वैष्णवी हगवणे प्रकरणात आरोपी शशांक आणि सुशीलवर आणखी एक गुन्हा:शस्त्र परवाने मिळवण्यासाठी बनावट पत्त्याची कागदपत्रे सादर

वैष्णवी हगवणे हुंडाबळी आणि आत्महत्या प्रकरणातील आरोपी शशांक आणि सुशील हगवणे यांना शस्त्र परवाने दिल्याच्या आरोपाखाली पुण्यातील विशेष महानिरीक्षक (कारागृह) जालिंदर सुपेकर यांची चौकशी सुरू आहे. बनावट कागदपत्रे मंजूर करून परवाने देण्यात आल्याचा आरोप करण्यात येत आहे. पुणे पोलिसांनी या आरोपांची चौकशी सुरू केली असून दरम्यान गृह विभागाने गुरुवारी सुपेकर यांच्यावरील अतिरिक्त कारभार काढून घेण्यात आले आहे. दरम्यान या प्रकरणात बनावट कागदपत्रे सादर केल्याप्रकरणी आरोपी शशांक आणि सुशील हगवणे यांच्यावर गुन्हा दाखल झाला आहे. या प्रकरणातील तपासात असे दिसून आले की, वैष्णवीचा पती शशांक आणि दीर सुशील यांनी पुणे ग्रामीणमध्ये राहत असताना पुणे पोलिसांच्या हद्दीत राहण्याचा दावा करून खोटे कागदपत्रे सादर केली होती. त्यावेळी अतिरिक्त पोलिस आयुक्त म्हणून सुपेकर यांनी कागदपत्रांवर स्वाक्षरी केली आणि हगवणे बंधूंना शस्त्र परवाने दिले. हगवणे बंधू हे सुपेकर यांचे पुतणे आहेत. यात आरोपी शशांक आणि सुशील हगवणे यांना शस्त्र परवाना मिळण्यासाठी बनावट कागदपत्रे सादर केल्याचे सिद्ध झाले आहे. त्यामुळे त्यांच्यावर गुन्हा दाखल करण्यात आला असून त्यांचा परवाना रद्द करण्याची प्रक्रिया सुरु करण्यात आली आहे. दरम्यान सामाजिक कार्यकर्त्या अंजली दमानिया यांनी आता महाराष्ट्र सरकारची फसवणूक केल्याबद्दल सुपेकर यांच्याविरुद्ध देखील फौजदारी खटला दाखल करण्याची मागणी केली आहे. पतीच्या कुटुंबाने हुंड्यासाठी छळ केला राष्ट्रवादी काँग्रेस पक्षाचे (राष्ट्रवादी) बडतर्फ नेते राजेंद्र हगवणे यांची सून वैष्णवी हिने 16 मे रोजी पिंपरी-चिंचवड येथील तिच्या घरी आत्महत्या केली होती. तिच्या कुटुंबाने आरोप केला आहे की तिच्या पतीच्या कुटुंबाने हुंड्यासाठी तिचा छळ केला होता, ज्यामध्ये 2 कोटी रुपयांची मागणी देखील समाविष्ट होती. पोलिसांनी हगवणे कुटुंबातील सदस्यांना आणि इतर काही जणांना मदत केल्याबद्दल अटक होती. कुटुंबाने सुपेकरच्या नावाखाली वैष्णवीला धमकी दिल्याचा आरोप आहे. नीलेश चव्हाण याच्याकडेही शस्त्रपरवाना या घटनेनंतर सामाजिक कार्यकर्ते दमानिया यांनी आरोप केला की सुपेकर यांनी हगवणे कुटुंबाचे रक्षण केले. सुपेकर यांनी हगवणेंना शस्त्र परवाने मिळवण्यात मदत केली होती. “सुपेकर यांनी हगवणे यांचा मित्र नीलेश चव्हाण यांच्याविरुद्ध खटला असतानाही त्यांना शस्त्र परवाना मिळवण्यात मदत केली होती. याची संपूर्ण चौकशी झाली पाहिजे,” अशी मागणी दमानिया यांनी म्हटले आहे. हगवणे बंधूंनी शस्त्र परवान्यासाठी अर्ज करताना बनावट कागदपत्रे सादर केली होती. हे दोघे पुणे ग्रामीण पोलिसांच्या हद्दीत राहत होते, जे आता पिंपरी चिंचवड पोलिस आयुक्तालयाच्या अखत्यारीत येते. तथापि, भावांनी दोन पत्त्याची कागदपत्रे सादर केली, ज्यावरून ते कोथरूड आणि वारजे येथे राहत असल्याचे दिसून आले.