हापूस प्रेमींसाठी गोड बातमी:देवगड अल्फोन्सोवर आता युनिक आयडी कोड बंधनकारक; बनावट विक्री रोखण्यासाठी निर्णय

हापूस प्रेमीसाठी एक अतिशय आनंदाची बातमी. हापूस आंब्याची तोतयागिरी आणि बनावट विक्री रोखण्यासाठी आता युनिक आयडी कोड लावण्यात येणार आहे. प्रत्येक आंब्यावर हा कोड लावला जाईल. त्यामुळे ग्राहकांना खरा हापूस ओळखणे अतिशय सोपे होणार आहे. देवगड अल्फोन्सो (हापूस) आंब्याच्या नावाने बाजारात बनावट आंब्यांची विक्री होते. हे रोखण्यासाठी ‘हापूस (अल्फोन्सो)’ च्या भौगोलिक संकेत (जी आय) टॅगची रजिस्टर्ड प्रोप्रायटर असलेल्या देवगड तालुका आंबा उत्पादक सहकारी संस्थेने पुढाकार घेतला आहे. या वर्षीपासून प्रत्येक देवगड हापूस आंब्यावर ‘टॅपर प्रूफ यूआयडी सील’ सक्तीचे करण्याचा निर्णय संस्थेने घेतला आहे. त्यामुळे आता प्रत्येक अस्सल देवगड हापूस आंब्यावर हा खास ‘टॅपर प्रूफ यूआयडी सील’ स्टिकर लावणे बंधनकारक असेल आणि असे युआयडी असलेले आंबेच ‘देवगड हापूस’ किंवा ‘देवगड अल्फोन्सो’ म्हणून विक्री किंवा विपणन करता येणार आहे. या उपक्रमामुळे देवगड हापूसच्या नावाखाली सर्रास होणारी बनावट आंब्यांची विक्री पूर्णतः बंद होतील आणि ग्राहकांना केवळ जीआय प्रमाणित, अस्सल देवगड हापूस आंबेच मिळतील असा संस्थेचा विश्वास आहे. देवगड तालुका आंबा उत्पादक सहकारी संस्था मर्यादितचे संचालक सदस्य ॲड. ओंकार एम. सप्रे म्हणाले की, देवगड तालुक्यातील हापूस आंबा गेल्या शतकाहून अधिक काळ आपल्या विशिष्ट सुगंध व चवीसाठी प्रसिद्ध आहे आणि त्याला बाजारात मोठी मागणी आहे. मात्र, सध्या देवगड हापूसच्या नावाखाली विक्री होणारे ८०% पेक्षा जास्त आंबे हे वास्तविक देवगडमधील नाहीत. गेल्या तीन दशकांपासून इतर भागांतील निकृष्ट दर्जाचे आंबे सर्रास देवगड हापूस म्हणून विकले जात आहेत. त्यामुळे देवगडमधील शेतकऱ्यांचे मोठे आर्थिक नुकसान होत आहे, त्याचे गंभीर सामाजिक दुष्परिणाम देखील होत आहेत. त्यामुळेच ‘हापूस (अल्फोन्सो)’ च्या जीआय टॅगची रजिस्टर्ड प्रोप्रायटर या नात्याने प्राप्त होणाऱ्या अधिकारांचा वापर करून संस्थेने ‘टॅपर प्रूफ युआयडी सील’ सक्तीचे करण्याचा हा महत्त्वाचा निर्णय घेतला आहे. या प्रकल्पाकरिता ‘टॅपर प्रूफ युआयडी सील’ चे पेटंट असलेल्या संस्थेने मुंबई स्थित सन सोल्यूशन्स संस्थेबरोबर करार केला आहे. ‘टॅपर प्रूफ युआयडी सील’ स्टिकर प्रणाली कशी काम करते? देवगड तालुका आंबा उत्पादक सहकारी संस्थेने जी आय नोंदणीकृत शेतकऱ्यांना त्यांच्याकडील झाडं संख्या व त्यांच्या उत्पादन क्षमतेनुसार ‘टॅपर प्रूफ युआयडी सील’ वितरित केले आहेत. शेतकऱ्यांनी बाज पाठवलेल्या प्रत्येक देवगड हापूस आंब्यावर हा यूआयडी स्टिकर लावणे बंधनकारक असेल. प्रत्येक स्टीकर दोन भागात विभागलेला एक स्वतंत्र यूआयडी असतो. त्या कोड चा एक भाग स्टीकर च्या वरती आणि दूसरा भाग स्टीकरच्या खाली असतो. आपल्याकडील आंबा देवगडचाच आहे का, हे तपासण्यासाठी ग्राहकांनी +91 9167 668899 या क्रमांकावर व्हॉट्सॲपच्या माध्यमातून फोटो पाठवायचा आहे.