काश्मीर पोलीस-प्रशासनात मोठे फेरबदल:200हून अधिक अधिकाऱ्यांच्या बदल्या; यात 33 वरिष्ठ पोलिस अधिकाऱ्यांचा समावेश

निवडणूक आयोग आज जम्मू-काश्मीरमधील निवडणुकीच्या तारखा जाहीर करणार आहे. यापुर्वीच पोलीस व सामान्य प्रशासन विभागातील अधिकाऱ्यांच्या मोठ्या प्रमाणात बदल्या करण्यात आल्या आहेत. या अधिकाऱ्यांची संख्या 200 हून अधिक आहे. सर्वोच्च न्यायालयाच्या आदेशानुसार जम्मू-काश्मीरमध्ये 30 सप्टेंबरपूर्वी विधानसभा निवडणुका होणार आहेत. त्यामुळे 31 जुलै रोजी आयोगाने केंद्रशासित प्रदेश प्रशासनाला गृहजिल्ह्यांमध्ये नियुक्त केलेल्या अधिकाऱ्यांच्या बदल्या करण्यास सांगितले होते. गुरुवारी रात्री उशिरा सामान्य प्रशासन विभागाने तत्काळ प्रभावाने 89 बदल्यांचे आदेश जारी केले. यामध्ये पूंछ आणि बांदीपोरा जिल्ह्यांतील उपायुक्त, सचिव, आयुक्त, महासंचालक, व्यवस्थापकीय संचालक आणि अनेक विभागांचे संचालक यांचा समावेश आहे. या बदली प्रक्रियेचा उद्देश हा आहे की कोणताही अधिकारी त्याच्या गृहजिल्ह्यात पदावर राहू नये. तसेच, त्यांनी कोणत्याही एका पदावर 2 वर्षांपेक्षा जास्त काळ घालवला नसावा. विशेष महासंचालकांच्या नावाची एक दिवस आधी घोषणा करण्यात आली होती नलिन प्रभात यांची जम्मू-काश्मीरचे नवीन विशेष डीजी म्हणून नियुक्ती करण्यात आली आहे. सध्याचे डीजीपी आरआर स्वेन यांच्या निवृत्तीनंतर ते नवे पोलीस महासंचालक म्हणून पदभार स्वीकारतील. स्वेन 30 सप्टेंबरला निवृत्त होत आहेत. नलिन 1 ऑक्टोबर रोजी डीजीपी पदाचा कार्यभार स्वीकारतील. प्रभात, 55, हे तीन वेळा पोलीस शौर्य पदक विजेते आहेत आणि ते त्यांचे पूर्वीचे कॅडर राज्य, आंध्र प्रदेशमधील विशेष नक्षलविरोधी पोलीस दलाचे ग्रेहाऊंड्सचे प्रमुख होते. सरकारने बुधवारी प्रभात यांचा NSG महासंचालक म्हणून कार्यकाळ कमी केला आणि त्यांना आंध्र प्रदेशातून AGMUT मध्ये आंतर-कडर प्रतिनियुक्तीचे आदेश दिले. पोलीस खात्यातील 33 अधिकाऱ्यांच्याही बदल्या यामध्ये आयजीपी, डीआयजींसह अनेक वरिष्ठ पोलीस अधिकाऱ्यांच्या बदल्या करण्यात आल्या आहेत. तसेच अनेक जिल्ह्यांना नवे पोलीस प्रमुख मिळाले. निवडणूक आयोगाच्या सूचनेनुसार, 8 उपमहानिरीक्षक (डीआयजी) आणि 14 वरिष्ठ पोलीस अधीक्षक (एसएसपी) यांच्यासह 33 पोलीस अधिकाऱ्यांच्या तत्काळ प्रभावाने बदल्या करण्यात आल्या आहेत. नितीश कुमार यांना सीआयडी प्रमुख बनवण्यात आले आहे. सध्या हा विभाग सध्याचे डीजीपी आरआर स्वेन यांच्याकडे होता. ज्यांची बदली करण्यात आली आहे त्यात गुरिंदरपाल सिंग यांची बारामुल्ला एसएसपी म्हणून नियुक्ती करण्यात आली आहे. ते नागपूरे अमोद अशोक यांची जागा घेतील, ज्यांची उधमपूर एसएसपी म्हणून बदली करण्यात आली आहे. अमृतपाल सिंग, कमांडिंग ऑफिसर IR-2 यांची एसएसपी (टेक) सीआयडी मुख्यालयात नियुक्ती करण्यात आली आहे, तर मुमताज अहमद, कमांडिंग ऑफिसर 1 बॉर्डर बटालियन, जम्मू आता एसएसपी पूंछ म्हणून काम पाहतील.