जालना : शहरातील कांचननगर भागातील एका ३७ वर्षीय महिलेचा विवाह काही वर्षांपूर्वी अकोला येथील योगेश नरेंद्र परमार याच्यासोबत झाला होता. लग्नानंतर त्यांना एक मुलगी झालेली आहे. ती सध्या साडेपाच वर्षांची आहे. मात्र पती-पत्नीत सतत वाद होत असल्याने त्यांनी न्यायालयामार्फत अडीच वर्षांपूर्वी घटस्फोट घेतला. घटस्फोट मंजूर करताना न्यायालयाने मुलीचा ताबा तिच्या आईकडे दिलेला असून वडिलांना दरमहिन्याच्या तिसऱ्या शनिवारी दुपारी ३ ते ५ या वेळेत कौटुंबिक न्यायालयाच्या आवारात मुलीला भेटण्याची परवानगी दिलेली आहे. सदर मुलगी सोमवारी दुपारी १ वाजेच्या सुमारास शाळा सुटल्यानंतर रोजच्याप्रमाणे व्हॅनमधून घरी येत होती. मात्र व्हॅनमधून उतरल्यानंतर घराजवळून त्या मुलीचे एका स्विफ्ट डिझायर कारमधील तीन इसमांनी अपहरण केले. काही लोकांच्या निदर्शनास हा प्रकार पडल्याने या घटनेची माहिती ताबडतोब सर्वत्र पसरली होती. याप्रकरणी मुलीच्या आईसह नातेवाईकांनी तातडीने कदीम जालना पोलीस ठाण्यात धाव घेऊन तक्रार दाखल केली. पोलिसांनी ताबडतोब लक्ष घालून लहान मुलीच्या अपहरणाचा प्रकार असल्याने ही घटना गांभीर्याने घेत तातडीने सूत्रे हलविली. पोलिसांची तपास चक्रे फिरताच मुलीचे अपहरण तिच्या पित्यानेच केल्याचे तपासात समोर आले. पोलिसांनी तांत्रिक विश्लेषण व मोबाईल लोकेशनवरून तपास सुरू ठेवला होता.
पोलीस निरीक्षक सिद्धार्थ माने यांनी मुलीच्या जीविताला कोणताही धोका होऊ नये म्हणून तातडीने पोलीस उपनिरीक्षक ज्ञानदेव नागरे, पोलीस अंमलदार रामेश्वर राऊत, दिलीप गायकवाड, शुभदा पाईकराव यांचे एक पथक अकोल्याला रवाना केले. या पथकाने रात्रीच अकोला गाठून मुलीचे वडील योगेश परमार याचे घर गाठले. मात्र तो घरी आढळून आला नाही. त्यानंतर अकोला शहरातील सर्व हॉटेलची तपासणी केली असता, एका प्रशस्त हॉटेलमध्ये तो आढळून आला. पोलिसांनी कारवाई करत मुलीची सुटका करून योगेश परमार यास ताब्यात घेतले. या यशस्वी कारवाई नंतर पोलिसांचे पथक अकोल्याहून जालन्याकडे रवाना झाले आहे.
दरम्यान, पोलीस अधीक्षक शैलेश बलकवडे, पोलीस उपअधीक्षक सचिन सांगळे, पोलीस निरीक्षक सिद्धार्थ माने यांच्या मार्गदर्शनाखाली पोलीस उपनिरीक्षक ज्ञानदेव नागरे, पोलीस अंमलदार रामेश्वर राऊत, दिलीप गायकवाड, शुभदा पाईकराव यांनी ही कामगिरी केली आहे.
Nari Shakti Vandan Adhiniyam: पंतप्रधान मोदींकडून नव्या संसदेत नारीशक्ती वंदन विधेयकाची ऐतिहासिक घोषणा