पोर्शे अपघात प्रकरणाची 2 कोर्टात सुनावणी:अल्पवयीन आरोपीचे प्रकरण बाल न्यायालयात चालणार

पुण्यातील पोर्शे कार अपघात प्रकरणाची सुनावणी दोन वेगवेगळ्या न्यायालयात होणार आहे, अशी माहिती गुन्हे शाखेचे अपर पोलिस आयुक्त शैलेश बलकवडे यांनी दिली. यातले एक प्रकरण बाल न्यायालयात, तर दुसरे प्रकरण शिवाजीनगर सत्र न्यायालयात सुरू होणार आहे. पुण्यातील कल्याणीनगर येथे बड्या बापाच्या पोराने भरधाव वेगात पोर्शे कार चालवून दारूच्या नशेत दुचाकीवर निघालेल्या तरुण-तरुणीला उडविले होते. या प्रकरणात विविध चित्रपटातील कथानकाप्रमाणे घडामोडी घडल्यानंतर आता या प्रकरणाची लवकरच सुनावणी सुरू होणार आहे. पोर्शे अपघात झाल्यानंतर अल्पवयीन चालक असलेल्या मुलाच्या घरच्यांनी सर्व यंत्रणांना हाताशी धरण्याचा प्रयत्न केला होता. महत्त्वाचे म्हणजे अल्पवयीन असल्यामुळे आपण दारू पिण्याचा अंश रक्तात येऊ नये यासाठी त्यांनी ससून रूग्णालयातील डॉक्टरच मॅनेज केले होते. रक्ताचे नमुने बदलले गेले. त्यासाठी मोठा आर्थिक व्यवहार झाल्याचे समोर आले. यामध्ये अल्पवयीन मुलाचा आणि त्याच्या आई वडील, आजोबा यांचा सहभाग आढळून आला. त्यांच्यासह डॉक्टरांनाही या प्रकरणात अटक झाली. वकिलांची नियुक्ती आरोपपत्र दाखल झाल्यानंतर लवकरच सत्र न्यायालयातील खटल्याची सुनावणी होणार आहे. यामध्ये विशेष सरकारी वकील म्हणून शिशिर हिरे हे काम पाहणार आहेत. दुसरीकडे बोपदेव घाट येथील सामूहिक बलात्कार प्रकरणात ज्येष्ठ विधिज्ञ व माजी जिल्हा सरकारी वकील उज्ज्वला पवार यांची नियुक्ती करण्यात आली आहे. साडेसात कोटीच्या ड्रगजी होळी 25 मार्चला पुणे पोलिसांनी मागील वर्षात पकडलेल्या साड सात कोटीच्या ड्रगची 25 मार्च रोजी होळी करण्यात येणार असल्याची माहितीही अपर पोलिस आयुक्त शैलेश बलकवडे यांनी दिली. मात्र, यामध्ये कुरकुंभ ड्रग प्रकरणात पकडण्यात आलेल्या 3 हजार 674 कोटींचे ड्रगचा समावेश नसणार आहे. ती प्रकीया एप्रिल महिन्यात पार पाडली जाणार आहे.