कुरुंदा पोलिस ठाण्यांतर्गत दोन घटना:शेतकऱ्याने नापीकीला कंटाळून तर विद्यार्थीनीने अभ्यासाच्या तणावातून केली आत्महत्या

वसमत तालुक्यातील कुरुंदा पोलिस ठाण्यांतर्गत दोन वेगवेगळ्या घटनेत महागाव येथील शेतकऱ्याने नापीकीला कंटाळून तर कोर्टा येथील विद्यार्थीनीने अभ्यासाच्या तणावातून गळफास घेऊन आत्महत्या केल्याची घटना घडली आहे. या प्रकरणी कुरुंदा पोलिस ठाण्यात सोमवारी ता. १७ रात्री अकस्मात मृत्यूची नोंद झाली आहे. पोलिसांनी दिलेल्या माहितीनुसार, महागाव येथील शेतकरी बालाजी सवंडकर (४५) यांना दोघा भावांमध्ये मिळून चार एकर शेत आहे. या शेतावरच त्यांच्या कुटुंबाचा उदरनिर्वाह चालत होता. मात्र यावर्षी अतिवृष्टीमुळे खरीप हंगाम हाती आला नाही तर रब्बी हंगामातील पिकांनाही उतारा आला नाही. त्यामुळे आता उदरनिर्वाह कसा करावा असा प्रश्‍न त्यांच्या समोर उभा राहिला होता. त्यामुळे मागील काही दिवसांपासून ते अस्वस्थ होते. दरम्यान, रविवारी ता. १६ रात्रीच्या सुमारास शेतकरी बालाजी यांनी घरातील हॉलमध्ये गळफास घेऊन आत्महत्या केली. या प्रकरणी विश्‍वनाथ सवंडकर यांनी दिलेल्या माहितीवरून कुरुंदा पोलिस ठाण्यात सोमवारी ता. १७ अकस्मात मृत्यूची नोंद झाली आहे. सहाय्यक पोलिस निरीक्षक रामदास निरदोडे, जमादार भगीरथ सवंडकर यांच्या पथकाने घटनास्थळी भेट देऊन पाहणी केली आहे. मयत बालाजी यांच्या पश्‍चात पत्नी, एक मुलगा, एक मुलगी असा परिवार आहे. दरम्यान, आत्महत्येच्या अन्य एका घटनेत वसमत तालुक्यातील कोर्टा येथील आयोध्या रणमाळ (२५ रा. मुळगाव धार माथा, ता. औंढा) हि विद्यार्थीनी बीएस्सी प्रथमवर्षाला शिक्षण घेत होती. या अभ्यासाचा ताण आल्यामुळे तिने सोमवारी ता. १७ सायंकाळी पाच वाजता घरी कोणी नसतांना गळफास घेऊन आत्महत्या केली. सायंकाळी तिची आई शेतातून आल्यानंतर अयोध्याचा मृतदेह गळफास घेतलेल्या स्थितीत आढळून आला. कुरुंदा पोलिस ठाण्याचे सहाय्यक पोलिस निरीक्षक रामदास निरदोडे, उपनिरीक्षक आगलावे, जमादार भगीरथ सवंडकर, एल. बी. पोले यांच्या पथकाने घटनास्थळी भेट देऊन पाहणी केली. याप्रकरणी आत्माराम कदम यांच्या माहितीवरून कुरुंदा पोलिस ठाण्यात अकस्मात मृत्यूची नोंद झाली आहे.