देशभरात दिवाळी सेलिब्रेशन:पुरीमध्ये 1000 दिव्यांपासून बनवले सँड आर्ट, संरक्षण मंत्री भारत-चीन सीमेवरील जवानांसोबत साजरी करणार दिवाळी

आज देशभरात दिवाळीचा सण साजरा केला जात आहे. जम्मू-काश्मीरपासून तामिळनाडूपर्यंत दिवे प्रज्वलित करण्यात आले. संरक्षण मंत्री राजनाथ सिंह अरुणाचल प्रदेशातील तवांग येथे पोहोचले असून, तेथे ते जवानांसोबत दिवाळी साजरी करणार आहेत. त्यांच्यासोबत केंद्रीय मंत्री किरेन रिजिजू आणि लष्करप्रमुख जनरल उपेंद्र द्विवेदीही उपस्थित राहणार आहेत. CDS जनरल अनिल चौहान अंदमान आणि निकोबारची राजधानी पोर्ट ब्लेअरमध्ये दिवाळी साजरी करत आहेत. दरम्यान, नौदल प्रमुख ॲडमिरल दिनेश त्रिपाठी गुजरातमधील पोरबंदरमध्ये नौदल सैनिकांसोबत हा सण साजरा करत आहेत. आज दिवाळीसोबत सरदार पटेल यांची 149 वी जयंतीही आहे. पुरी, ओडिशातील वाळू कलाकार सुदर्शन पटनायक यांनी 1000 दिव्यांनी सरदार पटेल यांच्या फोटोचे सँड आर्ट बनवले आहे. हैदराबादचे श्री भाग्यलक्ष्मी मंदिर अयोध्येतील राम मंदिराच्या थीमवर सजवले आहे. गुरुवारी सकाळपासूनच लोक पूजेसाठी येथे येत आहेत. त्याचवेळी गोव्यातील पणजी येथे नरकासुर या राक्षसाच्या पुतळ्याचे दहन करून दिवाळी साजरी करण्यात आली. येथे दरवर्षी दिवाळीच्या दिवशी नरकासुराच्या पुतळ्याचे दहन केले जाते. देशभरातील दिवाळी उत्सवाची छायाचित्रे…