[ad_1]
बेस्ट उपक्रमाची शेवटची डबल डेकर बस शुक्रवारी अंधेरी स्थानक पूर्व रेल्वे स्थानक ते सीप्झ मार्गावर धावली. सायंकाळी ४नंतर अंधेरी आगारातून सुटणाऱ्या डबल डेकर बस प्रवासासाठी प्रवाशांनी एकच गर्दी केली होती. हारतुरे, फुग्यांनी बसला आतून आणि बाहेरून सजवले होते. बेस्टचे काही चालक-वाहक आपल्या लहान मुलांनाही बस दाखवण्यासाठी घेऊन आले होते. अंधेरी स्थानकाबाहेरून बस सुटल्यानंतर नटराज स्टुडिओ, चकाला मार्गे सीप्झपर्यंत जाताना काही बसथांब्यांवर प्रवाशांकडून बसची छबी मोबाइल कॅमेऱ्यात टिपली जात होती. तर, दुकानदार आणि पादचाऱ्यांनाही या बसचे शेवटचे दर्शन मोबाइलमध्ये कैद करण्याचा मोह आवरत नव्हता. खेळीमेळीच्या वातावरणात शेवटच्या डबल डेकरमधून प्रवास करताना अनेक प्रवाशांचा उत्साह शिगेला पोहोचला होता. व्हिडीओ शूटिंग, छायाचित्रे काढतानाच काही प्रवासी ‘गणपती बाप्पा मोरया’च्याही घोषणा अधूनमधून देत होते. उपस्थित ज्येष्ठ नागरिकही प्रवासादरम्यान जुन्या आठवणींना उजळा देताना भावूक झाले होते.
Maharashtra Weather Forecast: राज्यात सरासरीहून नऊ टक्के कमी पाऊस, सर्वाधिक तुटीचे जिल्हे? जाणून घ्या…
बोरिवलीला राहणारे ६५ वर्षीय दत्तात्रय जाधव हे डबल डेकर बस पाहण्यासाठी आणि त्याचा शेवटचा प्रवास अनुभवण्यासाठी आवर्जून उपस्थित होते. डबल डेकरचा अनुभव कथन करताना वरील आसनाची मजा काही वेगळीच असल्याचे ते म्हणाले. मुंबईतील शहरात आणि उपनगरातील कुर्ला, अंधेरी भागात या बसमधून अनेकदा प्रवास केल्याचे त्यांनी सांगितले. मूळच्या मुंबईकर असलेल्या आणि लग्नानंतर ऑस्ट्रेलियाला राहणाऱ्या दर्शी मेहता या अंधेरीत काही दिवसांसाठी नातेवाईकांकडे आल्या आहेत. प्रसारमाध्यमातून शेवटची नॉन एसी डबल डेकर धावणार असल्याचे समजताच त्या आपला चार वर्षांचा मुलगा आणि भावाचा साडेचार वर्षांचा मुलगा यांना घेऊन डबल डेकर प्रवासाचा अनुभव घेण्यासाठी आल्या होत्या. आपण लहानपणी आणि कॉलेज जीवनात अनेकदा या बसने प्रवास केल्याचे त्यांनी सांगितले.
बेस्टच्या शेवटच्या नॉन एसी डबल डेकरला अखेरचा निरोप देण्यासाठी आम्ही आवर्जून उपस्थित राहिलो. देखभाल-दुरुस्ती विभागात काम करताना बेस्टच्या डबल डेकरची जबाबदारीही आम्ही सांभाळली. या जबाबदारीबरोबरच डबल डेकरमधून गेल्या २५ वर्षांत अनेकदा प्रवास केला. आता वाईट वाटते ही बस निवृत्त झाली. या बसच्या खूप आठवणी आहेत.
– विलास कदम, विलास करने (बेस्टचे निवृत्त कर्मचारी)
गेली १३ वर्षे मी वाहक म्हणून काम करत असून डबल डेकरमध्ये वाहक म्हणून अनेकदा काम केले. प्रवाशांसाठी दिलेली डबल डेकरची सेवा ही नेहमीच बेस्ट राहिली आहे. त्याच्यासोबत अनेकांच्या आठवणी आहेत. वरच्या मजल्यावरील जागा पकडण्यासाठी प्रवाशांची होणारी धडपड आम्ही अनुभवली आहे. डबल डेकरचा अनुभव आम्हा वाहकांसाठीही वेगळाच राहिला आहे.
– देवेन्द्र बनकर (शेवटच्या डबल डेकर बसमधील वाहक)
मनसेचे आंदोलन
मनसेकडून अंधेरी पूर्व बेस्ट आगारात आंदोलन करण्यात आले. मोठ्या प्रमाणात बस कालबाह्य होतानाच त्या तुलनेने ताफ्यात दाखल होणाऱ्या बसची संख्या कमी आहे. त्यामुळे प्रवाशांना गर्दीतून प्रवास करावा लागत असून बेस्ट उपक्रम बसची संख्या वाढवण्यात अपयशी ठरल्याचे उपस्थित मनसे कार्यकर्त्यांकडून सांगण्यात आले.
मुंबईकरांचा शेवटच्या डबल डेकरला भावूक निरोप, चालक-वाहकांसोबत केक कापून जुन्या आठवणींना उजाळा
[ad_2]
Source link