नागपूरमधून एक धक्कादायक बातमी समोर आली आहे. नागपुरात सुरू असलेल्या कोऱ्हाडी मंदिराचा निर्माणाधीन गेट कोसळल्याची माहिती आहे. मिळालेल्या माहितीनुसार, या दुर्घटनेत गेटखाली अनेकजण दाबले गेल्याची माहिती आहे. तसेच, काही जखमी असल्याचेही सांगण्यात येत आहे. घटनेची माहिती मिळताच पोलिस प्रशासन तात्काळ घटनास्थळी दाखल झाले. सोबतच एनडीआरएफची टीमही घटनास्थळी दाखल झाली असून मदतकार्य राबवण्यात येत आहे. मिळालेल्या माहितीनुसार, या अपघातात जवळपास 5-6 मजूर जखमी झाले आहेत. जखमींना बाहेर काढले असून त्यांना उपचारासाठी तात्काळ रुग्णालयात दाखल करण्यात आले. सध्या त्यांच्यावर उपचार सुरू आहेत. ही घटना मंदिराच्या गेट नंबर 4 जवळ घडली आहे. या घटनेनंतर नागपूरचे पालकमंत्री चंद्रशेखर बावनकुळे यांनी प्रशासनाला तात्काळ मदतकार्य सुरू करण्याच्या सूचना दिल्या आहेत. जिल्हाधिकारी डॉक्टर विपिन इटनकर काय म्हणाले? या घटनेबाबत बोलताना नागपूरचे जिल्हाधिकारी डॉक्टर विपिन इटनकर म्हणाले- गेटचं काम सुरू असताना ही दुर्घटना घडली. यामध्ये काही मजूर अडकले होते. त्यांना किरकोळ दुखापत झाली असून या सर्वांना रुग्णालयात दाखल करण्यात आले आहे. यात कोणीही गंभीर जखमी झालेले नाही. त्यांच्यावर उपचार सुरू आहेत. या घटनेनंतर आम्हाला पालकमंत्र्यांचा फोन आला होता, त्यानुसार आम्ही काम करत आहोत. आता गेटखाली कोणीही नाही, अशी अपेक्षा आहे. परिस्थिती नियंत्रणात एका वरिष्ठ पोलिस अधिकाऱ्याने सांगितले- पोलिस गर्दीवर नियंत्रण मिळवण्याचे काम करत आहेत. जखमींना रुग्णालयात नेण्यात आले आहे. गेटखाली अजून कुणी दाबल्या गेलं आहे का? याची खात्री पोलिसांकडून केली जात आहे. तसेच, या ठिकाणची परिस्थिती सध्या नियंत्रणात आहे.
