६.७ टक्के भारतीयांना अमेरिकी नागरिकत्व

जगभरातील अंदाजे ८.७ लाख विदेशी नागरिकांनी सन २०२३ मध्ये अमेरिकेचे नागरिकत्व स्वीकारले. त्या आधीच्या वर्षी ही संख्या ९.७ लाख होती. या नागरिकत्वामध्ये ६.७ टक्के भारतीयांना म्हणजेच ५९,१०० जणांना अमेरिकेचे नागरिकत्व मिळाले. एकूण टक्केवारीत मेक्सिकोतील नागरिकांची टक्केवारी १२.७ असून, त्यानंतर भारतीयांचा नंबर लागतो. या आकडेवारीबद्दल…

आकडेवारी कोणाची?

‘यूएस सिटिझनशिप अँड इमिग्रेशन सर्व्हिसेस’ने (यूएससीआयएस) नुकत्याच प्रसिद्ध केलेल्या २०२३ च्या वार्षिक अहवालानुसार विविध देशातील नागरिकांना अमेरिकेचे नागरिकत्व देण्यात आले. त्यामध्ये ५९,००० भारतीयांना अमेरिकेचे नागरिकत्व मिळाले.

काय आहे अहवालात?

– सन २०२३ या आर्थिक वर्षात सुमारे ८.७ लाख परदेशी नागरिक अमेरिकेचे नागरिक झाले आहेत. त्यापैकी १.१ लाख मेक्सिकन (एकूण नवीन नागरिकांच्या संख्येच्या १२.७ टक्के) जणांना अमेरिकेचे नागरिकत्व मिळाले. नव्याने नोंदणी झालेल्या अमेरिकन नागरिकांपैकी ३५,२०० (४ टक्के) नागरिक हे डोमिनिकन प्रजासत्ताकातील असल्याचा दावाही अहवालात करण्यात आला आहे.

असे मिळते नागरिकत्व

– अमेरिकेचे नागरिकत्व मिळवण्यासाठी इमिग्रेशन अँड नॅशनलिटी अॅक्ट (आयएनए) मध्ये नमूद केलेल्या काही पात्रतेच्या अटींची पूर्तता करणे आवश्यक आहे. उदाहरणार्थ, किमान पाच वर्षे कायदेशीर स्थायी रहिवासी (एलपीआर) असणे आवश्यक आहे.

– आर्थिक वर्ष २०२३ मध्ये अमेरिकेचे नागरिकत्व देण्यात आलेले बहुतेक लोक नागरिकत्वासाठी पात्र होते कारण ते कमीतकमी पाच वर्षे एलपीआर होते (आयएनए कलम ३१६-ए)
– यात कमीतकमी ३ वर्षे एलपीआर होण्यास पात्र असलेल्या आणि ३ वर्षांसाठी अमेरिकन नागरिकाशी लग्न केलेल्या अर्जदारांचा ही समावेश होता (आयएनए कलम ३१९-ए).
– काही अर्जदार ठरावीक कालावधीत त्यांच्या लष्करी सेवेच्या आधारे पात्र होते.
– अहवालानुसार, बिगर नागरिक कायदेशीर स्थायी रहिवासी म्हणून किमान ५ वर्षे काढल्यानंतरच नागरिकत्वासाठी पात्र असतील. दुसरीकडे, अमेरिकन नागरिकाच्या जोडीदाराला कायदेशीर स्थायी रहिवासी म्हणून कमीतकमी तीन वर्षे घालवणे आवश्यक आहे.

भारतीयांची सद्यस्थिती

करोनामुळे अमेरिकेने मार्च २०२० मध्ये जगभरातील जवळपास सर्व व्हिसा प्रक्रिया थांबविल्यानंतर अमेरिकेची व्हिसा यंत्रणा आता ‘बॅकलॉग’ भरून काढण्याचा प्रयत्न करीत आहे. काही प्रकरणांमध्ये व्हिसासाठी अर्ज केलेल्या भारतीयांना वर्षभराच्या भेटीसाठी प्रतीक्षा करावी लागत आहे. मात्र, २०२३ मध्ये विक्रमी १४ लाख व्हिसाची प्रक्रिया झाल्यानंतर विलंब कमी झाला, असा दावा भारतातील अमेरिकी दूतावासाने केला आहे. पंजाब, हरियाणा आणि गुजरात या राज्यांतील भारतीयांना अमेरिकन नागरिकत्व हवे असून, हे नागरिक नोकरीसाठी सध्या वर्क व्हिसावर अमेरिकेत वास्तव्य करीत आहेत.

बेकायदा स्थलांतर

सीमा शुल्क विभागाने संकलित केलेल्या आकडेवारीनुसार, ऑक्टोबर २०२२ ते सप्टेंबर २०२३ दरम्यान भारतातून सुमारे ४२ हजार स्थलांतरित बेकायदा अमेरिकेत घुसले. या सर्वांनी मेक्सिकोला लागून असलेल्या देशाच्या दक्षिणेकडील सीमा ओलांडण्याचा प्रयत्न केला. गेल्या वर्षी अमेरिकेत घुसण्याचा प्रयत्न करणाऱ्या ९६,००० भारतीयांना पकडण्यात आले किंवा त्यांची हकालपट्टी करण्यात आली.

अमेरिकेचे नागरिकत्व मिळणारे ‘टॉप’चे तीन देश

देशाचे नाव वर्ष २०२२ टक्केवारी वर्ष २०२३ टक्केवारी
मेक्सिको १,२८,८७८ १३.३ १,११,५०० १२.७
भारत ६५,९६० ६.८ ५९,१०० ६.७
फिलिपाइन्स ५३,४१३ ५.५ ४४,८०० ५.१

नवीन नागरिकत्व मिळालेल्यांची आकडेवारी

सन २०२२-९ लाख ६९ हजार ३८०
सन २०२३- ८ लाख ७८ हजार ५००



Source link

Leave a Reply

Your email address will not be published. Required fields are marked *