भारतरत्न देताना महात्मा फुलेंचे माहात्म्य कमी होता कामा नये:छगन भुजबळांनी ठरावावर मांडली भूमिका, म्हणाले – जनतेने दिलेली ‘महात्मा’ ही पदवी सर्वोच्च

महाराष्ट्र विधिमंडळाने महात्मा फुले आणि क्रांतीज्योती सावित्रीबाई फुले यांना भारतरत्न पुरस्कार देण्याचा ठराव मांडला आहे. या निर्णयाचे आपण स्वागत करतो परंतु भारतरत्न देताना महात्मा फुले यांचे माहात्म्य कुठेही कमी होता कामा नये अशी भूमिका राज्याचे माजी उपमुख्यमंत्री छगन भुजबळ यांनी सभागृहात मांडली. राज्याच्या सुरू असलेल्या अर्थसंकल्पीय अधिवेशनात आज सरकारच्या वतीने राजशिष्टाचार मंत्री जयकुमार रावल यांनी सभागृहात महात्मा फुले आणि क्रांतीज्योती सावित्रीबाई फुले यांना भारतरत्न पुरस्कार देण्याचा ठराव मांडला. हा ठराव भारत सरकारकडे पाठविण्यात येणार आहे. या ठरावावर आज राज्याचे माजी उपमुख्यमंत्री छगन भुजबळ यांनी आपली भूमिका स्पष्ट केली. ठरावावर माजी उपमुख्यमंत्री छगन भुजबळ म्हणाले की, आज महाराष्ट्र विधानसभेने क्रांतिसूर्य महात्मा ज्योतिराव फुले आणि क्रांतीज्योती सावित्रीबाई फुले यांना देशाचा सर्वोच्च ‘भारतरत्न’ पुरस्कार प्रदान करुन गौरवण्याची शिफारस केंद्र सरकारकडे करण्याच्या एकमताने मंजूर केलेल्या ठरावाचे मी स्वागतच करतो. परंतु क्रांतिसूर्य महात्मा ज्योतिराव फुले यांना देशातील जनतेने दिलेली ‘महात्मा’ ही पदवी सर्वोच्च पदवी आहे. या देशात फक्त महात्मा फुले आणि महात्मा गांधी हे दोनच महात्मे असल्यामुळे भारतरत्न देताना महात्मा फुले यांचे माहात्म्य कुठेही कमी होता कामा नये, अशी भूमिका त्यांनी या ठरावावर विधानसभेत बोलताना मांडली. उपमुख्यमंत्री अजित पवारांनीही व्यक्त केल्या भावना महात्मा जोतिबा फुले आणि सावित्रीबाई फुले यांनी मुलींची पहिली शाळा पुण्यात सुरु करुन, स्त्रीशक्तीला शिक्षणाची दारे खुली करुन दिली. आज शेती, शिक्षण, ज्ञान, विज्ञान, संशोधन, अंतराळ, राजकारण, समाजकारण अशा सर्व क्षेत्रात महिला मोठ्या संख्येने जबाबदारीच्या पदांवर कार्यरत राहून देशाच्या विकासात आपले योगदान देत आहेत. याचे संपूर्ण श्रेय महात्मा फुले आणि सावित्रीबाईंनी त्या काळात दाखवलेल्या दूरदृष्टी, घेतलेल्या कष्टाला आहेत. समाजातील दुर्बल, वंचित, बहुजन समाजापर्यंत शिक्षणाची गंगा नेण्यासाठी या दाम्पत्याने केलेले कार्य अलौकिक आहे. त्यामुळेच शेतकरी, कष्टकरी घटकांसह समस्त देशवासीयांसाठी ते कायम ‘महात्मा’ राहणार आहेत. त्यांना ‘भारतरत्न’ देण्याचा महाराष्ट्र विधानसभेने मंजूर केलेला ठराव हा लोकभावनेचा आदर करणारा आणि ‘भारतरत्न’ पुरस्काराचा गौरव वाढवणारा ठराव आहे, अशा शब्दात उपमुख्यमंत्री अजित पवार यांनी आपल्या भावना व्यक्त केल्या आहेत.