भारतीय हवामान विभागाच्या मुंबई वेधशाळेने दिलेल्या पाच दिवसांच्या हवामान अंदाजानुसार, महाराष्ट्रात अनेक जिल्ह्यांत मध्यम ते अतिमुसळधार पावसाचा इशारा देण्यात आला आहे. 6 ऑगस्टपासून 10 ऑगस्ट पर्यंत कोकण, घाटमाथा, मराठवाडा आणि विदर्भ यामध्ये पावसाचे प्रमाण अधिक असणार आहे. त्यामुळे काही जिल्ह्यांना यलो तर काही ठिकाणी ऑरेंज अलर्ट दिला गेला आहे. विशेषतः कोकणातील रायगड, रत्नागिरी, सिंधुदुर्ग आणि पुणे, सातारा घाटमाथा यांना सतर्कतेचा इशारा देण्यात आला आहे. महाराष्ट्रात पुढील पाच दिवस पावसाचा जोर राहणार असून हवामान खात्याच्या सूचनांचे पालन करून नागरिकांनी सुरक्षिततेच्या दृष्टीने आवश्यक ती पावले उचलावीत. शेतकरी, विद्यार्थी, वाहनचालक व पर्यटकांनी हवामान अपडेट्सवर लक्ष ठेवणे आवश्यक असल्याचे प्रशासनाच्या वतीने कळवण्यात आले आहे. मराठवाडा व विदर्भातही पावसाचा इशारा मराठवाड्यातील लातूर, बीड, परभणी, नांदेड, हिंगोली, जालना, छत्रपती संभाजीनगर, धाराशिव याठिकाणी देखील 7 व 8 ऑगस्ट रोजी मध्यम ते जोरदार पावसाचा इशारा आहे. विदर्भातील यवतमाळ, वर्धा, नागपूर, चंद्रपूर, गोंदिया, गडचिरोली, भंडारा, अकोला, बुलढाणा, अमरावती या जिल्ह्यांमध्ये 8 ते 10 ऑगस्ट दरम्यान पावसाचा प्रभाव वाढणार आहे. यामुळे शेतीकामावर परिणाम होण्याची शक्यता असून, शेतकऱ्यांना विशेष खबरदारी घेण्याचे आवाहन हवामान विभागाकडून करण्यात आले आहे. कोकण व घाटमाथ्यावर मुसळधार पावसाचा धोका 6 ऑगस्टपासून सुरुवात होणाऱ्या पावसाच्या सत्रात रायगड, रत्नागिरी, सिंधुदुर्ग, पुणे घाट, सातारा घाट, कोल्हापूर, सांगली आणि सोलापूरसह घाटमाथ्याचे जिल्हे सर्वाधिक प्रभावित होणार आहेत. या भागांमध्ये पावसाचा जोर अधिक असणार असून दरडी कोसळण्याचा धोका वाढू शकतो. कोकण किनारपट्टीवर मुसळधार पावसामुळे पूरसदृश स्थिती निर्माण होण्याची शक्यता असून, स्थानिक प्रशासनाने आधीपासूनच खबरदारी घेण्यास सुरुवात केली आहे. नागरिकांना सतर्क राहण्याचे आवाहन हवामान खात्याने अलर्ट जारी करत नागरिकांनी नद्या, ओढ्यांच्या काठावर जाणे टाळावे, अशा सूचना दिल्या आहेत. तसेच, दरडी कोसळण्याच्या शक्यतेमुळे घाटमाथ्यावर पर्यटनास जाणाऱ्या नागरिकांनी विशेष दक्षता घ्यावी. शाळा, कार्यालये आणि स्थानिक वाहतूक व्यवस्थेवर याचा परिणाम होऊ शकतो. प्रशासनाने स्थानिक पातळीवर पावसाच्या स्थितीनुसार आवश्यक ती पावले उचलण्याचे निर्देश दिले आहेत. पूर प्रवण भागांत एनडीआरएफ व आपत्कालीन व्यवस्थापन दल तैनात ठेवण्याचे काम सुरू आहे. शेतीसाठी संधी आणि सावधगिरी दोन्ही गरजेची या पावसामुळे राज्यातील पेरण्या झालेल्या भागात पिकांसाठी पाणीपुरवठा सुनिश्चित होणार आहे, मात्र सततचा मुसळधार पाऊस काही ठिकाणी पिकांचे नुकसान करू शकतो. त्यामुळे कृषी विभागाने शेतकऱ्यांना पाण्याचा निचरा होईल याची व्यवस्था करण्याचा सल्ला दिला आहे. काही ठिकाणी जमिनीला चिकटपणा वाढल्याने मशागत व फवारणी कार्यात अडथळा येऊ शकतो. तसेच, विजांच्या कडकडाटासह पावसाचा इशारा असल्याने शेतात काम करताना योग्य ती काळजी घेणे गरजेचे आहे.
