फिनलंडचा महेश तांबे हा टी-२० आंतरराष्ट्रीय क्रिकेटमध्ये सर्वात कमी वेळेत ५ विकेट्स घेणारा गोलंदाज ठरला आहे. एस्टोनियाविरुद्धच्या सामन्यात तांबेने ८ चेंडूंत ५ फलंदाजांना पॅव्हेलियनमध्ये पाठवले. यापूर्वी हा विक्रम बहरीनच्या जुनैद अझीझच्या नावावर होता, ज्याने २०२२ मध्ये जर्मनीविरुद्ध फक्त १० चेंडूत ५ बळी घेतले होते. रविवारी फिनलंड आणि एस्टोनिया यांच्यात खेळल्या गेलेल्या तिसऱ्या टी-२० सामन्यात तांबेने ही कामगिरी केली. या सामन्यात फिनलंडने प्रथम गोलंदाजी करताना एस्टोनियाला १९.४ षटकांत १४१ धावांवर गुंडाळले. एकेकाळी एस्टोनियाने २ गडी गमावून १०४ धावा केल्या होत्या आणि मोठा स्कोअर उभारण्यास सज्ज दिसत होते, परंतु महेश तांबेने आपल्या शानदार गोलंदाजीने त्यांचा डाव उद्ध्वस्त केला. तांबेने स्टीफन गूच, साहिल चौहान, मुहम्मद उस्मान, रूपम बरुआ आणि प्रणय गीवाला यांचे बळी घेतले. तांबेने या पाचही फलंदाजांना फक्त १.२ षटकांत (८ चेंडू) बाद केले. त्याने २ षटकांत १९ धावा देत ५ बळी घेतले. फिनलंडने सामना ५ विकेट्सने जिंकला
फिनलंडने १८.१ षटकांत ५ गडी गमावून १४२ धावांचे लक्ष्य गाठले आणि सामना ५ गडी राखून जिंकला. फिनलंडकडून अरविंद मोहनने सर्वाधिक ६७ धावा केल्या. ६० चेंडूंच्या नाबाद खेळीत त्याने फराज मेहती अब्बास (१९) आणि जॉर्डन ओ’ब्रायन (१८) यांच्यासोबत महत्त्वाच्या भागीदारी केल्या आणि संघाला विजयाकडे नेले. या विजयासह फिनलंडने टी-२० मालिका २-१ अशी जिंकली. सर्वात जलद शतकाचा विक्रम साहिल चौहानच्या नावावर
आंतरराष्ट्रीय टी-२० मध्ये सर्वात जलद शतक करण्याचा विक्रम एस्टोनियाच्या साहिल चौहानच्या नावावर आहे. गेल्या वर्षी त्याने सायप्रसविरुद्ध फक्त २७ चेंडूत शतक झळकावले होते. आता महेश तांबेने एस्टोनियाविरुद्ध सर्वात जलद ५ बळी घेण्याचा विक्रम केला आहे.
