हत्येला जबाबदार असणाऱ्या लोकांना निर्दोष सिद्ध करण्यासाठी प्रयत्न:सुप्रिया सुळे यांचा गंभीर आरोप, दीनानाथ मंगेशकर रुग्णालयावर ठोस कारवाई नाही

पुण्यातील दीनानाथ मंगेशकर रुग्णालय गेल्या काही दिवसांपासून चांगलेच चर्चेत आले आहे. तनिषा भिसे या गर्भवती महिलेचा उपचाराअभावी तसेच हलगर्जीपणामुळे मृत्यू झाल्याचा आरोप रुग्णालय प्रशासनावर ठेवण्यात आला आहे. या प्रकरणातील स्त्रीरोग तज्ञ डॉ. सुश्रुत घैसास यांच्यावर गुन्हा दाखल झाला आहे. असे असले तरी या प्रकरणात अद्यापही ठोस कारवाई होताना दिसत नाही. यावर राष्ट्रवादी कॉंग्रेस शरद पवार गटाच्या खासदार सुप्रिया सुळे यांनी प्रतिक्रिया देत आरोप केले आहेत. हत्येला जबाबदार असणाऱ्या लोकांना निर्दोष सिद्ध करण्यासाठी प्रयत्न प्रसारमाध्यमांशी बोलताना सुप्रिया सुळे म्हणाल्या, पहिल्या दिवशी मुख्यमंत्र्यांनी जे वक्तव्य केले होते आणि आज जे वक्तव्य केले आहे त्यात खूप फरक आहे. एका हत्येला जबाबदार असणाऱ्या लोकांना निर्दोष सिद्ध करण्यासाठी प्रयत्न केले जात आहे, ते दुर्देव आहे. अनेक अहवालांमध्ये न अडकता सत्य परिस्थिती काय आहे, ते समजून घेणे गरजेचे आहे. सर्व गोष्टी समोर स्पष्ट आहेत. त्या कुटुंबाला न्याय मिळाला पाहिजे. त्यासाठी शासनानेच प्रयत्न करायला हवे. परंतु दुर्देवाने तसे होताना दिसत नाही. पुढे बोलताना सुप्रिया सुळे यांनी महाराष्ट्रात पाण्याची समस्या सुरू असून यावर भाष्य करत राज्यकर्त्यांना दोषी ठरवले आहे. सुप्रिया सुळे म्हणाल्या, जलजीवन मिशन नावाचा चांगला उपक्रम देशात राबवला जात आहे. परंतु राज्यात आणि देशात असणारे डबल इंजिन सरकार पाण्याचे नियोजन करू शकत नाही. आज लोक एक एक थेंब पाण्यासाठी फिरत आहेत. हे राज्यकर्त्यांचे अपयश असल्याचे सुप्रिया सुळे यांनी म्हटले आहे. दरम्यान, पुण्यातील दीनानाथ मंगेशकर रुग्णालय प्रकरणी ससून रुग्णालयाचा अहवाल पोलिसांना मिळाला असून, या अहवालातून दीनानाथ मंगेशकर रुग्णालयाला क्लीन चिट मिळाली देण्याचा प्रयत्न केला गेला. त्यानंतर सर्वच स्तरातून टीकेची झोड उठली होती. नागरिकांचा व विरोधकांचा रोष पाहता तनिषा भिसे प्रकरणातील संबंधित स्त्रीरोग तज्ञ डॉ. सुश्रुत घैसास यांच्यावर 106 (1) अंतर्गत गुन्हा दाखल करण्यात आला आहे. पुण्यातल्या अलंकार पोलिस ठाण्यात हा गुन्हा दाखल झाला आहे. डॉ. घैसास यांनी वेळेवर रुग्णाला उपचार दिले नाहीत, तसेच पैसे न मिळाल्याने रुग्णाला तसेच त्रस्त अवस्थेत ठेवले यात हलगर्जीपणा देखील झाला असा ठपका ठेवत गुन्हा दाखल करण्यात आला आहे.