अदानी-सोरोसवर संसदेत गदारोळ:बढतीसाठी सभापती धनखड बनले सरकारी प्रवक्ते- मल्लिकार्जुन खरगे

अदानी आणि सोरोस यांच्यावरून संसदेत गदारोळ सुरूच आहे. दरम्यान, राज्यसभेचे सभापती जगदीप धनखड यांच्याविरोधातील अविश्वास प्रस्तावावरून सरकार आणि विरोधकांमधील तणाव आणखी वाढला आहे. बुधवारीही संसदेचे कामकाज सुरळीत होऊ शकले नाही. दरम्यान, अविश्वास ठरावाचा बचाव करताना काँग्रेसचे अध्यक्ष मल्लिकार्जुन खरगे म्हणाले की, पुढील पदोन्नतीसाठी सभापतीच सरकारचे प्रवक्ते झाले आहेत. दुसरीकडे, गांधी कुटुंबाच्या सोरोस यांच्याशी असलेल्या संबंधांवरून लक्ष हटवण्यासाठी काँग्रेसने अविश्वास प्रस्ताव आणला, असा आरोप भाजपने केला आहे. विरोधकांच्या संयुक्त पत्रकार परिषदेत खरगे म्हणाले, ‘डॉ. राधाकृष्णन, शंकरदयाळ शर्मा, न्यायमूर्ती हिदायतुल्ला, के. आर. नारायणन यांसारखे दिग्गज नेते देशाचे उपराष्ट्रपती राहिले आहेत. १९५२ पासून आजपर्यंत असा प्रस्ताव एकाही उपराष्ट्रपतीविरोधात आलेला नाही. कारण ते नि:पक्षपाती होते, ‘आज सभागृहात नियम डावलून राजकारण केले जात आहे. सभापती कधी सरकारचे गुणगान करतात तर कधी स्वतःला संघाचा ‘एकलव्य’ म्हणवून घेतात. विरोधी नेत्यांकडे विरोधक म्हणूनच पाहिले जाते. अपमानित करतात. त्यांची निष्ठा संविधानाऐवजी सत्तापक्षावर आहे. सभागृहात व्यत्यय येण्याचे सर्वात मोठे कारण म्हणजे सभापती. विरोधक प्रश्न विचारतात तेव्हा सभापतीच सरकारची ढाल बनतात. लोकसभा… मणिपूर, सोरोस, सिंधिया यांच्यावरील वैयक्तिक टिप्पण्यांवरून गदारोळ; माफी मागूनही कारवाई झाली नाही लोकसभेत आपत्ती व्यवस्थापन दुरुस्ती विधेयकावरील चर्चेदरम्यान तृणमूलचे खासदार कल्याण बॅनर्जी आणि केंद्रीय मंत्री ज्योतिरादित्य सिंधिया यांच्यात बाचाबाची झाली. बॅनर्जी यांनी सिंधियावर वैयक्तिक टिप्पणी केली. गदारोळ झाल्यानंतर सभापतींनी ते कामकाजातून काढून टाकले. सभागृह पुन्हा सुरू झाल्यावर बॅनर्जी यांनी माफी मागितली. मात्र, सिंधिया यांनी माफी स्वीकारली नाही आणि हा हल्ला माझ्यावर आणि देशातील महिलांवर आहे. यापूर्वी मणिपूर आणि सोरोस यांच्याबाबत सभागृहात प्रचंड गदारोळ झाला होता. ‘शेतकऱ्याचा मुलगा झुकत नाही’ खासदार संबित पात्रा यांनी जॉर्ज सोरोस यांच्याशी असलेल्या संबंधांवरून काँग्रेसवर जोरदार हल्ला चढवला. ते म्हणाले, सोरोस फाऊंडेशनकडून देणग्या घेऊन देश अस्थिर करण्याचा कट रचल्याचा मुद्दा उपस्थित केल्यानंतर गांधी परिवाराने अविश्वास प्रस्तावाची नोटीस दिली. ते म्हणाले, हा शेतकऱ्याच्या मुलाचा, नम्र पार्श्वभूमीतून आलेल्या माणसाचा अपमान आहे. जाट समाजाचा अपमान करण्यासाठी ही नोटीस दिली आहे. पात्रा म्हणाले, ‘जाट हे देशभक्त आहेत. तुम्ही जाट सभापतीला दोष देत आहात. ते त्यांचे काम करत नाहीत, असे सांगून त्यांची बदनामी करण्याचा प्रयत्न करत आहात. खरगे म्हणाले, सभापतींनी राज्यसभेत विरोधकांची उपस्थिती पूर्णपणे नाकारली. त्यांनी अशी परिस्थिती निर्माण केली की अविश्वास प्रस्तावच आणावा लागला. संविधान आणि लोकशाही वाचवण्यासाठी आम्ही मजबुरीतून हे पाऊल उचलले. पत्रकार परिषदेला राजद, डीएमके, शिवसेना ठाकरे गट, तृणमूल काँग्रेस, राष्ट्रवादी काँग्रेस- शरद पवार, झामुमो, सीपीआय(एम) सह इतर विरोधी पक्षांचे खासदार उपस्थित होते.