पुणे येथील पिंपरी चिंचवड मार्केटमध्ये भर दिवसा व्यापारी तरुणावर गोळीबार झाल्याची घटना घडली आहे. या घटनेने शहरात भीतीचे वातावरण निर्माण झाले आहे. दुचाकीवर येऊन अज्ञात हल्लेखोरांनी येथील व्यापाऱ्यावर गोळीबार केला. या गोळीबारात तरुणाच्या पायाला गोळी लागल्याची माहिती समोर आली आहे. पिंपरी पोलिस घटनास्थळी दाखल झाले असून तपास सुरू करण्यात आला आहे. मिळालेल्या माहितीनुसार, पिंपरी कॅम्प मार्केट परिसरात आज दुपारच्या सुमारास एका 20 वर्षीय व्यापारी तरुणावर दुचाकीवर आलेल्या एका अज्ञात गुन्हेगाराने गोळीबार केला. गोळीबार करून गुन्हेगारांनी तरुणाच्या गळ्यातील सोन्याचे ऐवज पळवले आहे. भावेश कंकरानी असे या व्यापारी तरुणाचे नाव असून त्याच्या दुकानासमोर अज्ञात गुन्हेगाराने गोळीबार केला. या हल्ल्यात भावेशच्या पायाला गोळी लागली असून त्याच्यावर पिंपरीतील एका खाजगी रुग्णालयात उपचार करण्यात येत आहेत. या घटनेची माहिती मिळताच पिंपरी चिंचवड पोलिस दलातील वरिष्ठ अधिकारी घटनास्थळी दाखल झाले असून तपास सुरू केला आहे. परंतु, भर दिवसा तसेच भर बाजारात गोळीबार झाल्याने परिसरात व येथील नागरिकांमध्ये भीतीचे वातावरण निर्माण झाले आहे. तसेच गोळीबार करणाऱ्या गुन्हेगाराला तातडीने अटक करण्यात यावी, अशी मागणी येथील नागरिकांनी केली आहे. भावेश कंकरानी या व्यापारी तरुणावर गोळीबार नेमका कोणत्या उद्देशाने केला याचा तपास पोलिस करत आहेत. चोरीचा उद्देश होता की आणखी काही याचा सखोल तपास पिंपरी पोलिसांकडून केला जात आहे.
