायला सुरुवात केली. नवीन डोसा खाण्यासाठी लोकांची गर्दी होऊ लागली. यामुळे प्रोत्साहित होऊन प्रेम यांनी आपल्या रेस्टॉरंटचा आणखी विस्तार केला आणि डोसांच्या विविधतेकडे अधिक लक्ष देण्यास सुरुवात केली. १९९७ मध्ये प्रेम गणपती आणि त्यांच्या भावांनी ५०,००० रुपये जमा करून वाशी परिसरात एक छोटी जागा भाडेतत्त्वावर घेतली आणि त्याला प्रेमसागर डोसा प्लाझा असे नाव दिले. २००२ पर्यंत, प्रेम गणपती यांच्या प्रेमसागर डोसा प्लाझाने डोसाच्या १०५ पेक्षा जास्त प्रकारांची ऑफर सुरू केली. त्यांचे आउटलेट खूप लोकप्रिय होत गेले.
परदेशातही केली सुरुवात
२००८ मध्ये, डोसा प्लाझाने आशियातील सर्वात मोठ्या मॉलमध्ये आपली उपस्थिती दर्शविली. त्याच वर्षी डोसा प्लाझाने न्यूझीलंडमध्ये आउटलेट उघडून आंतरराष्ट्रीय बाजारपेठेत प्रवेश केला. तोपर्यंत भारतात ३५ आउटलेट होते. आज प्रेम गणपती देशाबरोबरच परदेशातही प्रसिद्ध आहेत.